YSU Institute of Pharmacy / ԵՊՀ ֆարմացիայի ինստիտուտ

մացիայի ինստիտուտը, որի գերագույն նպատակն է միջազգային չափորոշիչներին համապատասխան դեղագետ մասնագետների պատրաստումը, ինչը Հայաստանի Հանրապետությունում դեղարդյունաբերության զարգացման կարևորագույն նախապայմաններից է:

Կրթական բաղադրիչը

ԵՊՀ ֆարմացիայի ինստիտուտում գործում է ուսուցման եռաստիճան համակարգ՝ բակալավրիատական, մագիստրոսական, ասպիրանտական։ Ինստիտուտում ստեղծված են միջազգային չափորոշիչներին համապատասխան գիտակրթական գործունեություն ծավալելու իրական հնարավորությունները «Ֆարմացիա» մասնագիտության գրեթե բոլոր ուղղություններով:

Ինստիտուտը հագեցած է նորագույն տեխնոլոգիաներով և ուսուցման գործընթացում կիրառվող նորարարական մեթոդներով, ինչը հնարավորություն է ընձեռում ուսանողներին տեսական գիտելիքները գործնականում լիարժեք կիրառելու: Ինստիտուտում ներդրված հեռաուսուցման համակարգի շնորհիվ ուսանողների համար կազմակերպվում են նաև առցանց դասախոսություններ՝ արտերկրի գործընկեր համալսարանների գիտնականների ներգրավմամբ։

Հետազոտական բաղադրիչը

Ֆարմացիայի ինստիտուտում գործող լաբորատորիաներում կատարվում են գիտական հետազոտություններ ոչ սպիտակուցային ամինաթթուների, պեպտիդների և այլ՝ պոտենցիալ դեղաբանորեն ակտիվ միացությունների սինթեզի և դրանց բժշկակենսաբանական սքրինիգի, հայկական լեռնաշխարհի բուսական բազմազանության հենքի վրա յուրահատուկ հալենային և նորհալենային դեղապատրաստուկների ստացման, բժշկական կենսատեխնոլոգիայի, դեղերի կառուցվածքային հետազոտման ու որակի գնահատման և այլ ուղղություններով: Հետազոտությունները կատարում են ինչպես հանրապետական բազային և թեմատիկ, այնպես էլ միջազգային գիտական դրամաշնորհային ծրագրերի («ISTC», «CRDF», «VolkswagenStiftung») ֆինանսավորման շրջանակներում:

Միջազգային և տեղական համագործակցությունը

ԵՊՀ ֆարմացիայի ինստիտուտը սերտ համագործակցում է արտերկրի դեղագործական և հարակից մասնագիտական առաջատար համալսարանների ու գիտահետազոտական կենտրոնների հետ: Դրանցից են ՌԴ Բելգորոդի պետական հետազոտական համալսարանը, Ռուսաստանի ժողովուրդների բարեկամության համալսարանը, Մոսկվայի Մ․ Վ․ Լոմոնոսովի անվան պետական համալսարանը, Գերմանիայի Ռոստոկի և Վիսմարի համալսարանները, ՌԴ ԳԱ Ա.Նեսմեյանովի անվան Էլեմենտօրգանական միացությունների ինստիտուտը և այլն: Ինստիտուտի ուսանողները և ասպիրանտները հնարավորություն ունեն նշյալ հաստատություններում կատարելու հետազոտություններ և գրելու իրենց ավարտական, մագիստրոսական և ատենախոսական աշխատանքները։ Գործակցության շրջանակում կատարվում են նաև համատեղ հետազոտություններ միջազգային դրամաշնորհային ծրագրերի շրջանակում:

Բակալավրիատում և մագիստրատուրայում ուսուցումը կազմակերպվում է՝ ՌԴ Բելգորոդի պետական հետազոտական և Ռուսաստանի ժողովուրդների բարեկամության համալսարանների դեղագործական ֆակուլտետների հետ հաստատված համատեղ կրթական ծրագրերով, որի շնորհիվ շրջանավարտներին շնորհվում է դեղագետի (պրովիզորի) որակավորմամբ կրկնակի (երկու համալսարանների) դիպլոմ:

Ֆարմացիայի ինստիտուտում բակալավրիատում կազմակերպվում է նաև անգլերենով ուսուցում օտարերկրյա ուսանողների համար:

Ինստիտուտն արդյունավետ համագործակցում է բժշկական տարբեր հաստատությունների, դեղագործական ընկերությունների, դեղատնային ցանցերի, հայաստանյան գիտահետազոտական կենտրոնների հետ, որոնց թվում՝ ՀՀ ԳԱԱ «Հայկենսատեխնոլոգիա» գիտաարտադրական կենտրոնը, ՀՀ ԳԱԱ ֆիզիոլոգիայի ինստիտուտը և այլն: Գործընկեր կազմակերպություններում անցկացվում են մասնագիտական առարկաների լաբորատոր աշխատանքներ ու արտադրական պրակտիկաներ, կատարվում են ավարտական, մագիստրոսական և ատենախոսական աշխատանքների գործնական հետազոտություններ:

Պրոֆեսորադասախոսական կազմը

Ֆարմացիայի ինստիտուտում դասավանդում են հանրապետության անվանի ու առաջատար մասնագետներ, որոնք՝ որպես հրավիրյալ դասախոսներ արտերկրի համալսարաններում նույնպես կարդում են դասախոսություններ, վերապատրաստումներ են անցնում միջազգային հեղինակավոր ուսումնական և գիտական հաստատություններում, ինչպես նաև ներգրավված են տեղական ու միջազգային հետազոտական ծրագրերում։

Ուսանողներին ընձեռվող հնարավորությունները

Ընդլայնված համագործակցության շնորհիվ ուսանողները հնարավորություն ունեն ստանալու անվանական կրթաթոշակներ և ուսման վարձի մասնակի փոխհատուցում։

Փոխանակման ծրագրերի շրջանակում ինստիտուտի ուսանողները հնարավորություն ունեն կրթություն ստանալու արտերկրի հեղինակավոր համալսարաններում։

Ֆարմացիայի ինստիտուտում ստեղծվել է դեղատնային մոդել՝ կրթական առավել նպաստավոր միջավայր ապահովելու համար: Դեղատնային մոդելը դասընթացները դարձնում է իրավիճակային խնդիրներով լի` ուսանողներին տալով դեղատնային գործնական գիտելիքներ հենց համալսարանում:

Շրջանավարտների կարիերան

ԵՊՀ ֆարմացիայի ինստիտուտի շրջանավարտները հնարավորություն ունեն աշխատելու ինչպես հայաստանյան, այնպես էլ արտերկրի դեղագործական ու հարակից մասնագիտական ոլորտներում գործող պետական և մասնավոր կառույցներում որպես դեղագետ, կլինիկական դեղագետ, դեղագետ-տեխնոլոգ, դեղագետ-քիմիկոս, դեղագետ-ներկայացուցիչ, փորձագետ, դեղագործական շուկայի մարքեթոլոգ, գիտաշխատող, դասախոս և այլն։