22/04/2025
د یوولسم ټولګي زدهکوونکی میوند د علم د روښانولو یو ښه بېلګه ده
په یوه داسې زمانه کې چې هر څوک یوازې د ځان په اړه فکر کوي، د خوست عالي خصوصي لېسې یوولسم ټولګي زدهکوونکي، میوند ولد سیدولي جان، داسې یو اقدام وکړ چې نه یوازې د ده د ښېګڼې ښکارندوی دی، بلکې نورو ته هم د یو ښه انسان او ښه زدهکوونکي درس ورکوي.
میوند خپل ټول هغه کتابونه چې په کور کې ورسره وو، خو له هغوی یې نور ګټه نه اخیسته، ټول یې ښوونځي ته راوړل. هغه کتابونه یې هغو زدهکوونکو ته وویشل چې د کتابونو د اخیستلو وس نه لري. دا کار یوازې د علم خدمت نه دی، بلکې د زړه له کومې د ښوونځي، ټولنې او راتلونکي نسل سره مرسته ده.
دغه نوښت نه یوازې د ده لوی زړه، بلکې د ده لوړ فکر، اخلاص او مینه د زدهکړې سره ښیي. دا ډول عملونه زموږ ټولنې ته امید ورکوي او موږ ته راښيي چې همدردي، مرسته او یو بل ته د لاس ورکول څومره ارزښت لري.
موږ د خوست عالي خصوصي لېسې اداره، ښوونکي، او ټول زدهکوونکي د میوند دا نوښت ستایو او له ده مننه کوو. هیله لرو چې نور زدهکوونکي هم د ده له دې عمل نه الهام واخلي او د علم، همکارۍ او انسانیت په لور نور ګامونه واخلي.
راځئ چې د یو بل لاس نیوونکي شو!
نوښت، کیفیت او باور
