Ağcabədi rayonu Taxtakörpü qəsəbə 1 nömrəli tam orta ümumtəhsil məktəbi

16 iyun 2026-cı il tarixdə məktəbimizdə 2025–2026-cı tədris ilinin yekunlarına həsr olunmuş Şura iclası keçirilmişdir. İclasda cari tədris ilində görülmüş işlər, əldə olunan nailiyyətlər və qarşıda duran vəzifələr müzakirə edilmiş, müəllimlərin fəaliyyəti, şagirdlərin təlim nəticələri və məktəbin ümumi fəaliyyəti təhlil olunmuşdur. Eyni zamanda növbəti tədris ili üçün qarşıya qoyulan məqsəd və hədəflər müəyyən edilmiş, aidiyyəti üzrə tapşırıqlar verilmişdir.

13 iyun 2026-cı il tarixində məktəbimizdə 11-ci sinif şagirdlərinin "Son zəng" tədbiri keçirildi. Tədbirdə məzunlarımızın məktəb illərinə aid xatirələr bir daha yada salındı, müəllimlərin zəhməti və valideynlərin əməyi minnətdarlıqla qeyd olundu. Şagirdlər hazırladıqları maraqlı çıxışlar, şeirlər və musiqi nömrələri ilə tədbirə xüsusi rəng qatdılar.
Son zəngin sədaları ilə onlar doğma məktəbləri ilə vidalaşaraq həyatlarının yeni mərhələsinə qədəm qoydular. Məzunlarımıza gələcək həyatlarında uğurlar, sağlamlıq və bütün arzularının gerçəkləşməsini arzulayırıq. Yolunuz açıq, gələcəyiniz parlaq olsun!

2025-2026-cı tədris ilinin yekunu ilə bağlı Böyük Summativ Qiymətləndirmə (BSQ) keçirilmişdir. Qiymətləndirmənin keçirilməsində əsas məqsəd şagirdlərin tədris ili ərzində əldə etdikləri bilik və bacarıqların səviyyəsini müəyyən etmək olmuşdur. BSQ məktəb rəhbərliyinin nəzarəti altında şəffaf və obyektiv şəkildə təşkil edilmiş, şagirdlər verilən tapşırıqları müəyyən olunmuş vaxt ərzində yerinə yetirmişlər.

Milli-mənəvi dəyərlər, azərbaycançılıq və vətənpərvərlik ruhunda tədbirlərin təşkili üzrə Təlimat çərçivəsində məktəbimizdə vətənpərvərlik mövzusunda tədbir keçirilmişdir. Tədbir zamanı şagirdlərimiz Vətənimizin keşiyində dayanan əsgərlərimizə ürək sözlərini, xoş arzularını və minnətdarlıqlarını əks etdirən məktublar yazmışlar.
Yazılan məktublar aidiyyəti üzrə hərbi hissələrə göndərilmiş və əsgərlərimizə çatdırılmışdır. Şagirdlərimizin səmimi duyğularla qələmə aldıqları məktublar hərbçilərimiz tərəfindən böyük maraqla qarşılanmış, oxunmuş və yüksək qiymətləndirilmişdir.
Bu cür tədbirlər şagirdlərdə vətənə sevgi, milli-mənəvi dəyərlərə bağlılıq hissinin gücləndirilməsinə, eyni zamanda məktəblə ordu arasında mənəvi bağların möhkəmlənməsinə xidmət edir. Məktəbimiz gələcəkdə də vətənpərvərlik ruhunun aşılanmasına yönəlmiş tədbirlərin keçirilməsini davam etdirəcəkdir.

4 iyun 2026-cı il tarixdə məktəbimizin biologiya müəllimi Rauf Abuzərov tərəfindən 6-cı sinifdə təbiət fənnindən "Heyvanlar sağ qalmaq üçün necə uyğunlaşır?" mövzusunda açıq dərs keçirilmişdir. Dərs zamanı şagirdlər heyvanların yaşadıqları mühitə uyğunlaşma xüsusiyyətləri, müdafiə üsulları və həyatda qalmaq üçün qazandıqları uyğunlaşmalar barədə məlumat əldə etmişlər. İnteraktiv üsullarla təşkil olunan dərs şagirdlərin mövzuya marağını artırmış, onların tədqiqat və müzakirə bacarıqlarının inkişafına şərait yaratmışdır.

3 iyun 2026-cı il tarixdə məktəbimizin 2A sinfində ibtidai sinif müəllimi Mirzəyeva Azadə tərəfindən “Uzunluq” mövzusunda açıq dərs keçirilmişdir. Dərs zamanı şagirdlər uzunluq ölçü vahidləri, ölçmə qaydaları və müxtəlif əşyaların uzunluqlarının ölçülməsi barədə bilik və bacarıqlarını nümayiş etdirmişlər.
Dərsdə interaktiv təlim üsullarından istifadə olunmuş, şagirdlər müxtəlif tapşırıqlar və praktik fəaliyyətlər vasitəsilə mövzunu daha yaxşı mənimsəmişlər. Açıq dərs iştirakçılar tərəfindən maraqla izlənilmiş və şagirdlərin fəallığı yüksək qiymətləndirilmişdir.

2 iyun 2026-cı il tarixdə məktəbimizdə çalışmış hal-hazırda təqaüddə olan ibtidai sinif müəllimi Əliyeva Minayə və uzun illər məktəb direktoru və Laçın Rayon İcra Hakimiyyətində yüksək vəzifələrdə çalışmış ziyalı həyat yoldaşı Arif Feyzullayevin evinə məktəblilər tərəfindən ziyarət təşkil olunmuşdur.
Ziyarət milli-mənəvi dəyərlərin qorunması, yaşadılması və gənc nəslə aşılanması məqsədi daşıyırdı. Minayə müəllimə uzun illər ərzində təhsil sahəsində çalışqanlığı, zəhmətkeşliyi və şagirdlərə göstərdiyi qayğı ilə seçilmiş, gənc nəslə nümunə olacaq müəllimlərdən biri olmuşdur.
Şagirdlər ziyalı ailə ilə görüşərək onların həyat yolu, fəaliyyəti və cəmiyyətə verdikləri töhfələr barədə maraqlı söhbətlər aparmış, dəyərli tövsiyələr dinləmişlər. Görüş zamanı böyüklərə hörmət, milli ənənələrə bağlılıq, vətənpərvərlik və mənəvi dəyərlərin gənclərin tərbiyəsində mühüm rol oynadığı vurğulanmışdır.

1 iyun 2026-cı il tarixində Beynəlxalq Uşaqların Müdafiəsi Günü münasibətilə məktəbimizin şagirdləri Ağcabədi rayonunda təşkil olunmuş bayram tədbirində iştirak etmiş, həmçinin məktəbdə keçirilən tədbirə qoşulmuşlar. Tədbir zamanı uşaqların hüquqlarının qorunması, onların sağlam və xoşbəxt gələcəyinin təmin olunmasının əhəmiyyəti vurğulanmış, şagirdlər müxtəlif əyləncəli və maarifləndirici proqramlarda fəal iştirak etmişlər.