20/01/2026
🙂Գրքերի անգին խորհրդատվություն տաղանդավոր երիտասարդ ստեղծագործող 📚 Արփինե Ա Յ Գ-ից 😍
Գրում է հեղինակը.
«Ինձնից նվեր գրքերի մեծ դժվարությամբ ընտրված ցանկ(որովհետև ես մի 100 հատ կընտրեի առնվազն) համաշխարհային գրականությունից, որոնք կարդալուց հետո մարդը կսովորի գրել, կամ գլխի կընկնի, որ պետք չէ գրել և կամ մարդասիրությունից դրդված կդադարի գրել» ✍️🏻
1. «Աստվածային կատակերգություն»
Դանթե Ալիգիերի
Սա պարզապես գիրք չէ։ Այն մարդկային գիտակցության ամբողջական քարտեզ է՝ մեղքից մինչև փրկություն։ Ով ուզում է գրել, բայց չի կարդացել այս գործը, նա դեռ չի բացահայտել՝ ինչ է բառի հանդեպ պատասխանատվությունը։
Դանթեն ցույց է տալիս, որ գրականությունը կարող է դատել և սիրել միաժամանակ։ Այս գրքից հետո շատերը առաջին անգամ զգում են՝ «գուցե ես դեռ չեմ հասել գրելու իրավունքին»։
2. «Համլետ»
Ուիլյամ Շեքսպիր
«Լինե՞լ, թե չլինել». սա հարց չէ։ Սա մտածո՛ղ մարդու դատավճիռն է. ամենացավոտ գրքերից է գրող դառնալ ցանկացողների համար, քանի որ այստեղ հասկանում ես՝ մտքի խորությունը լեզվից ավելի կարևոր է։
3. «Դոն Կիխոտ»
Սերվանտես
Սա վեպ է հենց գրականության մասին։ Գրողի, պատրանքի, խելագարության և հավատի մասին։ Դոն Կիխոտը ծիծաղելի է միայն մակերեսային մտածողության դեպքում։ Իրականում Կիխոտը վերջին ազնիվ մարդն է աշխարհում, որտեղ բոլորը խելացի են, բայց դատարկ։ Ով ուզում է գրել, բայց չի հասկացել Դոն Կիխոտին, նրա գրածը հոգի չի ունենա։
4. «Ֆաուստ»
Գյոթե
Ֆաուստը գրականության ամենաահավոր հերոսներից է, քանի որ նա մարդկության հավաքական կերպարն է։ Սա գիրք է այն մասին, թե
ինչ գին ունի գիտելիքը, և արդյոք արժե՞ ամեն ինչ զոհել ճշմարտության համար։ Գրող դառնալ ցանկացողը այստեղ առաջին անգամ զգում է՝ գրականությունը խաղ չէ, այլ պայմանագիր «սատանայի» հետ։
5. «Ոճիր և պատիժ»
Դոստոևսկի
Եթե դու ուզում ես գրել մարդկանց մասին և չես կարդացել Դոստոևսկու վեպերը, դու պարզապես շատ վատ ես ճանաչում մարդուն։ Դոստոևսկին բացում է հոգու այն շերտերը, որ մարդը ինքը չի համարձակվում տեսնել կամ տեսնելուց հետո մոտ գալ ու ճանաչել։ Այս գիրքը կարդալուց հետո շատերը հասկանում են, որ իրենց ստեղծած հերոսները չափազանց պարզունակ են։
6. «Կարամազով եղբայրներ»
Դոստոևսկի
Եթե «Ոճիր և պատիժ»-ը հոգեբանություն է,
ապա սա աստվածաբանություն է գրականության լեզվով։ Աստված, ազատություն, մեղք, պատասխանատվություն։ Սա գիրք է, որից հետո գրող դառնալը դառնում է ոչ թե ցանկություն, այլ խաչ։
7. «Աննա Կարենինա»
Տոլստոյ
Տոլստոյը ցույց է տալիս, թե ինչպես կարելի է գրել սիրո մասին՝ առանց սենտիմենտալության և կյանքի մասին՝ առանց փիլիսոփայական ձևերի։ Այս գիրքը սարսափելի է նրանց համար, ովքեր վստահ են, թե «կյանքը գիտեն»։
8. «Ուլիսես»
Ջեյմս Ջոյս
Ես այս գիրքը չեմ կարդացել դեռ, բայց եթե մի օր գտնեմ և գնեմ, առանց հապաղելու կկարդամ։ Ով ինձ խորհուրդ է տվել, ասել է՝ անպայման կկարդաս այս գիրքը, որպեսզի երբեք չվախենաս քո իրական հնարավորություններից։
9. «Օտարը»
Կամյու
Սա սառը, «անզգա», խիստ անկեղծ գիրք է։
Կամյուն գրում է մարդու մասին, որը հրաժարվել է բոլոր ձևականություններից։ Այս գիրքը կարդալուց հետո գրողը հարց է տալիս ինքն իրեն՝ ես ճշմարտությո՞ւն եմ գրում, թե պարզապես պաթետիկ նախադասություններ։
10. «1984»
Օրուել
Գիրք, որը ցույց է տալիս՝ ինչ է լինում, երբ լեզուն դառնում է զենք։ Սա պարտադիր է ոչ միայն գրողների, այլ բոլոր նրանց համար, ովքեր, օգտվելով ժամանակակից ազատության հնարավորությունից, գրում կամ ասում են խոսքեր՝ չմտածելով դրանց հետևանքների մասին։
11. «Թշվառները»
Հյուգո
Սա գիրք է խղճի մասին։ Սոցիալական արդարության մասին։ Եվ, ամենակարևորը, մարդու փրկության հնարավորության մասին։
Ժան Վալժանը(առաջին հայացքից ընդամենը անազատության մեջ կործանված հանցագործ) գրականության ամենամեծ հերոսներից է, քանի որ նա ԴԻՄԱՆՈՒՄ է։ Այս գիրքը վտանգավոր է գրող դառնալ ցանկացողների համար, քանի որ այստեղ պարզ է դառնում, որ բարոյական մասն ավելի կարևոր է, քան գրելու ոճը։ Եթե դու չես կարող կարդալ ու սիրել այս գիրքը, ուրեմն դու դեռ ընդունակ չես սիրել մարդկությանը ընդհանրապես։
12. «Այսպես խոսեց Զրադաշտը»
Նիցշե
Սա գիրք չէ բոլորի համար։ Եվ դա նրա մեծագույն արժանիքն է։ Նիցշեն չի գրում, որ քեզ բացատրի աշխարհը։ Նա գրում է, որ քանդի քո կարծրացած պատկերացումները։ Բարոյականություն, հավատ, ճշմարտություն, մարդ… ամեն ինչ այստեղ դրվում է հարցականի տակ։ Գրող դառնալ ցանկացողի համար սա վտանգավոր գիրք է, քանի որ Նիցշեն ցույց է տալիս՝ միտքը պետք է լինի ավելի համարձակ, քան լեզուն։ Այս գրքից հետո շատերը հասկանում են, որ իրենք գրում էին ոչ թե իրենց ճշմարտությունը, այլ ընդամենը փոխառված համոզմունքներ։
13. «Տափաստանի գայլը»
Հեսսե
Եթե Նիցշեն կործանում է կեղծ արժեքները,
Հեսսեն ցույց է տալիս, թե ինչ է լինում մարդու հետ այդ ամենից հետո։ «Տափաստանի գայլը» գիրք է ներքին խորը ճեղքերի, մենակության, և ինքնաճանաչողության դաժան ուղու մասին։
Սա վեպ է այն մարդկանց համար, ովքեր շատ են մտածում և քիչ են ԸՆԴՈՒՆՈՒՄ։ Գրող դառնալ ցանկացողը այստեղ առաջին անգամ կարող է տեսնել իր իսկ հոգու մութ անկյունները։
Եվ եթե նա չի դիմանում այդ հայելուն, ավելի լավ է չգրի ընդհանրապես։
14. «Վարպետը և Մարգարիտան»
Բուլգակով
Սա գրականության վրեժն է իրականությունից։
Բուլգակովը գրում է մի աշխարհում, որտեղ
ճշմարտությունը արգելված է, ազատ միտքը՝ ծաղրված, իսկ գրողը ամենավտանգավոր արարածն է։ Սատանան այստեղ պարզապես չար ուժ չէ։ Նա արդարության գործակալն է մի իրականության մեջ, որտեղ բարին վաղուց լքել է աթոռը։ Այս գիրքը կարդալուց հետո գրող դառնալ ցանկացողը կանգնում է ամենադաժան հարցի առաջ․ «Ես պատրա՞ստ եմ վճարել այն գինը,
որ գրականությունը երբեմն պահանջում է»։
Բայց եթե այս գրքից հետո դու դեռ ուզում ես գրել
ոչ սեփական փառքի ու այլոց հավանությունների համար, այլ որովհետև այլևս չես կարող լռել,
ապա գուցե հենց այդ պահին է, որ դու առաջին անգամ մոտենում ես իրական գրականություն ստեղծելուն։
15. «Իլիական» «Ոդիսական»
Հոմերոս
Իլիականը պատերազմի մասին գիրք չէ։ Սա պատերազմի մեջ գտնվող մարդու բնույթի մասին գիրք է։ Ով ուզում է իր գրքում հերոսներ ստեղծել և չի կարդացել «Իլիականը», նա դեռ չի հասկացել,
որ հերոսությունը միշտ ծնվում է ողբերգությունից։
Այս գիրքը սովորեցնում է ամենակարևորը՝
մեծ պատմությունները սկսվում են զգացմունքից, ոչ թե սյուժեից։
«Ոդիսականը» դիմանալու արվեստի մասին է։
Սա ճանապարհի գիրք է։ Տուն վերադառնալու,
ինքն իրեն չկորցնելու, գայթակղություններին դիմադրելու մասին։ Ոդիսևսը մտածող մարդ է քաոսի մեջ։ Գրող դառնալ ցանկացողը այստեղ հասկանում է, թե մարդն ինչպես է մնում մարդ
իր կյանքի դժվարին ճանապարհի ընթացքում։
Հ.Գ. ոչ բոլորը պետք է գրող դառնան։ Բայց բոլորը, ովքեր համարձակվում են գրել, պարտավոր են նախևառաջ գրագետ ընթերցող դառնալ։
«Կարդա՛ այս գրքերը, եթե վերջում դեռ կուզես գրել, գուցե արժե փորձել… Եթե սկսես կասկածել, դա նույնպես ազնվություն է։ Իսկ լավ գրողները ազնիվ մարդիկ են…» Արփին Այգ ☀️
#ԳրքերիխորհրդատուԱՅԳ
#ԱրփինեԱյգ
05/01/2026
28/12/2025
22/12/2025
21/12/2025
20/12/2025