02/02/2016
Komunikatë për mediat
Bashkia Tiranë në kapërcyell të vitit, në mungesë totale të transparencës, mori dy vendime kapitale për qytetin: vendosi të rrisë çmimin e biletës së transportit urban me 33 % pa asnjë justifikim brenda logjikës ekonomike, si dhe vendosi arbitrarisht të tjetërsojë 11 hapësira publike, nga të cilat 1 është me statusin Park Qendror i Tiranës dhe pjesë e Ansamblit Monumental të Qendrës, dhe 7 të tjera zona të gjelbërta që i japin oksigjen qytetit.
Të dy vendimet kanë dy pika të përbashkëta :
Në të dyja rastet, vendimet nuk kanë ardhur si kërkesë apo shërbim ndaj qytetarëve, por njëri ka ardhur si kërkesë nga vetë Kryetari që shpluhuroi një vendim të 2004-ës për parkingje nëntokësore, dhe tjetri i kërkuar nga biznesi për interesa fitimi.
Pika e dytë e përbashkët e këtyre vendimeve është se të dyja vijnë në formulën e koncesionit, ku njëri vendim ka gati 10 vjet që është stazhonuar në dështimin e vet me transportin publik dhe tjetri propozohet nga vetë Kryetari bazuar në studime fantazmë prej dekadës së kaluar.
Formula e koncesionit, apo “Partneriteti Publik-Privat”, nuk është tjetër veçse një model i dështuar fajdesh që përdoret nga institucionet publike në kushtet e falimentit për të marrë para nga privati, duke prodhuar gjatë procesit disa shifra fiktive nëpër ekrane televizive, ku dihet se pjesa më e madhe e buxhetit shkon për kontrata të paracaktuara.
Bashkia e Tiranës është kthyer në një “broker” të Wall Street-it që negocion para fajdesh mes publikut dhe bizneseve fituese me monopole të hekurta.
Pasojat e këtij modeli kanë qenë katastrofale për xhepat e qytetarit dhe ekonominë e qytetit në përgjithësi.
Ne si qytetarë refuzojmë të pranojnë këtë kapitullim pa kushte të Bashkisë Tiranë, që bredh nëpër ekrane duke lypur para, dhe jemi këtu sot për të kundërshtuar fort dy vendimet, si tërësisht jo-demokratike dhe në dëm të qytetarëve.
Për transportin urban ne kërkojmë:
1. Të anulohet rritja e çmimit të biletës dhe aboneve.
2. Të bëhet falas për të gjithë njerëzit në nevojë akute, duke u shtuar përfituesve aktualë edhe studentët, të papunët, të punësuarit me pagë minimale dhe anëtarët e familjeve që marrin ndihmë ekonomike.
3. Të përmirësohet cilësia e shërbimit, veçanërisht në numër pasagjerësh për autobus dhe shpejtësia e transportit.
4. Bileta të jetë e vlefshme për përdorim brenda një kufiri kohor, jo të bëhet e pavlefshme sa herë ndërrohet autobusi.
5. Të bëhen transparente kostot dhe fitimet e këtij shërbimi.
6. Të përmirësohen kushtet e punës për punonjësit e këtij shërbimi.
Për koncesionin e Parkingjeve nëntokësore, kërkojmë :
1. Anulimin e këtij koncesioni, shumë larg kërkesave dhe nevojave të komunitetit duke e konsideruar thjesht si pjesë e vazhdimësisë së masakrës urbane dhe trajtimit të pronës publike si plaçkë për t`u tregtuar.
2. Ndërtimin e një strategjie policentrike, me infrastruktura lehtësuese në pikat hyrëse të qytetit, ku transporti publik miqësor ndaj ekosistemit, të luajë rol qendror.
3. Fillimin e konsultimeve me publikun, komunitetin, dhe aktorët e interesit për Planin e Ri të Qytetit të Tiranës, që do japë zgjidhje afatgjatë për problemet që vuan Tirana.
4. Nëse Bashkia është e bindur që parkingjet nëntokësore nëpër zona të gjelbërta të qytetit janë zgjidhja më e mirë për qytetin dhe shkojnë në përputhje me interesat e qytetarit, ne kërkojmë që vendimin ta kalojë në referendum dhe të marrë mendimin e qytetarëve të Tiranës, dhe jo të përfundojë në groteskun e përkthimit të votës në konsesus për tërë çmenduritë e tyre.
Qytetarët e Tiranës refuzojnë të trajtohen si klientë apo turistë të rastit në qytetin që ecin përditë. Ne besojmë se pjesëmarrja në administrimin e burimeve ekonomike të qytetit në radhë të parë është një e drejtë nga e cila asnjë nga ne nuk ka ndër mend të heqë dorë.
PËR BILETËN, PËR PARQET, KUNDËR KONCESIONEVE
