Shkolla "Atë Pjetër Meshkalla" - faqja zyrtare

10/09/2026

Në ditën e dytë të formimit u njohëm më shumë me JECSE – rrjetin europian të shkollave jezuite, që bashkon shkolla nga mbi 20 vende për të ndarë praktikat më të mira, për të bashkëpunuar dhe për të rritur cilësinë e edukimit në frymën injaciane.

Përmes punëve në grupe reflektuam mbi vizionin si mund të integrohet edhe më shumë realiteti i shkollës sonë në këtë rrjet. Jo për të humbur identitetin tonë, por për ta pasuruar atë – duke ofruar përvojën dhe veçantitë tona, ndërsa mësojmë nga eksperiencat e shkollave të tjera.

Sepse edukimi injacian na kujton se rritemi më shumë kur ecim së bashku, në unitet, duke respektuar pasurinë e dallimeve tona.

09/09/2026

09/09/2026

Ditën e djeshme patëm kënaqësinë e veçantë të mirëprisnim në shkollën tonë Agnieszka Baran, Drejtoreshë e Rjetit të Shkollave Jezuite në Evropë JECSE .

Prania e saj i dha një vlerë të veçantë trajnimit tonë institucional mbi Safeguarding (mbrojtjen dhe sigurinë e fëmijëve), duke na lidhur me standardet më të mira evropiane.

​Seanca u drejtua nga Referentja për Mbrojtjen e Fëmijëve, Estela Pemaj, e cila udhëhoqi stafin arsimor përmes një procesi dinamik dhe ndërveprues të fokusuar te krijimi i një mjedisi sa më të sigurt për nxënësit tanë:

​Eksplorimi i Etikës & Rregullave: Rishikimi i udhëzimeve tona për sjelljen dhe mbrojtjen e të miturve.

​Ushtrimet nga përvoja: Të kuptuarit se si ndikojnë veprimet e përditshme te siguria dhe mirëqenia e fëmijës.

​Ushtrimet e Bashkëpunimit & Rastet: Zhvillimi i ushtrimeve të ndryshme interaktive në grup për të fuqizuar frymën e skuadrës dhe për të trajtuar situata konkrete nga jeta shkollore.

Siguria, dinjiteti dhe mirëqenia e çdo nxënësi mbeten gjithmonë prioriteti ynë kryesor.

Falënderojmë përzemërsisht të gjithë stafin për angazhimin dhe përkushtimin e treguar!

05/09/2026

5 Shtator – Shenjtërimi i Shën Nënë Terezës

Sot kujtojmë Shën Nënë Terezën, e cila na mëson se dashuria e vërtetë shprehet në gjestet e vogla të përditshme.

“Çfarë mund të bësh për të promovuar paqen në botë? Shko në shtëpi dhe duaje familjen tënde.” — Shën Nënë Tereza

02/09/2026

NJOFTIM MBI BLERJEN E LIBRAVE DHE PËRFITIMIN E LIBRAVE FALAS!

Bashkëngjitur do të gjeni listën e teksteve shkollore për vitin shkollor 2026–2027, për klasat e 11-ta dhe 12-ta.

Ju njoftojmë se blerja e librave do të bëhet në pikat e caktuara të qytetit, në libraritë:

* Gogaj – tek Çinari (përballë Muzeut "Oso KUKA" )

* Ora e Shkodrës – tek Ura Dervishbeg

Për nxënësit që janë në kategoritë e mëposhtme, janë përfitues të librave falas nga shkolla për vitin shkollor 2026–2027:

a) kanë përfituar statusin e jetimit;

b) vijnë nga familje të cilat trajtohen me ndihmë ekonomike dhe pagesë papunësie nga zyrat e punësimit;

c) janë me aftësi të kufizuara, sipas ligjit nr. 52/2019, “Për asistencën sociale në Republikën e Shqipërisë”;

d) vijnë nga familje që kanë në përbërjen e tyre anëtarë me aftësi të kufizuara, të lindur ose të bërë të tillë, të cilët deklarohen të paaftë për punë, sipas ligjit nr. 57/2019;

e) vijnë nga familje ku kryefamiljari përfiton pension invaliditeti shteti;

dh) vijnë nga familje ku kryefamiljari përfiton pension pleqërie shteti dhe kanë fëmijë në ngarkim, të cilët janë pa të ardhura;

f) i përkasin kategorisë rome dhe egjiptiane.

Të interesuarit duhet të paraqesin pranë Sekretarisë së shkollës dokumentacionin e nevojshëm (certifikatë familjare dhe një dokument vërtetues të pikave të mësipërme) nga sot, deri ditën e martë, 8 shtator 2026, nga ora 11:00–13:00.

Javën e parë të shkollës, nxënësit përfitues do t’i kenë librat e tyre të shpërndara në shkollë.

KUJDES! Shkolla nuk rimburson faturat e librave që janë blerë.

01/09/2026

Njoftim për prindërit e nxënësve të kl. 10-ta!

Ju kujtojmë se nesër dhe pasnesër, uniformat për nxënësit që do të ndjekin klasën e 10-të janë gati për t'u tërhequr te dyqani Marsey (https://marsey.al/contatto/)

Dyqani është i hapur nga ora 09:00 deri në 21:00. Uniformat do të dorëzohen sipas porosisë së bërë gjatë regjistrimit.

Faleminderit!

31/08/2026

Këtë vit shkollor, bashkësitë tona edukuese të Rrjetit "Gesuiti Educazione" do të udhëhiqen nga motoja:

“E ardhmja është ende për t’u shkruar”— Papa Leoni XIV

E frymëzuar nga Isaia 43,19 – “Ja, unë po bëj një gjë të re; a nuk e vini re?” – kjo temë na fton të shohim të ardhmen me sytë e shpresës: jo si një iluzion apo një ëndërr të largët, por si një realitet që ndërtohet çdo ditë, me zgjedhjet, përkushtimin dhe vullnetin tonë.

Për nxënësit tanë, kjo është një ftesë për të besuar në talentet e tyre, për të mos pasur frikë nga fillimet e reja dhe për të kuptuar se e ardhmja nuk pritet vetëm, por shkruhet së bashku.

31/07/2026

Sot kremtojmë festën e Shën Injacit të Lojolës, themeluesit të Shoqërisë së Jezusit.

Çfarë do të thotë sot të ndjekim shembullin e tij?

Do të thotë të mësojmë ta shohim jetën me thellësi, të kërkojmë të mirën në çdo situatë dhe ta jetojmë çdo përvojë si një mundësi për t’u rritur.

Ftesa e tij për të "kërkuar dhe gjetur Hyjin në të gjitha gjërat" vazhdon të frymëzojë misionin tonë edukativ: të formojmë të rinj kompetentë, të lirë, të përgjegjshëm dhe të gatshëm t’i vënë talentet e tyre në shërbim të të tjerëve.

Gëzuar Festën e Shën Injacit!

21/07/2026

NJOFTIM!

Orari i sekretarisë gjatë verës!

Ju njoftojmë se sekretaria e shkollës do të jetë e hapur deri më 30.07.2026, për t'u rikthyer në shërbim më 24.08.2026.

V.O. – Nëse do të ketë njoftime nga Ministria e Arsimit për data të reja të A1Z, sekretaria do të funksionojë vetëm për këtë shërbim.

Faleminderit!