Gjuha shqipe për të gjithë

TRI urime dhe NJË falënderim (që i shkruajmë gabim)

(Faleminderit për komentet, reagimet dhe shpërndarjet!)

1. "U preftë në paqe" apo "u prehtë në paqe"?
a)
"U preftë" është mënyra dëshirore e fjalës "pritem" (me thikë, brisk etj.), veta e tretë njëjës (ai/ajo).

b)
"U prehtë" është mënyra dëshirore e fjalës "prehem", veta e tretë njëjës (ai/ajo), koha e tashme. Do të thotë të pushosh, të qëndrosh në prehje, në moslëvizje, në qetësi, në paqe, në gjendje ku nuk ka trazime dhe shqetësime.

☛ Prandaj, shprehja "U preftë në paqe!" është mallkim.

Po urojmë që i ndjeri (jo "i ndieri") të pritet copa-copa me thika dhe brisqe.

Kemi ndër mend një urim a një lutje të mirë, por përfundojmë duke e mallkuar atë që ka ndërruar jetë.

Sigurohuni që fjala që shkruani të ketë "h" dhe jo "f". Për t'i mbajtur mend më lehtë, përfytyroni si më poshtë:
♦ "F"-ja i ngjan thikës, që nënkupton prerjen.
♦ "H"-ja i ngjan kolltukut (divanit), që nënkupton pushimin dhe paqen.

2. "Mirë se vini!" apo "Mirësevini!"?
Shkruhet ndaras!

Shkruhen ndaras edhe këto variante:
♦ Mirë ardhshi!
♦ Mirë se erdhët!
♦ Mirë se të na vini!
♦ Mirë se të na vijë! (ai/ajo)

3. "Kalo mirë!" apo "kalofsh mirë!"?
"Kalo" është mënyra urdhërore e foljes "kaloj", veta e dytë njëjës (ti). Nënkupton urdhër.

☛ T'i thuash dikujt "Kalo mirë!" do të thotë ta urdhërosh që të kalojë mirë, a thua se ai nuk ka qejf të kalojë mirë dhe pret urdhrin tënd!

Trajtat e sakta janë:
♦ "Kalofsh mirë!" (ti) dhe jo "T'ia kalosh mirë!"
♦ "Kalofshi mirë!" (ju) dhe jo "T'ia kalojnë mirë!"
♦ "Kaloftë mirë!" (ai/ajo) dhe jo "T'ia kalojë mirë!"
♦ "Kalofshim mirë!" (ne) dhe jo "T'ia kalojmë mirë!"

Kjo sepse trajtat me lidhoren (të bësh diçka) kanë ngjyresë urdhërimi (kjo shprehet me idenë "është e udhës të bësh diçka") dhe jo dëshire ose urimi.

4. "Falemnderit!" apo "Faleminderit!"?
Të dyja. Varet kush flet dhe kujt i drejtohet.
♦ Të falem nderit! (unë ty)
♦ Të falemi nderit! (ne ty)
♦ Ju falem nderit! (unë juve)
♦ Ju falemi nderit! (ne juve)
Por: Faleminderit! (si lokucion)
▬▬▬
[Marrë me shënime nga "Manuali i Jonisit për përkthimin"]

Sa bukur!

Fjalori i madh i gjuhës shqipe, nga sot, online për përdoruesit nga Akademia e Shkencave e Shqipërisë,
Nga dita e hapjes, për një periudhë nëntëmujore mblidhen mendime, sugjerime e plotësime për përmirësimin e Fjalorit.

Pas kësaj periudhe, Redaksia e Fjalorit dhe Koordinatori Teknik, brenda një afati tremujor, pasqyrojnë gjithë sugjerimet e mbledhura.

***
Për "Fjalorin e madh të gjuhës shqipe" punoi një ekip i gjerë hartuesish, redaktorësh dhe korrektorësh, nën drejtimin e Akademik Jani Thomait si kryeredaktor dhe dy zëvendëskryeredaktorëve, Akademik Valter Memishaj dhe Prof. Dr. Shezai Rrokaj.

Hapi përfundimtar do të jetë shtypi i veprës në dhjetë vëllime vitin që vjen.

Platforma online është konceptuar në mënyrë që lexuesit të ndërveprojnë me fjalorin në të gjitha pajisjet digjitale.

Ky fjalor është domosdoshmëri për shkrimtarët e për publicistët, për shkollarët e për studentët, për mësuesit e për pedagogët, për studiuesit e për këdo që merret me përdorimin e kultivimin e gjuhës amtare.

Ai u vjen në ndihmë gjithë atyre që merren veçanërisht me gjuhën e shkruar, por edhe të folur, me krijime e me përkthime, me hartimin e fjalorëve të tipave të ndryshëm etj.

Marrë me shkurtime nga Akademia e Shkencave të Shqipërisë.

https://fjalori.online/

Fjalor i Madh i Gjuhës Shqipe - Akademia e Shkencave e Shqipërisë - Online - 2026 Fjalori shqip, Fjalor i gjuhës shqipe, Fjalor i Madh i Gjuhës Shqipe 2026, versioni online, projekt kombëtar, botim zyrtar nga Akademia e Shkencave e Shqipërisë me afro 120 mijë fjalë: fjalë, kuptime, sinonime, antonime, shprehje frazeologjike, fjalë të urta, shembuj përdorimi, akronime, ...

Ju lumtë!

Disa fjalë që shqiptohen e shkruhen gabim
Gjuha shqipe pa gabime