ZVAP Kuçovë. Shkolla 9- vjeçare “Gaqi Karakashi”

18/09/2026

Ka diçka magjike në këtë video: fëmijëria që takohet me librin, kureshtja që sapo ka nisur të hapë krahët dhe një botë e tërë që pret të zbulohet.
Një libër mbi tjetrin, një buzëqeshje mes tyre… dhe një botë e tërë që sapo ka nisur.
Kështu janë fëmijët e klasës së parë: të vegjël në moshë, por me ëndrra të mëdha në zemër.
Sot ata mund të jenë ende duke mësuar shkronjat, duke shkruar fjalët e para e duke zbuluar faqet e para të librave.
Në çdo buzëqeshje të tyre ka pafajësinë e fëmijërisë, në çdo libër ka një aventurë dhe në çdo hap të vogël fshihet një e ardhme e madhe.
Uroj që rruga juaj të jetë gjithmonë plot libra, dritë, dashuri dhe ëndrra që bëhen realitet.

Sepse çdo histori e madhe nis me një faqe të parë… dhe kjo është faqja juaj.

14/09/2026

Një ditë e parë plot emocione… 💫

Sot shkolla jonë priti nxënësit në ditën e parë të saj.

Dita e parë ishte një përzierje e bukur gëzimi dhe ndrojtjeje. Por, askush nuk e përjetoi këtë ditë më fort se vogëlushët e klasave të para. Për ta, sot nuk ishte thjesht një ditë shkolle, ishte hapi i parë drejt një bote të re. Me çantat e mëdha mbi supe, duart e vogla që kërkonin dorën e prindit dhe sytë plot kureshtje, ata nisën një udhëtim të ri.
Edhe për prindërit, kjo ditë kishte emocionet e veta. Të shihje fëmijën tënd duke hyrë për herë të parë në klasë, ta lëshoje dorën e tij dhe ta shihje të bënte hapat e parë drejt klasës ku do të ulet për një vit rresht, por dhe në vitet në vazhdim, është një moment që nuk harrohet lehtë.
Në klasat e tyre, nxënësit u njohën me rregullat e shkollës dhe të klasës, me detyrat, përgjegjësitë dhe të drejtat e tyre. Sepse çdo fillim i bukur ka nevojë edhe për rregulla që na ndihmojnë të mësojmë, të respektojmë dhe të rritemi së bashku.

Sot nuk ishte vetëm dita e parë e një viti të ri shkollor.
Ishte dita e parë e shumë kujtimeve që do të krijojmë së bashku gjatë këtij viti. Sot u shkrep fotoja e parë, fotoja ku nisin gjurmët e një rrugëtimi, që më mirë se një foto, nuk e mban gjallë në memorien e gjithsecilit.
Buzëqeshni sot, që nesër të buzëqeshni kur ta shikoni atë buzëqeshje. Kujtimet e bukura ia vlen t'i ruash në një buzëqeshje të dlirë në një foto.

Mirë se erdhët, fëmijë të dashur! Mësim të mbarë! 📚

13/09/2026

🔔 Nesër dyert e shkollës do të hapen sërish dhe bashkë me to do të mbushen korridoret me buzëqeshje dhe zëra fëmijësh.

Mirë se të vini, nxënës të dashur! 🧑‍🎓

Qoftë një vit i mbarë, plot dije, miqësi, harmoni!
Të dashur prindër, faleminderit që na besoni gjënë më të çmuar: fëmijët tuaj. Le të ecim së bashku për t'i mbështetur në çdo hap të rrugëtimit të tyre.

Nesër fillon një kapitull i ri me mundësi dhe histori të bukura për t'u shkruar, sidomos për më të vegjëlit, nxënësit e klasës së parë. Qofshin hapat tuaj të parë në shkollë të lehtë dhe të merrni shumë emocione dhe dashuri ❤️.

Qoftë një vit i mbarë, i suksesshëm për të gjithë! 📚

03/09/2026

📢 Njoftim 📚

Nesër, data 04. 09. 2026, nis në shkollë shpërndarja e librave për të gjitha klasat, nga 1-9.

📚 Jeni të mirëpritur!
Nga ora 8:00 - 13:00.

05/07/2026

🔔NJOFTIM
MBI REGJISTRIMIN E NXËNËSVE PËR KLASËN E PARË!

Të nderuar prindër,
🗓 Nesër, në datën 6 korrik, fillon regjistrimi i nxënësve në klasën e parë për vitin shkollor 2026 - 2027

❗️Në klasën e parë regjistrohen fëmijët që, deri në datë 31.12.2026, mbushin moshën 6 vjeç.
❗️Regjistrimi bëhet vetëm përmes aplikimit online në e-Albania
❗️Aplikimi për regjistrim kryhet nga prindi, ose personi që ka kujdestarinë ligjore.

Hapat për regjistrimin janë :
1. Identifikohuni si qytetar në portalin e-Albania;
2. Zgjidhni shërbimin “Arsimi” pastaj "Regjistrimi në klasë të parë";
3. Klikoni butonin "Përdor" dhe më pas “Aplikim i ri”
4. Plotësoni formularin e aplikimit dhe klikoni "Dërgo";
🟢 Aplikimi mbërrin në shkollë ku fillon procedura për trajtimin e kërkesës.
🟡 Në qoftë se çdo gjë është në rregull, shkolla regjistron nxënësin.

Për çdo paqartësi, na kontaktoni!

DREJTORIA E SHKOLLËS

18/06/2026

Sukses që na bën krenarë! 🎓📚

Në provimet e VANAF-it për klasat e pesta, të zhvilluara gjatë muajit maj, nxënësit e shkollës sonë arritën rezultate shumë të mira, duke dëshmuar nivelin e lartë të përgatitjes dhe seriozitetin e tyre në mësime.
Puna, përkushtimi dhe përpjekjet e nxënësve japin gjithmonë frytet e tyre.
Një urim i veçantë shkon për nxënësin Alteo Gjika, i cili arriti të marrë pikët më të larta ndërmjet të gjitha shkollave të qytetit të Kuçovës. Po kështu, urojmë dhe nxënësit David Koxhaj, Iris Shaholli, Amelia Bega, Roel Gëzhillli, Frenki Lezo, Noel Zhopi etj, të cilët, edhe këta, arritën rezultate të larta. Ky rezultat i shkëlqyer është një shembull frymëzues për të gjithë bashkëmoshatarët e tij dhe një krenari e madhe për shkollën tonë.

Përgëzojmë Alteon, nxënësit e klasës së pestë, mësuesen dhe prindërit për këtë arritje të rëndësishme dhe u urojmë suksese të mëtejshme në rrugëtimin e tyre të dijes! 👏🏆

11/06/2026

Cikli shkollor vazhdon, duke sjellë me vete ëndrra, buzëqeshje dhe sfida të reja. Ndërsa disa nxënës rriten dhe hedhin hapa drejt etapave të reja të këtij cikli, të tjerë nisin për herë të parë rrugëtimin e tyre në shkollë e bëhen pjesë e tij. Për nxënësit e klasës së parë, çdo gjë është e re: banka, shokët, mësuesit dhe emocionet e para të të mësuarit.
Ne jemi këtu për t’i pritur me dashuri, për t’u dhënë siguri në hapat e tyre të parë dhe për t’i shoqëruar në çdo sukses, sfidë dhe kujtim të bukur që do të ndërtojnë gjatë viteve të shkollës bashkë me ne.

11/06/2026

08/06/2026

Mirupafshim, klasë e 5-të! Mirë se vjen klasa e 6-të! Urime të gjithë nxënësve për këtë arritje dhe suksese në rrugëtimin e ri shkollor! 📚🎓