Shkolla „Sami Frashëri“ çeli rrugën e dijes në vitin shkollor 1962-1963 e shkëputur nga shkolla 11-vjeçare „10 Korriku“. Shumë vite më vonë, më 1997, kur Shqipëria po kalonte ditë të vështira, Z.Edi Pinguli dhe skulptori i popullit Z.Kristaq Rama, i dhuruan shkollës bustin e rilindasit Sami Frashëri. Në vitet e para funksionoi si shkollë 11-vjeçare me 800 nxënës dhe me një numër të vogël mësuesish, ndërsa më vonë u cilësua si shkollë e mesme. Nga viti në vit rritej jo vetëm numri i nxënësve, por edhe numri i mësuesve. Shkolla ndër vite ka patur një trupë mësimore të kualifikuar e me kërkesë të lartë llogarie në të gjithë procesin mësimor edukativ, gjë që manifestohet në rezultatet që arrijnë vetë nxënësit e shkollës “Sami Frashëri”. Nxënës të shkollës kanë marrë pjesë në olimpiadat kombëtare, ku kanë fituar çmime të para, të dyta e të treta në matematikë, fizikë e kimi dhe kanë përfaqësuar vendin në olimpiada ballkanike, ku janë nderuar me çmime; kanë konkuruar me dinjitet për të fituar vende në kolegjet e Europës së Bashkuar. Në shkollë funksionon dhe “Klubi i Karrierës”, i cili ndihmon nxënësit për të zgjedhur drejtimin në jetë sipas aftësive që ata zotërojnë. Solidarizimi me ata që ndodhen në vështirësi po bëhet moto e nxënësve tanë. Kështu, në vitet 1999, kur ndaj shqiptarve të Kosovës po ushtrohej një genocid i tmerrshëm, nxënësit tanë ndihmuan moralisht dhe materialisht vëllezërit e tyre. Gjithashtu, në ditën e tolerancës zhvillohen aktivitete të ndryshme, ku nxënësit mendojnë edhe për ata që nuk kanë mjete të mjatueshme për jetesën, për fëmijët e braktisur, aktivitete këto, të kryera në bashkëpunim me Kryqin e Kuq. Në trupën mësimore ka mësues që janë autorë dhe bashkëautorë tekstesh, apo të tjerë që ndajnë eksperiencat e tyre në buletinet ISP. Nga bankat e shkollës kanë dalë njerëz të shquar në politikë e art, shkencë, arsim dhe sport, ekonomistë e biznesmenë, që kanë lënë dhe vazhdojnë të lënë gjurmë në kujtesën e popullit. Një falenderim i veçantë shkon për secilin prej 18 drejtorëve të shkollës sonë në të kaluarën dhe për çdo anëtar të stafit pedagogjik, që kanë punuar kaq fort për ta bërë „Sami Frashëri“-n shkollën që është sot: shkollë që numëron 1593 nxënës dhe 83 mësues, secili me të paktën mbi 10 vite eksperiencë pune; shkollë që gjithmonë renditet mes më të mirave në Shqipëri.
