18/07/2022
Të dashur miq.
Dje, Bërzeshta e Librazhdit ishte “Kryeqyteti i kulturës shqiptare“, pasi Simpoziumi mbarëkombëtar për krijimtarinë letrare të VILSON BLLOSHMIT dhe GENC LEKËS“, të ekzekutuar 45 vjet më parë, ishte veprimtaria më e rëndësishme kulturore për shqiptarinë ditën e djeshme. Nën kurorën e gjelbër të rrapit 700-vjeçar, të këtij monumenti të hatashëm natyre, ku janë mbledhur kuvende të panumërt përgjatë historisë, u zhvillua ky simpozium me pjesëmarrjen e më shumë se 150 të pranishmëve.
Suksesi i këtij simpoziumi qëndron në përgatitjen serioze prej një viti të kumtesave nga studiues të shquar të letërsisë si edhe në gatishmërinë e një grupi të gjerë bashkëpunëtorësh e kontribuesish për çdo detaj të këtij aktiviteti.
Qendra për Arsim Demokratik, bashkëorganizatore, përshëndet pjesëmarrjen profesorëve dhe drejtuesve të Universiteteve të Elbasanit, Tiranës, Korçës, Durrësit, të Europës Juglindore-Tetovë, Nehemia Gateway University, të Agjencisë së Zbatimit të Gjuhës në Shkup. Pjesëmarrës ishin edhe përfaqësues të Shoqatës së ish-të përndjekurve politikë, të Autoritetit për Informim mbi Dosjet e Sigurimit të Shtetit, rektori i Universitetit të Elbasanit prof. Skënder Topi, rektori i NG University Peter Makyriado, deputeti i Kuvendit të Shqipërisë z. Lefter Gështenja, kryetari i Bashkisë së Librazhdit z. Kastriot Gurra, intelektualë, mësues.
Të pranishme ishin Eglantina, vajza e Gencit, Enerjeta, vajza e Vilsonit dhe familjarë të tjerë të poetëve.
Simpoziumi u çel më himnin kombëtar dhe pas përshëndetjeve nga institucionet organizatore, të zotërinjve Simon Mirakaj, Selami Zalli dhe Skënder Vrioni, përshendetja e Visar Zhitit, simbol i disidencës, dërguar nga Çikago e lexuar me ndjenjë nga Ambasador Mal Berisha, “mbajti të mbërthyer“ audiencën, e cila mbeti e tillë deri në fund të aktivitetit.
Kumtesat nga studiuesit Agim Vinca, Eris Rusi, Primo Shllaku, Tomorr Plangarica dhe Lili Sula, trajtuan në këndvështrime e dimensione të ndryshme krijimtarinë e poetëve duke na dhuruar “një buqetë“, e cila është e plotë në broshurën e kumtesave të çdo pjesëmarrësi.
Atmosfera akademike dhe letrare kaloi në pauza me intereprime të poezive të poetëve nga Alba Dajlanaj, Helena Halilaj dhe nxënësja Venera Blloshmi, të shoqëruar me muzikë simfonike nga një kuartet harqesh të Universitetit të Arteve.
Përshëndetjet nga ish nxënës e kolegë të poetëve dhe të zotërinjve Lefter Gështenja e Kastriot Gurra shënuan edhe mbylljen e simpoziumit.
Miq të nderuar,
Simpoziumi i djeshëm na ka dhënë një kanaqësi dhe emocion të jashtzakonshëm. Ne bashkëpunëtorët, kontribuesit dhe pjesëmarrësit, kemi shlyer “një borxh moral“ ndaj poetëve, pasi edhe ne kemi kontribuar që ata të mbeten të gjallë midis nesh dhe të qëndrojnë në vendin e merituar të ngrehinës së përkorë të letërsisë shqipe.
Me këtë rast falënderojmë të gjithë institucionet dhe individët që kontribuan në arritjen e këtij suksesi.
Falënderojmë familjen Geiger për përkushtimin maksimal dhe profesonalizmin për mikpritjen, fotografin e talentuar James Leithart, nxënëset maturante të Bërzeshtës me drejtorin e tyre z. Arben Faqolli dhe të gjithë të tjerët, jo të paktë, që ndihmuan dhe kontribuan për suksesin.
Mirënjohje për të gjithë ju që ish*t në bashkëbisedimin dje me Vilsonin dhe Gencin!
28/03/2024
25/10/2022
09/09/2022
05/09/2022
01/09/2022
29/08/2022
25/08/2022
05/08/2022
18/07/2022