13/02/2015
Mëngjesi Krijues 3
“Creative Mornings Tirana” në bashkëpunim me SHLUJ “Universitetin Marin Barleti” dhe Qendrën rinore “Youth ACT”, organizojnë në 20 shkurt, ora 9:30, në Cirkun Kombëtar, leksionin e radhës, që për muajin shkurt ka temën “KLIMA”. 15-20 vullnetarë do të vendosen në formë rrethore në skenë, në mënyrë që ligjëruesi që në këtë rast do të jetë arkitektja Pezana Rexha të ketë mundësi të shprehë idetë e veta mbi temën.
Shkurti i kushtohet ndikimit të mjedisit mbi si, çfarë dhe pse krijojmë. Nga nuancat e kulturës, në vendin e punës deri në gjendjen e ardhshme të planetit. Folësit e të gjitha vendeve organizatore do të ndajnë me të pranishmit aventurat e tyre mbi krijimtarinë, kaosin dhe punën në ekip.
Po masim temperaturën e vendeve tona këtë muaj duke u zhytur në atmosferën e 100 kapitujve (vendeve pjesëmarrëse) në të gjithë botën, të prezantuara nga MailChimp. Tema është zgjedhur nga kapitulli Ottawa i Kanadasë dhe ilustruar nga i talentuari Dave Arnold.
Pezana, diçka rreth mënyrës së trajtimit të temës:
"Zakonisht, kur na ftojnë të marrim pjesë në një leksion të hapur, na është bërë e zakonshme të shohim dikë duke referuar në një mënyrë shume profesionale dhe specifike mbi temën, por që për pjesën më të madhe të njerëzve, kjo mënyrë bëhet shumë e mërzitshme. Kur m’u kërkua të ligjëroja mbi temën në fjalë “Klima” çka është edhe një nga gjërat e mia më të rëndësishme, menjëherë nisa të reflektoj mbi atë se çfarë mund të them! Duhet të flas rreth numrave dhe gjithçka tjetër, për të cilën kushdo nga ne me pak kërkime do të mund të gjente material, apo duhet të ndërveproj me audiencën?
Por nga ana tjetër tema e muajit në "Creative Mornings" Tirana të muajit shkurt ka lidhje me ndryshimin e pozitës sonë në raport me natyrën, klimën dhe përballjen me realitetin.
Çdo gjë do të jetë filozofike dhe asgjë s’do të përjashtohet. Njerëzit do jenë Mjedisi dhe Dielli do të jetë Ne. E vetmja mënyrë për të kuptuar dëmet mjedisore është ta provosh në kurriz ashtu siç e ndjen edhe klima kur njerëzit nuk i mendojnë pasojat e veprimeve të tyre. Çdo gjë tjetër që do të ndodhë në atë 25 minutash të “Mëngjesit Krijues 3” është surprizë të cilën do të duhej të vinit dhe ta zbuloni vetë duke u bërë pjesë e saj.
