Universiteti Bedër

Studentët e programit Multimedia dhe Dizajn Grafik prezantojnë punimet e diplomës

Në Kolegjin Universitar Bedër u zhvilluan sot prezantimet e punimeve të diplomës nga studentët e programit Multimedia dhe Dizajn Grafik. Studentët paraqitën projektet e tyre finale, duke demonstruar aftësitë krijuese, teknike dhe profesionale të fituara përgjatë studimeve.

Punimet e prezantuara përfshinin projekte multimediale, si filma të shkurtër, videoklipe dhe reklama, si edhe punime të dizajnit grafik, ndër të cilat postera, materiale për printim dhe krijime të tjera vizuale. Përmes prezantimeve të tyre, studentët sollën ide inovative dhe zgjidhje vizuale që pasqyrojnë talentin, përkushtimin dhe përgatitjen e tyre për tregun e punës në fushën e medias dhe dizajnit grafik.

Universiteti Bedër bashkorganizon aktivitetin ndërkombëtar

“Identiteti, Konflikti dhe Dialogu në Evropën Juglindore: Perspektiva Ndërfetare”

Më 18 maj 2026, në Kolegjin Universitar Bedër, u zhvillua aktiviteti ndërkombëtar “Identity, Conflict and Dialogue in South-East Europe: The Interfaith Perspective”, i organizuar nga Qendra Kërkimore për Zhvillim të Qëndrueshëm dhe Inovacion pranë KU Bedër në bashkëpunim me “Asociația pentru Dialog și Valori Universale” (Association for Dialogue and Universal Values) - Rumani, Institutin e Dialogut Prizmi dhe Universitetin Epoka. Aktiviteti u fokusua në dialogun ndërfetar, bashkëjetesën fetare, rolin e institucioneve fetare në ndërtimin e paqes, bashkëpunimin institucional dhe rëndësinë e arsimit në forcimin e mirëkuptimit të ndërsjellë në Evropën Juglindore.

Në aktivitet morën pjesë akademikë, studiues, përfaqësues të institucioneve kërkimore dhe përfaqësues të shoqërisë civile nga Rumania dhe Shqipëria.

Gjatë vizitës në Bedër, delegacioni u prit nga Rektori i Universitetit, Prof. Dr. Gjergj Sinani, Kryetari i Bordit Administrativ, Dr. Surja Shehi, si dhe nga stafi i Departamentit të Shkencave Islame. Në kuadër të vizitës dyditore, Prof. Asoc. Dr. Genti Kruja, Drejtor i Qendrës për Zhvillim të Qëndrueshem dhe Inovacion pranë KU Bedër, mbajti një prezantim mbi kontributin e Universitetit Bedër në zhvillimin e aktiviteteve të dialogut ndërfetar. Ai paraqiti rastin e Shqipërisë si një shembull të rëndësishëm të bashkëjetesës fetare, harmonisë ndërkomunitare dhe bashkëpunimit institucional, duke e vlerësuar këtë përvojë si një model me rëndësi edhe për rajonin.

Programi përfshiu gjithashtu vizita kulturore dhe studimore në Tiranë dhe Shkodër, me qëllim njohjen nga afër të trashëgimisë fetare, historike dhe kulturore të Shqipërisë.
Aktiviteti u vlerësua si një mundësi e rëndësishme për shkëmbim përvojash, forcim të bashkëpunimit akademik dhe ndërtim urash mirëkuptimi mes komuniteteve të ndryshme fetare dhe kulturore.

Kolegji Universitar Bedër ju uron përzemërsisht Gëzuar Kurban Bajramin! 🌙

Në Kolegji Universitar Bedër patëm kënaqësinë të mirëprisnim lektoren Lucía Martín Gómez nga Universiteti i Salamankës në një leksion të hapur me temë:
“Të dhënat dhe paraqitja e tyre përmes teknikave të analizës vizuale dhe vizualizimit të të dhënave”. 📊✨

Studentët dhe pjesëmarrësit patën mundësinë të eksplorojnë mënyrat se si të dhënat mund të analizohen dhe interpretohen përmes teknikave moderne të vizualizimit, duke kuptuar më mirë rolin që ato luajnë në vendimmarrje, kërkim shkencor dhe zhvillim teknologjik. Gjatë leksionit u diskutua mbi rëndësinë e analizës vizuale në transformimin e informacionit kompleks në njohuri të kuptueshme dhe të dobishme, si edhe mbi ndikimin që vizualizimi i të dhënave ka në inovacion dhe komunikimin efektiv të informacionit.

Kolegji Universitar Bedër pjesëmarrës në Konferencën Ndërkombëtare në Gjakovë

Në kuadër të Konferencës Ndërkombëtare dhe Ndërdisiplinore “Toward an Intelligent Society: Challenges and Opportunities”, të zhvilluar më 22–23 maj 2026 në Universitetin “Fehmi Agani” në Gjakovë, Kosovë, Prof. Asoc. Dr. Genti Kruja, Drejtor i Qendrës për Zhvillim të Qëndrueshem dhe Inovacion pranë Kolegjit Universitar Bedër, prezantoi kumtesën me titull “Edukimi Ndërfetar Mjedisor dhe Etika e Ujit për Transformim Shoqëror në Shqipëri”. Konferenca mblodhi një numër të gjerë studiuesish dhe pjesëmarrësish ndërkombëtarë, me 230 prezantime, 340 autorë, bashkautorë dhe kontribues, 35 sesione prezantimi dhe përfaqësim nga 27 vende të ndryshme.

Kumtesa trajtoi mënyrën se si edukimi ndërfetar mjedisor mund të kontribuojë në transformimin shoqëror, duke lidhur përgjegjësinë ekologjike me etikën fetare, edukimin qytetar dhe veprimin kolektiv. Në fokus të prezantimit ishte uji, i trajtuar si burim jetësor, simbol shpirtëror dhe hapësirë e përbashkët bashkëpunimi ndërfetar. Studimi ngriti pyetje mbi rolin e mësimeve fetare në nxitjen e veprimit mjedisor, mbi rëndësinë e ujit si burim i përbashkët, si dhe mbi integrimin e etikës mjedisore në sistemet arsimore dhe trajnimin e mësuesve në shoqëri pluraliste si Shqipëria.

Në prezantim u theksua se krizat mjedisore, si ndryshimet klimatike, ndotja, humbja e biodiversitetit dhe mungesa e ujit, nuk janë vetëm sfida teknike apo politike, por edhe çështje morale, shpirtërore dhe shoqërore. Sipas kumtesës, mësimet fetare mbi kujdestarinë ndaj natyrës, maturinë, drejtësinë dhe përgjegjësinë ndaj krijimit mund të ndihmojnë në mobilizimin e komuniteteve dhe në forcimin e bashkëpunimit ndërfetar për mbrojtjen e mjedisit.

Një vëmendje e veçantë iu kushtua rastit të Shqipërisë, e cila u paraqit si një kontekst domethënës i bashkëjetesës fetare dhe i mundësive për bashkëpunim ndërmjet komuniteteve fetare, institucioneve arsimore dhe aktorëve të shoqërisë civile. Kumtesa theksoi se integrimi i etikës mjedisore në edukim dhe në formimin e mësuesve mund të krijojë ndikim afatgjatë, duke formuar qytetarë më të ndërgjegjshëm dhe më të angazhuar për qëndrueshmërinë, paqen dhe përgjegjësinë shoqërore.

Gjatë këtij prezantimi Prof. Kruja theksoi dhe përvojën e projektit Erasmus+ “Facing Global Challenges: Climate protection, climate resilience and climate justice in the interreligious education and training of teachers”, i cili synon të integrojë edukimin mjedisor, drejtësinë klimatike dhe bashkëpunimin ndërfetar në formimin e mësuesve. Në këtë kuadër, ai theksoi rëndësinë e edukimit ndërfetar, si një instrument për të ndërgjegjësuar brezat e rinj mbi përgjegjësinë ndaj natyrës dhe “shtëpisë sonë të përbashkët”.

Open Lecture with Lucía Martín Gómez from the University of Salamanca on the topic:

“Data and its exploitation through visual analytics and data visualization techniques.”

📅 25 May 2026
🕙 10:00
📍 Senate Room, Beder University College

We invite all students and academic staff interested in technology, communication, research, and data analysis to be part of this engaging session.

🩸 Në ambientet e Kolegjit Universitar Bedër u realizua aktiviteti i dhurimit vullnetar të gjakut, në bashkëpunim me Kryqin e Kuq Shqiptar, me pjesëmarrjen e stafit dhe studentëve, në mbështetje të fëmijëve talasemikë.

Përmes këtij akti human dhe solidarizues, kontribuuam së bashku për të dhuruar shpresë dhe për të sjellë një ndryshim pozitiv në jetën e atyre që kanë nevojë.

Faleminderit të gjithë pjesëmarrësve që u bënë pjesë e kësaj nisme me vlerë humane. ❤️

Rektori i Kolegjit Universitar Bedër, Prof. Dr. Gjergj Sinani, zhvilloi një vizitë institucionale në International Burch University, në Bosnje - Hercegovinë.

Gjatë takimit u diskutua mbi mundësitë e bashkëpunimit mes dy institucioneve në fusha të ndryshme akademike dhe shkencore, duke u fokusuar në shkëmbimin e eksperiencave, zhvillimin e projekteve të përbashkëta dhe krijimin e mundësive të reja për studentët dhe stafin akademik.

Kjo vizitë shërben si një hap i rëndësishëm drejt forcimit të marrëdhënieve ndërinstitucionale dhe zgjerimit të bashkëpunimeve ndërkombëtare në fushën e arsimit të lartë.

Në datat 4–8 maj 2026, lektoret e Kolegjit Universitar “Bedër”, PhD cand. Rudina Çinari dhe MSc. Nevila Samarxhi, morën pjesë në Javën Ndërkombëtare Erasmus+, të organizuar në Uniwersytet Rzeszowski Collegium Medicum, Poloni.

Gjatë kësaj jave akademike u zhvilluan një sërë leksionesh, takimesh dhe aktivitetesh ndërvepruese, të cilat krijuan mundësi për shkëmbim përvojash dhe bashkëpunim ndërkombëtar mes pedagogëve dhe pjesëmarrësve nga institucione të ndryshme evropiane. Aktiviteti shërbeu gjithashtu për forcimin e partneriteteve akademike, ndarjen e praktikave më të mira në fushën e arsimit të lartë dhe promovimin e ndërkombëtarizimit në kuadër të programit Erasmus+.

🩸 Dhuro gjak, dhuro shpresë!

Në datat 13–14 maj 2026, në ambientet e Kolegjit Universitar Bedër, do të organizohet aktiviteti i dhurimit vullnetar të gjakut, në bashkëpunim me Kryqin e Kuq Shqiptar.

Të gjithë ata që dëshirojnë të kontribuojnë në këtë nismë humane, lutemi të kenë parasysh informacionet e mëposhtme:

• Të jeni në gjendje të mirë shëndetësore;
• Konsumoni ushqim të lehtë përpara dhurimit (nuk duhet të jeni esëll);
• Pini mjaftueshëm ujë;
• Shmangni lodhjen fizike dhe mungesën e gjumit një natë më parë;
• Konsultohuni paraprakisht me stafin mjekësor nëse keni kaluar viroza, ndërhyrje kirurgjikale apo merrni medikamente të caktuara.

Ju mirëpresim të kontribuojmë së bashku në këtë nismë me vlerë humane përmes të cilit mund të shpëtohen jetë dhe të ndihmohen persona në nevojë.