23/07/2026
*هلمند کي شاعرانو، لیکوالانو او ترانه ویونکو ته یو ورځنی روزنیز سمینار وړاندي سو.*
نن ورځ یکشنبه، د هلمند ولایت اطلاعاتو او کلتور ریاست د فرهنګ او ګرځندوی امریت له لوري د یاد ریاست اړوند د کلتوري مرکز تالار کي شاعرانو، لیکوالانو او ترانه ویونکو ته یو ورځنی روزنیز سمینار وړاندي سو.
په دې سمینار کي د فرهنګ او ګرځندوی آمر مولوي حیات الله یوسف، د امر بالمعروف ریاست استازي مولوي عبدالرؤف افغاني، د هلمند پوهنتون استادانو پوهنمل حمیدالله حمیدي او پوهنیار نذیراحمد رښتیني، د مرکز لښکرګاه په ګډون د بېلا بېلو ولسوالیو شاعرانو، ترانه ویونکو او لیکوالانو ګډون درلود.
سمینار د قران کریم د څو مبارکو آیتونو په تلاوت کولو سره شروع سو.
پیل کي د فرهنګ او ګرځندوی آمر مولوي حیات الله یوسف د سمینار ګډونوالو ته د ښه راغلاست ترڅنګ د شعر، لیکوالۍ او د ننني سمینار د ارزښت په اړه لنډ معلومات وړاندي کړه.
ورپسې د امر بالعمروف ریاست استازي ښاغلي افغاني د خپلو خبرو پر مهال په اسلام کي د شعر او شاعر پر ارزښت او په ټولنه کي یې پر اړتیا خبري وکړې، ده له ټولو شاعرانو څخه غوښتنه وکړه چي خپله شاعري دي د اسلامي قوانینو په رڼا کي ټولني ته وړاندي کړي تر څو د همدې شعر په برکت په ټولنه کي مثبت تغیر رامنځته سي.
نوموړي زیاته کړه چي شعر د الله تعالی له لوري یو نعمت دی نو باید شاعران وړونه د دې نعمت شکر ادا کړي او هڅه وکړي چي د شعر په واسطه خپل رب جل جلاله له ځان څخه راضي کړي.
په سمینار کي د هلمند پوهنتون استاد ښاغلي حمیدي د شعر پر جوړښت، د شعر پر کیفیت، د شعر پر ډولونو د شاعر پر جوړېدنه او د شعر پر اغیزو او نه اغیزو لرلو باندي مفصل بحث وکړ.
ده له شاعرانو څخه غوښتنه وکړه چي پر خپلو لیکل سویو شعرونو باندي بار بار تمرین وکړي تر څو تاسو د دې جوګه وګرځئ چي ټولني ته یو ښه او صفا شعر وړاندي کړئ او د همدې شعر په برکت زموږ ځوانان او ټولنه په اسلامي فکر سمباله سي.
په سمینار کي د هلمند پوهنتون یو بل استاد پوهنیار ښاغلي رښتیني پر لیکوالۍ او لیکوال خبري وکړې ده وویل: لیکوال د ټولني هغه سترګه ده چي د عامو لیدونکو په توپیر دی احساس، فکر، عاطفه او نوې زاویه پکښي وړاندي کوي. لیکوالي د فطري استعداد ترڅنګ یو خاص هنر او مهارت دئ چي په تکرار او تمرین پخیدلای او پیاوړی کیدلای سي.
همداراز نوموړي زیاته کړه چي ښه لیکوال باید یو فکر تر نورو پوري ورسوي تر څو نور د ده له فکر څخه آغېزمن سي، ده وویل: ښه لیکوال هغه دی چي روښانه او روانه ژبه ولري، ښه ګرامر او املاء وکاروي، موضوع په منظم ډول سر تر پایه وپیي، د باور وړ معلومات وړاندي کړي، د لوستونکو د اړتیا وړ معلومات راټول کړي، لیک نخښي سمي و کاروي، د خپلو لیکونو ژانرونه وپېژني او موضوع لومړی خپله ښه درک کړي بیا لیکنه ورباندي وکړي.
د سمینار ګډونوالو د اطلاعاتو او کلتور ریاست له مسؤلینو څخه ځانګړې مننه وکړه چي د دوی د پوهاوي لپاره یې تل هڅه کړې او د اړتیا پر مهال یې ورته روزنیز سمینارونه وړاندي کړي دي.
باید یادونه وسي چي تر دې وړاندي هم د اطلاعاتو او کلتور یاست له لوري دې ته ورته سمینارونه وړاندي سوي دي.
سمینار د دعا په ویلو سره پای ته ورسېدی.
راپور: باختر خبري آژانس/ هلمند
نېټه: ۱۴۴۸/۲/۴ هـ ق
هلمند اطلاعاتو او کلتور ریاست!
