Universiteti i Elbasanit, "Aleksandër Xhuvani"- Faqja Zyrtare

📢 Thirrje për prezantime shkencore!

Universiteti i Elbasanit “Aleksandër Xhuvani” ju fton të bëheni pjesë e konferencës ndërkombëtare “Alternative Finance, Social Economy, and Inclusive Development”, organizuar në kuadër të projektit Erasmus+ Fin4Good – Educational Pathway to Applied Microfinance.

Konferenca do të zhvillohet më 11 dhjetor 2026 në Bolonjë, Itali, me pjesëmarrje fizike, dhe organizohet nga Alma Mater Studiorum – Università di Bologna në bashkëpunim me partnerët ndërkombëtarë, përfshirë Universitetin e Elbasanit.

📌 Temat kryesore përfshijnë:
• mikrofinancën dhe përfshirjen financiare
• financën sociale dhe investimet me ndikim
• sipërmarrjen sociale dhe inovacionin
• zhvillimin gjithëpërfshirës

📝 Afati i dorëzimit të abstrakteve: 30 shtator 2026
📄 Abstrakti i zgjeruar: deri në 1000 fjalë
✅ Nuk aplikohet tarifë pjesëmarrjeje

Për më shumë informacion dhe udhëzimet e aplikimit, klikoni linkun : https://fin4good.eu/call-for-papers/

📚 Biblioteka e Universitetit "Aleksandër Xhuvani", një hapësirë ku dija takohet me traditën dhe teknologjinë.

Me një fond prej rreth 90.000 njësish bibliotekare, Biblioteka Qendrore ofron një pasuri të gjerë librash, periodikësh, revistash shkencore, disertacionesh, hartash dhe materialesh audio-vizuale, duke mbështetur studimin, kërkimin shkencor dhe zhvillimin akademik.

📖 Ndër thesaret e saj ruhet edhe libri më i vjetër i fondit, që daton në vitin 1783, ndërsa biblioteka vijon të modernizohet përmes katalogut online, digjitalizimit të literaturës dhe shërbimeve elektronike, duke e bërë informacionin më të aksesueshëm për studentët, pedagogët dhe studiuesit.

Përmes platformës U-Library dhe katalogut online, komuniteti universitar ka mundësi të aksesojë literaturën në çdo kohë, ndërsa biblioteka mirëpret edhe maturantë, studiues dhe vizitorë të interesuar për të njohur nga afër pasurinë e saj dhe jetën akademike në universitet.

Zbuloni një nga hapësirat më të rëndësishme të Universitetit "Aleksandër Xhuvani", aty ku çdo faqe e lexuar është një hap më pranë dijes.

Investo në të ardhmen tënde. Ne jemi pranë teje! 🚀

Një universitet nuk është vetëm auditori, por është hapësira ku mëson, krijon, bashkëpunon dhe ndërton të ardhmen tënde.

Në Universitetin "Aleksandër Xhuvani", studentët zhvillojnë njohuritë dhe aftësitë e tyre në ambiente të përshtatura për mësim, praktikë dhe aktivitet universitar.

📚 Bibliotekë universitare
🧪 Laboratorë mësimorë dhe kërkimorë
💻 Salla informatike të pajisura
🏋️ Palestër dhe ambiente sportive
🎓 Auditorë dhe hapësira moderne për zhvillimin e procesit mësimor

Çdo hapësirë është krijuar për të mbështetur përvojën universitare dhe për t'u ofruar studentëve kushtet e nevojshme për të mësuar, eksploruar dhe zhvilluar potencialin e tyre.

Investo në të ardhmen tënde. Ne jemi pranë teje! 🚀

🎓 Zyra e Këshillimit të Karrierës dhe Alumni në Universitetin "Aleksandër Xhuvani" është pranë studentëve në çdo hap të rrugëtimit të tyre akademik dhe profesional!

Përmes shërbimeve dhe aktiviteteve të saj, zyra mbështet studentët dhe të diplomuarit për të zhvilluar aftësitë e nevojshme dhe për t’u orientuar drejt mundësive të reja profesionale.

Vizitoni Zyrën e Këshillimit të Karrierës dhe Alumni dhe përfitoni nga:

✅ Këshillim karriere dhe orientim profesional të personalizuar
✅ Mbështetje për hartimin e CV-së dhe letrës së motivimit
✅ Përgatitje për intervista pune dhe zhvillim të aftësive profesionale
✅ Informim mbi praktika profesionale, bursa, projekte dhe mundësi financimi
✅ Workshop-e, seminare dhe aktivitete për zhvillimin personal e profesional
✅ Mundësi rrjetëzimi me Alumni dhe bashkëpunime me institucione e kompani

Gjithashtu, zyra angazhohet në organizimin e aktiviteteve që pasurojnë jetën universitare, duke mbështetur klubet studentore, konferencat, simpoziumet dhe iniciativa të tjera që fuqizojnë zërin dhe përfshirjen e studentëve.

Investo në të ardhmen tënde. Ne jemi pranë teje! 🚀

🎓 Pse të zgjedhësh Universitetin e Elbasanit "Aleksandër Xhuvani"?

Zgjedhja e universitetit nuk është thjesht zgjedhje e një programi studimi, por është pikënisja e një rrugëtimi që të nxit ide, të zhvillon aftësi dhe të hap dyer për të ardhmen!

Në Universitetin e Elbasanit do te gjeni:

1️⃣ Komunitet e mbështetje akademike

Një mjedis ku stafi drejtues dhe akademik është gjithmonë pranë studentëve, duke nxitur pjesëmarrjen në simpoziume, forume e tryeza diskutimi.

2️⃣ Praktikë reale dhe përvojë direkte 🧪⚖️

Nga eksperimentet në laboratorët tanë bashkëkohorë te simulimet profesionale në Klinikën e Ligjit, teorinë e kthen në profesion.

3️⃣ Mundësi ndërkombëtare e certifikime 🇪🇺

Aktivitete, projekte europiane (si EduGame, Erasmus+ e më shumë) dhe trajnime që të pajisin me certifikata e përvojë me standarde ndërkombëtare.

4️⃣ Energji, sport e jetë studentore 🏆

Jeta studentore nuk mbyllet me leksionet, por zgjerohet me shumë me pjesëmarrjen në klube studentore, kampionate dhe aktivite të ndryshme sportive.

5️⃣ Lidhje dhe miqësi për jetën 🤝

Mundësi për t'u bërë pjesë e një komuniteti dinamik studentësh nga e gjithë Shqipëria e më gjerë.

Gati për hapin tënd të radhës?

Zgjidh një diplomë që vlen, në një universitet që të mbështet!

👉 Apliko tani dhe bëhu pjesë e UNIEL!

Universiteti i Elbasanit vijon kërkimin shkencor mbi shëndetin dhe sjelljet e lëvizjes tek fëmijët 3–5 vjeç në Shqipëri

Në kuadër të projektit “Studimi i shëndetit dhe sjelljeve të lëvizjes tek fëmijët 3–5 vjeç në Shqipëri”, pjesë e iniciativës ndërkombëtare SUNRISE (International Surveillance Study of Movement Behaviours in the Early Years), vijon puna për realizimin e matjeve në terren, analizimin e të dhënave dhe ndërtimin e databazës kombëtare mbi shëndetin dhe aktivitetin fizik në fëmijërinë e hershme.

Ekipi i projektit po kryen vlerësime mbi aktivitetin fizik, sjelljet e lëvizjes, parametrat shëndetësorë dhe stilin e jetesës tek fëmijët 3–5 vjeç, duke krijuar një bazë të rëndësishme shkencore për studime të ardhshme dhe për mbështetjen e politikave publike në fushën e shëndetit dhe edukimit.

Projekti drejtohet nga Universiteti “Aleksandër Xhuvani” Elbasan, përmes Fakultetit të Shkencave të Edukimit dhe Departamentit të Edukimit Fizik dhe Sporteve, në partneritet me Shoqatën Shqiptare të Shkencave Sportive (ASSA) dhe me mbështetje financiare nga AKKSHI, në kuadër të Programit Kombëtar për Kërkim dhe Zhvillim (PKKZH).

Rezultatet paraprake të projektit u prezantuan në 20th FIEPS European Congress dhe 5th International Conference on Education, Global Integration and Sport, ku Assoc. Prof. Dr. Edmond Bicoku dhe Dr. Arjan Hyka prezantuan studime mbi zhvillimin fizik, parametrat antropometrikë dhe balancën tek fëmijët parashkollorë.

Një element i rëndësishëm i projektit është edhe përfshirja aktive e studentëve, stafit akademik dhe edukatoreve të kopshteve në procesin kërkimor dhe prezantimet shkencore, duke kontribuar në zhvillimin e kërkimit të aplikuar në Universitetin e Elbasanit.

Hap i ri drejt kërkimit shkencor dhe ruajtjes së kujtesës historike!

Rektorja e Universitetit të Elbasanit, Prof. Dr. Elvira Fetahu, dhe Kryetarja e Autoritetit për Informimin mbi Dokumentet e ish-Sigurimit të Shtetit (AIDSSH), Dr. Gentiana Sula, nënshkruan marrëveshje bashkëpunimi mes dy institucioneve.

Përmes këtij partneriteti, studentët dhe personeli akademik do të kenë qasje në fondin dokumentar të ish-Sigurimit të Shtetit për zhvillimin e kërkimeve, botimeve dhe konferencave shkencore, punimeve të diplomave, si dhe projekteve të ndryshme kërkimore.

Aktivitetet e përbashkëta edukative dhe platformat digjitale do të shërbejnë për ndërgjegjësimin e brezave të rinj mbi të kaluarën dhe të drejtat e njeriut.

Universiteti i Elbasanit "Aleksandër Xhuvani", në një partneritet të ngushtë me UBT, përmbylli me sukses Shkollën Verore dedikuar mësuesve të diasporës. Përgjatë këtij rrugëtimi akademik virtual, rreth 100 mësimdhënës shqiptarë nga vende të ndryshme të botës u bashkuan për të ndarë metodologjitë më bashkëkohore të mësimdhënies dhe për të forcuar misionin e tyre fisnik: ruajtjen e gjuhës dhe kulturës shqipe te brezat e rinj në diasporë.

Jemi krenarë që personeli ynë akademik kontribuon drejtpërdrejt në mbështetjen e këtyre ambasadorëve të gjuhës sonë kudo në botë. Faleminderit të gjithë pjesëmarrësve dhe kolegëve të UBT-së për këtë bashkëpunim me vlerë të lartë akademike e kombëtare!

Universiteti i Elbasanit, zgjeron rrjetin e bashkëpunimit ndërkombëtar: Nënshkruhet marrëveshja me Universitetin e Shumenit në Bullgari.

Rektorja e Universitetit të Elbasanit, Prof. Dr. Elvira Fetahu, dhe Rektorja e Universitetit të Shumenit "Ipeshkëv Konstantin Preslavski", Prof. Dr. Natalia Vitanova, kanë nënshkruar një marrëveshje bashkëpunimi dypalësh gjatë një vizite zyrtare në Bullgari.

Në fokus të këtij partneriteti do të jetë bashkëpunimi i ngushtë në fusha me interes të ndërsjellë, ku vend të veçantë zënë programet e shkëmbimit për studentët dhe personelin akademik. Marrëveshja hap rrugë të reja për zhvillimin e projekteve të përbashkëta në fushën e kërkimit shkencor, realizimin e publikimeve shkencore me impakt ndërkombëtar, si dhe ndërmarrjen e nismave të përbashkëta në mësimdhënie.