افغان سلفي دعوتي صفحه

بې له تحقیقه د کتابونو او مسائلو ردول؛

د سلفو منهج دا و چې په علم، تحقیق او تثبت به یې خبرې کولې. : «إن هذا العلم دين، فانظروا عمن تأخذون دينكم»؛

یعنې: "دا علم دین دی، نو وګورئ چې خپل دین له چا اخلی." همدارنګه د سلفو عادت دا و چې تر څو به یې د یوې مسئلې دلایل، د علماوو اقوال او حقیقت نه و معلوم کړی، په بیړه به یې نه ردوله او نه به یې منله.
نو هغه کسان چې د تحقیق، مطالعې او د اهل علم د خبرو له کتلو پرته یو کتاب، یو عالم یا یوه مسئله په احساساتو او ګمانونو ردوي، دا د سلفو له منهج سره مخالف کار دی. حق دا دی چې انسان باید لومړی تحقیق وکړي، بیا حکم وکړي؛ ځکه بې دلیله ردول د ناپوهۍ او تعصب نښه ده، نه د علم او انصاف.
اســــدالله غالــــب

دحسین رضي الله عنه د شهادت په اړه د نبي ﷺ د خوب روایت:
سلمیٰ وایي: زه د ام المؤمنین ام سلمه رضي الله عنها خدمت ته ورغلم، هغه ژړل. ما وپوښتل: ولې ژاړې؟ هغې وویل: ما رسول الله ﷺ په خوب کې ولید،په سر او ږیره مبارک یې دوړې او خاوره پرته وه. ما عرض وکړ: یا رسول الله! څه درباندې شوي؟ نو رسول الله ﷺ وفرمایل:
«ما همدا اوس د حسین د شهادت صحنه ولیده.»
(سنن ترمذي: 3771)
امام ترمذي دا روایت «غریب» بللی،شیخ الباني او شیخ زبیر علي زئي رح د سند د ضعف له امله دا روایت ضعیف ګڼلی، ځکه په سند کې «سلمیٰ البکریة» کمزوری راوی دی.
اســــدالله غالــــب

ځینی منکرین حدیث دا اعتراض کوی چي کتابونه د حدیثو ټول د فارسیانو لخوا لیکل شوی وو خو نه، دا سمه نه ده چې ټول د فارس (ایران) د خلکو لخوا لیکل شوي وي.

د حدیثو لویو امامانو اصلونه او نسبتونه مختلف دي:
محمد بن إسماعيل البخاري : د بخارا و (اوسنی ازبکستان).
مسلم بن الحجاج النيسابوري : د نیشاپور و (اوسنی ایران).
أبو داود السجستاني : د سجستان و (د افغانستان او ایران ترمنځ سیمه).
محمد بن عيسى الترمذي : د ترمذ و (اوسنی ازبکستان).
أحمد بن شعيب النسائي : د نسا و (خراسان).
ابن ماجه القزويني : د قزوین و (ایران).
همدارنګه نور مشهور محدثین:
مالك بن أنس : د مدینې.
أحمد بن حنبل : د بغداد.
عبد الرزاق الصنعاني : د یمن.
نو حقیقت دا دی چې د حدیثو خدمت د ټول اسلامي امت ګډ میراث دی. عرب، فارس، خراساني، ماوراءالنهر، یمني، مصري او نورو قومونو علماوو پکې برخه اخیستې ده.
البته د حدیثو د تدوینو ډېری مشهور امامان د خراسان، ماوراءالنهر او شاوخوا سیمو (اوسني ایران، افغانستان، ازبکستان، ترکمنستان) څخه وو، خو داپدی مانا نه چې حدیثونه هغوی جوړ کړي دي؛ هغوی د رسول الله ﷺ احادیث راټول، نقد او تدوین کړل. د حدیثو اصل روایت کوونکي صحابه کرام رضي الله عنهم وو چې ډېری یې عرب وو.
اسدالله صافی