Արտաշատի հ3 հ/դ

Բարեկենդան օրեր է, խելքս գլխես կորեր է...
Այսպես մեկտեղեցինք մեր մտքերն ու ջանքերը։
Մենք ուժեղ ենք միասին։

Սիրով տեղեկացնում ենք, որ մեր դպրոցի աշակերտուհի Լուսինե Ամիրփուրը Արարատի մարզի Սամբոյի դեռահասների 2025թ ընտրական առաջնության 59 կգ քաշային կարգում գրավել է առաջին տեղ` նվաճելով Հայաստանի առաջնությանը մասնակցելու ուղեգիր։
Շնորհավորում և հաջողություն ենք մաղթում մեր սանին և մարզիչ Արթուր Հախումյանցին։

Այսօր լրանում է հայկական բանակի կազմավորման 33_ամյակը։ Մշտապես կարևորելով ռազմահայրենասիրական դաստիարակության դերը հայոց բանակի զարգացման գործում`մեր դպրոցում տեղի ունեցավ 《Բանակը մեր տունն է, մեր մեր ամրոցը》խորագրով համադպրոցական տոն_միջոցառումը։ Տարբեր դասարանների սովորողների մասնակցությամբ ոգեշնչող միջոցառման ընթացքում կտրակյանցիները նախ սրահ բերեցին Հայոց եռագույնը, ապա ցուցադրեցին իրենց ռազմական գիտելիքները` բանակի առօրյան, երդման արարողությունը, առավոտյան նախավարժանքն ու հմուտ ռազմավարական հնարքներ։ Հուզիչ ու պարտավորեցնող պահ էր հերոս հայորդիների լուսանկարներով սովորողների մուտքը և նրանց անունից հնչեցված պատգամը։ Միջոցառումը եզրափակվեց ռազմահայրենասիրական երգ ու պարով։ ՇՆՈՐՀԱՎՈ՜Ր ՏՈՆԴ, ՀԱ'Յ ԶԻՆՎՈՐ ՈՒ ՀԱՅՈ'Ց ԲԱՆԱԿ։

Ռազմահայրենասիրական շնչով լեցուն տոն պարգևելու համար շնորհակալ ենք մեր դպրոցի ՆԶՊ առարկայի ուսուցիչ Արթուր Հախումյանցին։

Կարևորելով մատաղ սերնդի հոգևոր կրթությունն ու դաստիարակությունը` Արտաշատի 3_րդ հիմնական դպրոցում ամեն տարի կատարվում է տնօրհնեքի արարողություն։ Մասյացոտնի թեմի Սուրբ Հովհաննես Ավետարանիչ Առաջնորդանիստ եկեղեցու քահանա Տեր Երվանդ Բաբայանի գլխավորությամբ միասնական աղոթքով սկսվեց օրը։ Քահանա Տեր Երվանդ Բաբայանը օրհնեց կրթօջախն ու սաներին` մաղթելով հաջող, խաղաղ ու բեղուն ուսումնական տարի։ Այնուհետև բաժանվեց օրհնված հացը։
Թող Աստված պահի և պահպանի յուրաքանչյուրիս տունն ու ընտանիքը։

Խորը ցավով ու սրտի մեծ կսկիծով տեղեկացնում ենք, որ կյանքից անժամանակ հեռացավ մեր դպրոցի հարգարժան բուժքույր Գոհար Մարտիրոսյանը։ Դպրոցի ողջ անձնակազմի սերն ու հարգանքը վայելող բուժքրոջ մասին դժվար է խոսել անցյալ ժամանակով։ Նա պատկառելի կնոջ, հոգատար մոր, նվիրված գործընկերոջ ու ընկերոջ, բանիմաց մասնագետի տիպիկ կերպար էր։
Ցավում ենք և ցավակցում Գոհար Մարտիրոսյանի ընտանիքին, հարազատներին ու ընկերներին։ Ննջի'ր խաղաղությամբ ու թող հոգուդ լույս իջնի, սիրելի՜ Գոհար։

Մեր դպրոցում շաբաթը կարևորվեց Պարույր Սևակի 100_ամյակին նվիրված ամփոփիչ միջոցառմամբ։ Դպրոցի 8_րդ և 9_րդ դասարանների սովորողները նախ բեմադրեցին դրվագներ գրողի կյանքից, ապա ներկայացրին Սևակ բանաստեղծին, մարդուն, հայրենասերին ու 《աշխարհը շալակած տանողին》։ Բոլոր ժամանակների սիրելի բանաստեղծին նվիրված ցերեկույթ_ միջոցառումը համեմված էր բարձրակարգ երաժշտությամբ ու դերասանական խաղով։ Ուսուցողական, բազմաբովանդակ համադպրոցական միջոցառման համար շնորհակալ ենք հայոց լեզվի և գրականության ուսուցչուհի Մարջան Պետրոսյանին։

Հոկտեմբերի 17_ին Հայաստանի պետական սիմֆոնիկ նվագախմբի երաժիշտները ԴասA ծրագրի շրջանակում հյուրընկալվեցին Արտաշատի հ.3 հիմնական դպրոցի աշակերտներին։ Ուսուցողական դաս_հանդիպման ընթացքում սովորողները մեծ հետաքրքրությամբ լսեցին երաժշտական գործիքների մասին կարևոր տեղեկություններ, ինքնուրույն նվագեցին, ակտիվորեն մասնակցեցին երաժշտական խաղերի, ինչպես նաև վայելեցին դասական երաժշտություն։ Առավել ակտիվ աշակերտները ստացան հուշանվերներ։
Շնորհակալ ենք Հայաստանի պետական սիմֆոնիկ նվագախմբին` մեզ հյուրընկալվելու և բարձրակարգ երաժշտությամբ մեր օրը լցնելու համար։

Նախորդ ամսվա վերջին դպրոցի աշակերտական համակազմը ընտրեց աշակերտական խորհրդի նախագահ։
Նախ առաջադրված թեկնածուները (8_րդ Ա դասարան` Նարե Միքայելյան, 8_րդ Բ դասարան` Աստղիկ Կարապետյան և Արծրուն Սամվելյան, 9_րդ Ա դասարան` Մարիաննա Հակոբյան) ներկայացրին իրենց նախընտրական ծրագրերը, պատասխանեցին աշակերտներին հուզող հարցերին։ Ապա փակ գաղտնի քվեարկությամբ, ձայների մեծամասնությամբ աշակերտական խորհրդի նախագահ ընտրվեց 9_րդ Ա դասարանի աշակերտուհի Մարիաննա Հակոբյանը։ Շնորհավորում ենք մեր նորընտիր աշխորհրդի նախագահին և մաղթում հաջողություն։