01/10/2026
د کتابونو زوی
امام جلالالدین سیوطي رحمه الله د مصـر له نامتو حافظانو، مفسرینو، فقیهانو، محدثینو، مؤرخینو او لیکوالانو څخه و. د ده مشهور لقب (ابن الکتب) (د کتابونو زوی) هم نقل شوی دی.
د مشهورې تاریخي کیسې له مخې د سیوطي پلار په خپل کتابتون کې و او خپلې مېرمنې ته یې وویل چې له کتابونو څخه ورته یو کتاب راوړي. د کتابتون پر لور د تلو پر مهال هغې ته د زېږون درد پیدا شو او سیوطي رحمه الله د پلار په کتابتون کې د کتابونو په منځ کې وزېږېد. له همدې امله ورته (ابن الکتب) وویل شول.
دا روایت په څو وروستیو سرچینو کې په همدې معنا نقل شوی دی. د جلالالدین سیوطي په اړه د یوې سرچینې په بیان کې راغلي دي چې هغه په قاهره کې د خپل پلار په کتابتون کې وزېږېد او له همدې امله په «ابن الکتب» مشهور شو.
یوه بله په زړه پورې خبره دا ده چې سیوطي وروسته د کتابونو او لیکلو له امله دومره مشهور شو چې د ده د ژوند په اړه لیکل شوي چې له څلوېښت کلنۍ وروسته یې ډېر وخت په خپل کتابتون کې په تألیف او تصنیف تېر کړ، نو «ابن الکتب» لقب یوازې د زېږون له کیسې سره نه، بلکې د ده له ټول علمي ژوند سره هم ډېر مناسب ښکاري.
لیکوال: س.ا.هاشمي
