27/02/2026
“माझा मराठाचि बोलू कौतुके,
परी अमृतातेही पैजा जिंके.” — संत ज्ञानेश्वर
मराठी भाषा म्हणजे केवळ संवादाचे माध्यम नाही; मराठी म्हणजे आपल्या संस्कृतीचा शिरपेच , इतिहासाची शिदोरी आणि अस्मितेचा श्वास आहे. संतपरंपरेने ज्ञानाची अमृतवर्षा करत ही भाषा जनमानसात रुजवली. कवी, लेखक, नाटककार आणि लोककलावंतांनी तिच्या अभिव्यक्तीला वैभव दिले.
ऑस्ट्रेलियासारख्या दूर देशात राहूनही आपल्या मातृभाषेचा दिवा अखंड तेवत ठेवण्याचा प्रयत्न आपण ऑस्ट्रेलियन मराठी विद्यालयाच्या माध्यमातून करत आहोत. हजारो विद्यार्थ्यांनी येथे मराठी शिकली, बोलली, अनुभवली — आणि आपल्या मुळांशी नातं घट्ट केलं.
भाषा शिकवणं म्हणजे केवळ शब्द शिकवणं नाही तर संस्कार, परंपरा आणि आत्मभान पुढच्या पिढीकडे सुपूर्द करणं होय.
मराठी भाषा दिनानिमित्त आपण सर्वांनी आपल्या भाषेचा अभिमान बाळगूया, तिचा वापर वाढवूया आणि पुढील पिढीपर्यंत ती प्रेमाने पोहोचवूया
मराठी भाषा दिनाच्या हार्दिक शुभेच्छा!
जय मराठी! जय महाराष्ट्र!
जैसी दीपांमाझि दिवटी। कां तिथींमाझि पूर्णिमा गोमटी।
तैसी भाषांमध्ये मर्हाटी । सर्वोत्तम।।१।।
जैसी सरितांमध्ये गोदावरी। कां पर्वतांमधे रत्नगिरी।
तैसी भाषांमध्ये साजरी। मर्हाटी पै।।२।।
हरळांमध्ये रत्नकिळा। कां पुष्पांमध्ये कमळ।
तैसी भाषांमध्ये सोज्वळ। शोभिवंत दिसे।।३।।
दुर्गावरि शोभे चरी। कां मुक्ताफळे शोभती हारी।
तैसी शोभे भाषांमाझारी मर्हाटी पैं।।४।।
तीर्थांमध्ये काशी। व्रतांमध्ये एकादशी।
भाषांमध्ये तैशी। मर्हाटी शोभिवंत।।५।।
परिमळांमध्ये कस्तुरी। कां अंबरामध्ये शंबरारी।
तैसी मर्हाटी सुंदरी। भाषांमध्ये।।६।।
