Qendra për Koordinimin dhe Përhapjen e Informacionit Shkencor

Bibliotekat përballë sfidës së Inteligjencës Artificiale

Si ndryshon roli i bibliotekave në një botë ku Inteligjenca Artificiale mund të japë përgjigje në vetëm pak sekonda?

Kjo është një nga çështjet më interesante që po diskutohet këto ditë në World Library and Information Congress (WLIC) 2026, që po zhvillohet në Busan të Koresë së Jugut, më 10–13 gusht, nën temën “Libraries Powering Transformation”.

Kongresi i 90-të i International Federation of Library Associations and Institutions (IFLA) ka mbledhur më shumë se 3 500 profesionistë të bibliotekave dhe informacionit nga mbi 120 vende.
Edhe Shqipëria është pjesë e këtij rrjeti ndërkombëtar përmes Bibliotekës Kombëtare të Shqipërisë, anëtare e IFLA-s.

Në qendër të diskutimeve janë Inteligjenca Artificiale, besueshmëria e informacionit, pabarazitë në aksesin dhe aftësinë për të vlerësuar informacionin, si edhe roli që duhet të kenë bibliotekat në këtë realitet të ri.

Në epokën e AI-së, pyetja nuk është më vetëm sa shpejt mund ta gjejmë informacionin, por:

A është informacioni i besueshëm?
Cili është burimi i tij?
Si mund ta verifikojmë?

Pikërisht këtu merr një rëndësi të re roli i bibliotekave dhe profesionistëve të informacionit jo vetëm si ruajtës të dijes, por si udhërrëfyes në një mjedis informacioni gjithnjë e më kompleks.

Një tjetër diskutim i lidhur me këtë temë, i zhvilluar në kuadër të aktiviteteve të IFLA-s më 7–8 gusht, u përqendrua te integriteti i kërkimit shkencor në epokën e AI-së dhe te mënyrat se si profesionistët e bibliotekave mund të kontribuojnë në ruajtjen e tij.

Në një botë ku teknologjia ofron përgjigje të menjëhershme, sfida qëndron te aftësia për të vlerësuar, verifikuar dhe kuptuar informacionin.

Për më shumë informacion mbi Kongresin Botëror të Bibliotekave dhe Informacionit – IFLA WLIC 2026 klikoni linkun:

https://2026.ifla.org/

Buletini informativ për veprimtaritë shkencore të Akademisë së Shkencave të Shqipërisë dhe instituteve të saj gjatë muajit korrik 2026.

Lexo linkun:https://akad.gov.al/wp-content/uploads/2026/08/Buletini-Korrik-2026-new-1_compressed.pdf




www.akad.gov.al

Akademiku Nazim Gruda mes 11 shkencëtarëve të nominuar për Këshillin Ndërkombëtar Këshillimor të Akademisë Lituaneze të Shkencave





Ngritja e Këshillit Ndërkombëtar Këshillimor të Akademisë Lituaneze të Shkencave ka sjellë përzgjedhjen e 11 shkencëtarëve me reputacion ndërkombëtar, mes të cilëve është nominuar edhe akademiku shqiptar Nazim S. Gruda. Ky organ i ri do të ketë një rol këshillimor strategjik në organizimin e kërkimit shkencor në Lituani dhe në parashikimin e zhvillimeve në politikat e shkencës dhe arsimit.

Këshilli Ndërkombëtar Këshillimor është një organ i ri, i përbërë nga 11 shkencëtarë të shquar ndërkombëtarë, i krijuar për të ofruar rekomandime strategjike mbi organizimin e kërkimit shkencor në Lituani dhe për të kontribuar në parashikimin e zhvillimeve në politikat e shkencës dhe arsimit. Anëtarët e Këshillit propozohen nga Presidenti i Akademisë dhe pritet të emërohen nga Presidiumi për një mandat pesëvjeçar.

Akademiku Nazim S. Gruda është një personalitet me reputacion ndërkombëtar në fushën e shkencave bujqësore, hortikulturës, ushqimit dhe mjedisit. Ai ka dhënë kontribute të rëndësishme në kërkimin shkencor përmes studimeve dhe botimeve të shumta akademike, si edhe në zhvillimin e politikave dhe strategjive për bujqësinë e qëndrueshme. Krahas veprimtarisë së tij shkencore, ai ka një përvojë të gjatë si vlerësues i projekteve kërkimore të Bashkimit Evropian, ekspert i Organizatës së Kombeve të Bashkuara për Ushqimin dhe Bujqësinë (FAO), drejtues i strategjive ndërkombëtare për zhvillimin e hortikulturës dhe ekspert i Ministrisë Federale të Ushqimit dhe Bujqësisë të Gjermanisë.

Nominimi i tij përbën një vlerësim të lartë të ekspertizës, integritetit shkencor dhe kontributit të tij në nivel ndërkombëtar.
Akademiku Nazim S. Gruda është anëtar i jashtëm i Akademisë Lituaneze të Shkencave dhe i Seksionit të Shkencave Bujqësore dhe Pyjore të saj që nga viti 2025. Krijimi i Këshillit Ndërkombëtar Këshillimor pasqyron angazhimin e Akademisë Lituaneze të Shkencave për të përfshirë ekspertizën më të lartë ndërkombëtare në zhvillimin e politikave dhe prioriteteve të kërkimit shkencor.

Akademia e Shkencave e Shqipërisë i uron akademikut Nazim S. Gruda suksese në këtë përgjegjësi të re.

www.akad.gov.al

Të mërkurën, më 5 gusht 2026, në orën 16:00, transmetohet episodi i tetë i “Podcast Akademia”, me pjesëmarrjen e prof. asoc. Belfjore Qose





“Podcast Akademia” është një instrument komunikimi dhe promovimi i veprimtarisë shkencore e botuese të Akademisë së Shkencave të Shqipërisë.

Në episodin e tetë, e ftuar është kryetarja e Akademisë së të Rinjve, prof. asoc. Belfjore Qose, me të cilën diskutojmë mbi rolin e Akademisë së të Rinjve të Shqipërisë në zhvillimin e kërkimit shkencor dhe mbështetjen e brezit të ri të studiuesve.

Bisedat dhe intervistat e “Podcast Akademia” transmetohen në rrjetet sociale të ASHSH-së, për episodet e mëparshme klikoni linket:

• Episodin e I të Podcast AKADEMIA me akademik Arben Merkoçin e ndiqni këtu: https://youtu.be/lyVdRtd1RnA
• Episodin e 2 të Podcast AKADEMIA me z. Andreas Dushi, e ndiqni këtu: https://youtu.be/3878cqY1yG8
• Episodin e 3 të Podcast AKADEMIA me akademik Ilia Mikerezi e ndiqni këtu: https://youtu.be/7a00s4cXvZc
• Episodin e 4 të Podcast AKADEMIA me akademik Rrapo Ormëni e ndiqni këtu: https://youtu.be/QftTRhucfc8
• Episodin e 5 të Podcast AKADEMIA me akademik Besnik Baraj dhe prof. dr. Melissa Perry e ndiqni këtu: https://youtu.be/4FGJVypJ9zw
•Episodin e 6 të Podcast AKADEMIA me akademik Gëzim Hoxha e ndiqni këtu: https://youtu.be/Duw7U-B7iPg
•Episodin e 7 të Podcast AKADEMIA me akademik Shaban Sinani e ndiqni këtu: https://youtu.be/Lequb8eAro0

Bëni subscribe të kanalit youtube të ASHSH; https://youtube.com/...

www.akad.gov.al

Të nderuar autorë të projektit madhor “Enciklopedia shqiptare”

Me urimin që të jeni duke kaluar pushime të gëzuara, Qendra e Botimeve Enciklopedike dhe Albanologjike do t’ju njoftojë se në fund muajit të shtator, do të bëhet një vlerësim i të gjithë artikujve që janë shkruar në kuadër të Enciklopedisë shqiptare dhe menjëherë pas
këtij procesi, parashikohet shlyerja konform kontratës e pjesës së parë të detyrimeve për artikujt e dorëzuar.

Ju kujtojmë, po ashtu, që me ta shkruar secilin prej artikujve për të cilët keni rënë dakord, duhet t’ia përcillni koordinatorit/koordinatores së redaksisë gjegjëse.

Akademia e Shkencave e Shqipërisë i uron ditëlindjen akademikut Kosta Barjaba





Në këtë ditë të veçantë, Akademia e Shkencave e Shqipërisë i shpreh urimet më të përzemërta për ditëlindjen akademikut Kosta Barjaba, duke i dëshiruar jetë të gjatë dhe krijimtari të frytshme shkencore e akademike, në shërbim të dijes dhe zhvillimit shoqëror të vendit.

Akad. Barjaba është një ndër personalitetet më të shquara të shkencës shqiptare bashkëkohore, me një karrierë të pasur kërkimore, akademike dhe botuese që shtrihet për më shumë se tri dekada.

Ai lindi më 2 gusht 1960, në Sopik të Sarandës. Studimet e larta i kreu në Universitetin e Tiranës, ku u diplomua për filozofi. Në vitin 1989 fitoi gradën kandidat i shkencave, ndërsa titullin doktor i shkencave e mori në vitin 1995. Në vitin 1999 u emërua profesor.

Formimi i tij akademik u pasurua me studime dhe kualifikime ndërkombëtare në universitete prestigjioze si Universiteti i Regensburgut, Universiteti i Leçes dhe i Trentos, Universiteti Capodistria i Athinës, Universiteti i Triestes, Universiteti i Miçiganit, Universiteti Brown dhe Universiteti i Harvardit, ku u specializua për administrim publik.

Karriera e tij akademike nisi si pedagog i filozofisë dhe sociologjisë në Universitetin e Tiranës (1984-1993), ku më pas u bë koordinator për sociologjinë në ristrukturimin e Fakultetit të Shkencave Sociale.

Akad. Kosta Barjaba ka mbajtur detyra të larta shtetërore dhe politike, si dhe rolin e këshilltarit në Ministrinë e Shëndetësisë (2014-2017). Ka shërbyer si dekan i Fakultetit të Shkencave Politike në Universitetin Mesdhetar të Shqipërisë (2009-2012) dhe si pedagog në Universitetin Europian të Tiranës (2013-2014). Që prej vitit 2018 është Drejtor i Kabinetit të Kryetarit të Kuvendit të Shqipërisë.

Ai është autor ose bashkautor i mbi pesëmbëdhjetë monografive dhe përmbledhjeve studimore, të cilat kanë ndriçuar aspekte kyçe të zhvillimit ekonomik e shoqëror të Shqipërisë. Ndër botimet më të rëndësishme përmenden: Pandemia dhe rimëkëmbja (2021), Akte të Parlamentit Shqiptar, 1929-1924 (2019), Lexim bashkëkohor i klasikëve të sociologjisë (2018), Rimodelimi i zhvillimit në kontekstet lokale (2017), Asimetritë e zhvillimit si shkak i varfërisë (2016), Migrimi i varfërisë (2015), Kurthet e papunësisë (2013), Bazat e Sociologjisë (2011), Hyrje në sociologji (2010) etj. Librat e tij janë përdorur si tekste mësimore në universitete perëndimore, sidomos italiane, duke e bërë kontributin e tij të njohur edhe në mjediset akademike ndërkombëtare.

Akad. Kosta Barjaba ka marrë pjesë në mbi njëqind konferenca shkencore ndërkombëtare e rajonale, duke prezantuar kumtime në disa gjuhë të huaja. Veprimtarinë kërkimore e ka drejtuar në çështje të tilla si: migracioni, papunësia, varfëria, tranzicioni demografik dhe mirëqenia sociale, duke kontribuar në analizën kritike dhe në ofrimin e zgjidhjeve teorike për sfidat e shoqërisë shqiptare. Një meritë e veçantë e tij është promovimi i dialogut ndërdisiplinor mes sociologjisë, politologjisë dhe filozofisë.

Për meritat e tij shkencore, ai është pranuar anëtar i Akademisë së Shkencave të Shqipërisë që prej vitit 2011.

www.akad.gov.al

“Një grusht librash”-Evalda Paci sjell “Letërsia e vjetër shqipe në kontekstin ballkanik e europian” më shumë lexoni: Website: www.oranews.tvYoutube ...

Podcast AKADEMIA 7: Intervistë me akademik Shaban Sinani Podcast AKADEMIA 7: Intervistë me akademik Shaban Sinani ...