21/11/2025
Me rastin e Ditës së Alfabetit, Departamenti i Gjuhës shqipe organizoi në Bibliotekën UAMD, një leksion të hapur me temë: “Gëzuar 22 Nëntorin, festën e Alfabetit të Gjuhës Shqipe”. Aktiviteti u organizua nga Përgjegjësja e Departamentit të Gjuhës shqipe Prof. as. dr. Edlira Abdurahmani, si dhe nën kujdesin e Zv. Rektores së Universitetit, Prof. as. dr. Suela Kastrati. Për mbajtjen e këtij leksioni, nderoi me ardhjen e tij një prej figurave më të shquara të gjuhësisë shqiptare, AKADEMIK EMERITUS, GJOVALIN SHKURTAJ.
Pas përkujtimit të Ditës së Alfabetit i cili u mbajt në Kongresin e Manastirit në datat 14-22 Nëntor 1908, fjala e tij vijoi me respektin ndaj emrit të Universitetit “Aleksandër Moisiu” e më pas me respektin ndaj Dokumentit të parë të shqipes së shkruar “Mesharit” të Gjon Buzukut.
Gjuha jonë, pasuria dhe bukuria e saj e kanë burimin e vet në popull, - theksoi prof. Shkurtaj, duke nxjerrë në pah vlerën e dy kryedialekteve shqiptare të cilat janë sipas tij “si dy degët e një lisi”
Profesori dhe akademiku i nderuar shprehu shqetësimin për problemet e gjuhës shqipe në ditët tona. Gjuha shqipe, - theksoi ai, është tipar themelor i kombit shqiptar, prandaj atë duhet ta ruajmë dhe ta mbrojmë, ta shkruajmë e ta flasim sa më thjeshtë, me saktësi e sa më bukur. Natyrisht edhe ta pasurojmë e ta vlerësojmë ashtu si të gjitha kombet e qytetëruara.
Akad. Shkurtaj theksoi gjithashtu se për ta realizuar këtë nuk mjafton të jesh gjuhëtar, specialist apo ekspert i gjuhës, por për një gjë të tillë rol kyc luan Shqiptaria.
Ai përcolli shqetësimin e tij tek studentët edhe për shqipen në diasporë, duke përmendur vështirësitë me të cilat përballen shqiptarët e diasporës, që sipas studiuesit janë aq të shumtë sa, “po t’u vendosej nga një qeleshe e bardhë shqiptarëve nëpër botë, do të zbardhej e gjithë bota”
Takimi mbyllet me respektin që shqiptarët duhet të tregojnë për gjuhën standarde si dhe me dashurinë për gjuhën shqipe, si simbol, identitet dhe krenari kombëtare.
