Şəmkir STEAM Mərkəzi

📢 Şəmkir STEAM Mərkəzində yeni texnologiyaların tətbiqi və təcrübəyə əsaslanan maraqlı təlimlər yay aylarında da davam edir!

Şagirdlər müxtəlif yaş qruplarını əhatə edən innovativ təlimlərdə iştirak edərək robototexnika, proqramlaşdırma, mühəndislik və yaradıcı layihələr üzrə bilik və bacarıqlar qazanırlar.

Uğurlar arzulayırıq!

📢 Mərkəzimizin şagirdləri Qazax-Tovuz Regional Təhsil İdarəsi tərəfindən diplom və təşəkkürnamələrlə təltif olunublar

Qeyd edək ki, Şəmkir şəhəri Əhməd Cavad adına tam orta ümumtəhsil məktəbinin şagirdləri mərkəzdə keçirilən təlimlərə böyük həvəslə qoşulurlar. Onlar 6 may 2026-cı il tarixdə keçirilən "Qazax-Tovuz Regional STEAM Müsabiqəsi"nə də Şəmkir STEAM Mərkəzində hazırlaşıblar.

Təbrik edirik və uğurlar arzulayırıq!

📢 Şəmkir STEAM Mərkəzində “Məntiqi labirintlər” proqramı üzrə təlimlər davam edir 🚀

Bu gün təlim proqramı üzrə növbəti dərs keçirilib. Şagirdlər Cuboro konstruksiyaları ilə işləyərək labirint platformasında topun hərəkət trayektoriyasını əvvəlcədən planlaşdırıb, daxili və xarici tunelləri analiz ediblər. Onlar verilən tapşırığa uyğun olaraq hər kubu yerləşdirməzdən əvvəl düşünərək mümkün variantları nəzərdən keçirib və yalnız bundan sonra qərar veriblər.

Bu məşğələ zamanı şagirdlərin strateji düşünmə qabiliyyəti daha da möhkəmlənib. Onların etdikləri hər səhv yeni bir təcrübəyə çevrilib, hər doğru qərar isə onları nəticəyə bir addım da yaxınlaşdırıb və sonda verilən tapşırığı uğurla həll etməyi bacarıblar.

Şagirdlərimizə növbəti təlimlərdə uğurlar arzulayırıq!

📢 "Kodlaşdırma laboratoriyası" təlimində növbəti dərs

Bugünkü dərsdə şagirdlər Matatalab robotu üzərində “Sensor anlayışı və sensor blokları” mövzusunu öyrəniblər. Dərs zamanı şagirdlər sensorların nə üçün istifadə edildiyini, onların robotun davranışına necə təsir göstərdiyini və siqnal göndərmə-alma prosesinin necə işlədiyini praktiki şəkildə müşahidə ediblər. Mövzu yalnız nəzəri izahla məhdudlaşmayıb. Şagirdlər kod bloklarını düzgün ardıcıllıqla quraraq kontrollerlər arasında əlaqə yaradıblar. Tapşırıqlar üzərində işləyərək məntiqi düşünmə, analiz etmə və problem həll etmə bacarıqlarını daha da inkişaf etdiriblər.

“Heyvan dostu: Robotlar” tapşırığında isə şagirdlər qruplara bölünüblər və qruplar iki Matatalab robotu ilə fəaliyyət göstəriblər. Birinci robotun üzərinə heyvanın şəkli olan stiker, ikinci robotun üzərinə isə həmin heyvanın yediyi yem şəkli yapışdırılıb.Qruplar heyvan stikerli robotu start nöqtəsindən yemə doğru hərəkət etdirən kod bloklarını qurublar. Digər robot da start nöqtəsindən heyvana doğru eyni prinsip əsasında proqramlaşdırılıb. Bunun üçün iki xəritədən istifadə olunub və görüş nöqtəsi xüsusi olaraq qeyd edilib. Kodlaşdırılmış hər iki robot verilən alqoritmə uyğun şəkildə hərəkət edərək maneələri keçib və görüş nöqtəsinə yaxınlaşıblar.

Dərsi böyük maraqla qarşılayan şagirdlər mövzunu dərindən mənimsəyiblər.

📢 Şəmkir STEAM Mərkəzində təlimlər davam edir!

Dron texnologiyaları üzrə təşkil olunan təlimlərdə şagirdlər uçuş aparatlarının konstruksiyası, idarəetmə mexanizmləri və proqramlaşdırılması ilə bağlı nəzəri və praktiki biliklər əldə edirlər. Təlimlər zamanı şagirdlər biliklərini və mühəndislik düşüncələrini, problem həll etmə və komanda ilə işləmə, pilotsuz uçuş aparatlarının dizaynı və idarə edilməsi kimi bacarıqlarını inkişaf etdirirlər.

Uğurlar arzulayırıq!

📢 10 iyun 2026-cı il tarixində STEAM İnnovasiya Mərkəzində “FIRST LEGO League Explore” Respublika turniri keçirilib

Ölkənin müxtəlif regionlarından 50-dən çox komandanın qatıldığı bu mötəbər yarışda Şəmkir STEAM Mərkəzi iki komanda ilə təmsil olunub. Şəmkir şəhəri Məhəmməd Füzuli adına məktəb-liseyin şagirdləri Banu Hümbətzadə, Əli Hümbətzadə və Elvira Qarazadənin iştirak etdiyi “Quantum” komandası və Həsən Əsgərli və Aylin Məmmədlinin yer aldığı “Quantum Relics” komandası turnirdə öz bilik və bacarıqlarını yüksək səviyyədə nümayiş etdiriblər.

7-9 yaşlı şagirdlərin elm, texnologiya, mühəndislik və riyaziyyat (STEAM) sahələri üzrə yarışdığı turnirdə hər iki komandamız xüsusi fərqlənib. Komandalarımız mövsüm mövzusu üzrə hazırladıqları innovativ layihələr, LEGO modelləri və araşdırma qabiliyyətləri ilə münsiflər heyətinin böyük rəğbətini qazanıblar. Yaradıcılıq, komanda işi və mühəndislik yanaşması əsasında aparılan qiymətləndirmənin nəticəsi olaraq, həm “Quantum”, həm də “Quantum Relics” komandası yarışın ən prestijli mükafatlarından biri olan "Outstanding Research AWARD" nominasiyasına layiq görülüblər.

Kiçik yaşlarından tədqiqatçılıq və innovativ düşüncə bacarıqları ilə seçilən şagirdlərimizi, onların valideynlərini və əməyi keçən müəllimlərimizi ürəkdən təbrik edir, növbəti yarışlarda yeni-yeni uğurlar arzulayırıq!

📢 “FIRST LEGO League Explore” Respublika Turniri öncəsi Şəmkir STEAM Mərkəzinin balaca mühəndisləri Tarix-Diyarşünaslıq Muzeyində

Mərkəzimizin "FIRST LEGO League Explore" turnirinə hazırlaşan komandalarının üzvləri üçün "Qədim Şəmkir Şəhəri" Dövlət Tarixi Mədəniyyət Qoruğundan sonra növbəti elmi ekskursiya təşkil olunub. Balaca tədqiqatçıların builki qlobal "UNEARTHED" mövzusunu daha dərindən mənimsəmələri məqsədilə reallaşan növbəti ünvan Şəmkir rayon Tarix Diyarşünaslıq Muzeyi olub.

Şəmkir Qoruğundakı arxeoloji qazıntı mühiti ilə tanış olan şagirdlər muzeydə həmin qazıntılar nəticəsində aşkar edilən maddi-mədəniyyət nümunələrini və qədim artefaktları öz gözləri ilə görmək imkanı qazanıblar. Sərgilənən qədim saxsı qablar, sikkələr, tunc və dəmir dövrünə aid əmək alətləri, eləcə də zəngin xalçaçılıq nümunələri gələcəyin mühəndislərində böyük maraq oyadıb. Uşaqlar keçmiş insanların yaşam tərzi, qədim sənətkarlıq sirləri və tarixi tapıntıların mühafizə olunma metodları haqqında ətraflı məlumatlar öyrəniblər.

Muzey eksponatlarından böyük ilham alan şagirdlərimiz qazandıqları bu təcrübəni öz LEGO layihələrinə tətbiq etmək üçün işə başlayıblar. Onlar tarixi artefaktların zərər görmədən qazılması və qorunmasını təmin edən sensorlu robot modelləri üzərində yeni mühəndislik ideyaları hazırlayıblar. Öyrəndikləri tarixi faktları öz mühəndislik dəftərlərinə qeyd edərək, qədim tarixin izlərini müasir robototexnika bacarıqları ilə uğurla sintez edən şagirdlərimiz, hətta LEGO-dan öz muzey modellərini də qurublar.

Ekskursiyalar zamanı qazandıqları zəngin təəssüratlarla turnirə tam hazır olan komandalarımıza uğurlar arzulayırıq.

📢 "FIRST LEGO League Explore" Respublika Turniri öncəsi balaca mühəndislərimiz Şəmkir Qoruğunda

Şəmkir STEAM Mərkəzinin "FIRST LEGO League Explore" turnirinə hazırlaşan komandalarının üzvləri yarış öncəsi maraqlı və elmi bir ekskursiyada iştirak ediblər. Balaca tədqiqatçıların builki qlobal "UNEARTHED" mövzusunu daha dərindən öyrənmələri üçün "Yüz eşitməkdənsə, bir dəfə görmək yaxşıdır" prinsipinə əsaslanaraq "Qədim Şəmkir Şəhəri" Dövlət Tarix-Mədəniyyət Qoruğuna ekskursiya təşkil olunub.

Böyük İpək yolu üzərində yerləşən və V-XIX əsrlərə aid orta əsr şəhərsalma mədəniyyətini, zəngin tarixi və mədəni irsini özündə qoruyan bu tarixi məkanda şagirdlərimiz əsl arxeoloji mühitlə yaxından tanış olublar. Ekskursiya zamanı onlar arxeoloji qazıntılar nəticəsində burada aşkar edilən orta əsrlərə aid möhtəşəm qala divarları, yaşayış evləri və maddi-mədəniyyət nümunələrini öz gözləri ilə görüblər. Xüsusilə Şəmkirdə orta əsrlərdə hidrotexniki qurğuların, saxsı borulardan ibarət su və kanalizasiya şəbəkəsinin olması gələcəyin mühəndislərinin böyük marağına səbəb olub. Onlar bu qədim mühəndislik sistemlərini öz LEGO layihələrində tətbiq etmək üçün artıq yeni ideyalar üzərində işləmək planları qurublar.

Qoruq ərazisində tariximizin araşdırılmasını əyani şəkildə öyrənən şagirdlər qazandıqları unikal təcrübələri öz mühəndislik dəftərlərinə yazaraq qeydlər aparıblar. Bu canlı təəssüratlardan ilhamlanaraq qədim tariximizin izlərini müasir robototexnika bacarıqları ilə birləşdirən balaca elm adamlarımıza turnirdə uğurlar arzulayırıq.