Departamenti Kimi Industriale

Java e praktikës të studentëve të Inxhinierisë Kimike, Universiteti i Tiranës.

Në kuadër të programit të studimit Bachelor “Inxhinieri Kimike”, studentët e Departamentit të Kimisë Industriale, Universiteti i Tiranës po zhvillojnë një praktikë profesionale pranë Laboratorit të Kërkim Zhvillimit për Materialet e Ndërtimit, në kompaninë Berdica Cement, një nga kompanitë lider në industrinë e materialeve të ndërtimit në Shqipëri.

Bashkëpunimi përfaqëson një model të suksesshëm të lidhjes së universitetit me industrinë, duke krijuar mundësi konkrete për zhvillimin profesional të studentëve dhe përgatitjen e tyre si inxhinierë të së ardhmes.
Investimi në formimin praktik të studentëve është investim në inovacion, teknologji dhe zhvillimin e industrisë shqiptare.

Njihuni me Sarën, studenten tonë të masterit, e cila po kryen mobilitet Erasmus në fushën e Inxhinierisë Kimike pranë Departamentit të Inxhinierisë Kimike në Universitetin e Valladolid, Spanjë.

Sara po zhvillon një studim mbi transformimin biologjik të amoniakut në nitrat natriumi (NaNO₃) nëpërmjet një biofiltri me rrjedhje të vazhdueshme (trickling biofilter).

Kërkimi synon të vlerësojë efikasitetin e proceseve biologjike në trajtimin e komponimeve azotike dhe të kontribuojë në zhvillimin e teknologjive të qëndrueshme për trajtimin e rrymave të ndotura dhe mbrojtjen e mjedisit.

Njihuni me Eldën, studenten tonë që po kryen mobilitet Erasmus në kuadër të realizimit të temës së diplomës në fushën e Inxhinierisë Kimike, pranë Departamentit të Inxhinierisë Kimike në Universitetin e Valladolid, Spanjë.

Elda po zhvillon një studim mbi ndikimin e nanogrimcave në prodhimin e pigmenteve gjatë procesit të përmirësimit fotosintetik të biogazit.

Ky kërkim synon të sjellë njohuri të reja mbi përdorimin e nanoteknologjisë për rritjen e efikasitetit të proceseve të pastrimit të biogazit dhe prodhimin e bioprodukteve me vlerë të shtuar.

U zhvillua me sukses mbrojtja publike e disertacionit të Maria Hoxhaj, nën udhëheqjen shkencore të Prof. Dr. Ilirjana Boci, me temë:

“Eco-Çimento: Studim mbi Përdorimin e Materialeve Alternative Suplementare Çimentuese”

Ky kërkim shkencor u fokusua në vlerësimin e potencialit të materialeve alternative suplementare çimentuese për prodhimin e eco-çimentos, me synim reduktimin e ndikimit mjedisor të industrisë së ndërtimit, uljen e emetimeve të CO₂ dhe promovimin e përdorimit të materialeve më të qëndrueshme.

Punimi përbën një kontribut të rëndësishëm në fushën kërkimore-shkencore të Inxhinierisë Kimike dhe një vlerë të shtuar për departamentin tonë, duke forcuar më tej cilësinë e kërkimit shkencor dhe programit të studimit.

I urojmë Dr. Maria Hoxhaj suksese të mëtejshme në veprimtarinë e saj akademike dhe profesionale.

Departamenti i Kimisë Industriale, në kuadër të aktivitetit “Open Day” të organizuar në gjimnazin Besnik Sykja, Tiranë, zhvilloi një takim informues me nxënësit dhe maturantët e këtij institucioni.

Gjatë aktivitetit, pjesëmarrësit u njohën me programet e studimit Bachelor në:
=> Inxhinieri Kimike
=> Inxhinieria dhe Kimia e Ushqimeve,
si dhe me programet e studimeve Master që ofron departamenti.
Gjithashtu, u prezantuan mundësitë e zhvillimit profesional dhe perspektivat e punësimit, brenda dhe jashtë vendit.

Përfaqësuesit e departamentit ndanë me të pranishmit eksperienca nga jeta akademike dhe universitare, duke prezantuar projektet kërkimore, aktivitetet laboratorike, si dhe mundësitë e përfshirjes së studentëve në kërkimin shkencor dhe në bashkëpunime kombëtare e ndërkombëtare.

Ky takim krijoi një hapësirë të vlefshme komunikimi mes universitetit dhe maturantëve, duke i njohur ata më nga afër me ofertën akademike, aktivitetin shkencor dhe perspektivat profesionale që ofron fusha e inxhinierisë kimike dhe teknologjisë ushqimore në tregun bashkëkohor të punës.

🎓 NJOFTIM – OPEN DAY 2026 🎓

Maturantë dhe të interesuar,

Ju ftojmë të merrni pjesë në “Open Day 2026”, organizuar nga Fakulteti i Shkencave të Natyrës.
Data 6 Maj 2026
Ora 12:00-16:00

Në këtë ditë të veçantë, ju mirëpresim të vizitoni stendën e Departamentit të Kimisë Industriale.

Gjatë aktivitetit do të keni mundësi të:
• Njiheni me programet e studimit që ofron departamenti
• Vizitoni nga afër ambientet dhe laboratorët e pajisur me kushte bashkëkohore
• Takoni stafin akademik dhe të merrni informacion të detajuar për programet e studimit
• Bisedoni me studentë aktualë dhe të njiheni me përvojën e tyre
• Informoheni mbi mundësitë e karrierës që ofrojnë këto programe
• Mësoni rreth praktikave mësimore dhe mundësive për internship

Ky është një rast i shkëlqyer për të eksploruar Departamentin e Kimisë Industriale dhe për të orientuar të ardhmen tuaj akademike dhe profesionale.

Ju mirëpresim!

Gëzuar Ditën e Tokës!

Inxhinierët kimistë luajnë një rol kyç në Ditën e Tokës duke zhvilluar sisteme të qëndrueshme, kimi të gjelbër dhe teknologji që mbrojnë planetin, zvogëlojnë ndikimin mjedisor dhe menaxhojnë burimet në mënyrë efikase.
Ata adresojnë drejtpërdrejt sfida si ndotja dhe ndryshimet klimatike përmes proceseve inovative dhe administrimit mjedisor.

Diskutim i frytshëm mbi industrinë e çimentos dhe rëndësinë e saj në zhvillimin ekonomik. Një vëmendje e veçantë iu kushtua edhe ndikimit në mjedis dhe sfidave për një industri më të qëndrueshme në të ardhmen!


Fakulteti Shkencave Të Natyrës
Eglantina Kalluçi