Mustaqbal University مستقبل پوهنتون

د لوړو زده کړو وزارت د مونوګراف لیکنې نوي لارښود مطابق سیمینار وړاندې شو!
۱۴۴۸/۰۱/۰۵ محرم الحرام
مستقبل پوهنتون د درې ګونو پوهنځیو زده کړیالانو ته د لوړو زده کړو وزارت لخوا د مونوګراف لیکنې نوی لارښود تشریح کړ.
د سیمینار په پيل کې د علمي څېړنو آمر له خوا ګډونوالو ته د ښه راغلاست وینا په ترڅ کې یاده کړه، چې دغه لارښود ډېر منظم او د پوهېدو وړ دی.
سیمینار وړاندې کوونکی، ښاغلي استاد نورمحمّد ثاقب د لوړو زده کړو وزارت د اړوندې برخې له متخصصینو هم مننه وکړه، چې یوه فوق العاده علمي هڅه یې کړې ده او د مونوګراف لیکنې لپاره یې واحد لارښود ترتیب کړی دی.

په سیمینار کې لاندې مهم موضوعات وڅېړل شول:
• د مونوګراف مفهوم، اهمیت او موخې.
• د موضوع د ټاکنې اصول او معیارونه.
• د څېړنې پروپوزل لیکنه او ارزښت یې.
• د څېړنیزې ستونزې بیان او د څېړنې پوښتنې.
• د فرضیو او موخو ترتیب.
• د څېړنې میتودولوژي او د معلوماتو راټولولو لارې.
• د مونوګراف معیاري جوړښت (سریزه، فصلونه، پایله او وړاندیزونه).
• د ماخذونو او مأخذ لیکنې معیاري طریقې.
• د اقتباس، منبع او حواله ورکولو اصول.
• د علمي سرقت (Plagiarism) پېژندنه او مخنیوی.
• د مونوګراف د دفاع او ارزونې معیارونه.
• د مونوګراف د لیکنې تخنیکي اصول او فارمېټ.
• د محصل او لارښود استاد مسؤلیتونه.
د سیمینار وړاندې کوونکي د عملي مثالونو، نمونوي مونوګرافونو او د وزارت د رسمي لارښود له مادو څخه په استفادې ګډونوالو ته د مونوګراف لیکنې ټول پړاوونه قدم په قدم تشریح کړل. همدارنګه د محصلینو پوښتنو ته مفصل ځوابونه وړاندې شول او د عملي ستونزو د حل لارې چارې شریکې شوې.
په پای کې ګډونوالو ته سپارښتنه وشوه، چې د مونوګراف لیکنې په ټولو مرحلو کې د وزارت نوی لارښود په دقیق ډول مراعات کړي او د علمي امانتدارۍ اصولو ته ژمن پاتې شي.
مستقبل؛ د ځلانده راتلونکې پر لور!

په درنښت
د نشراتو مدیریت

د حقوق او سیاسي علومو پوهنځي محصلینو د بهرنیو چارو وزارت او ډیپلوماسۍ انسټیټیوټ څخه لیدنه ترسره کړ.
ورځ: یکشنبه نېټه: 28/12/1447 هـ . ق مطابق 24/03/1405 هـ . ش
د علمي او مسلکي ظرفیت لوړونې، کاري چاپېریال سره بلدتیا او عملي زده کړو په موخه، د مستقبل پوهنتون د حقوقو او سیاسي علومو پوهنځي د ادارې او ډیپلوماسۍ څانګې محصلینو د ۱۴۴۷ (۱۴۰۵) هـ ش کال د جوزا میاشتې په (۲۴) مه نېټه (یکشنبه) د افغانستان اسلامي امارت د بهرنیو چارو وزارت او د ډیپلوماسۍ انسټیټیوټ څخه یو علمي سیر ترسره کړ. دا لیدنه د پوهنتون د علمي نصاب یوه حیاتي برخه وه، چې موخه یې د محصلینو لپاره د دولتي ادارو د کاري میکانیزمونو، ډیپلوماتیکو فعالیتونو، او د بهرنۍ پالیسۍ د جوړښت او پلي کول وه. دغه ډول علمي سفرونه د تیوریکي زده کړو او عملي تجربو ترمنځ د واټن په له منځه وړلو کې اساسي رول لوبوي، چې په پایله کې د مسلکي او ژمنو کادرونو په روزنه کې مرسته کوي.
د لیدنې په پیل کې، ډيپلوماسۍ انسټيټيوت علمي چارو مرستیال دکتور محمّد عالم امین د مستقبل پوهنتون محصلینو ته تود هرکلی ووایه. د ډيپلوماسۍ انسټیټیوټ علمي چارو مرستیال لخوا یو علمي او معلوماتي سیمینار وړاندې شو، چې په کې لاندې مهم ټکي په تفصیل سره وڅېړل شول:
• د بهرنیو چارو وزارت تاریخي مخینه: د وزارت د تاسیس، تکامل، او د افغانستان په تاریخ کې د هغې د رول په اړه معلومات وړاندې شول.
• لاسته راوړنې او فعاله ډیپلوماسۍ: د وزارت وروستي لاسته راوړنې، د فعالې ډیپلوماسۍ ځانګړتیاوې، او د سیمه ېیزو او نړیوالو اړیکو په پراختیا کې د هغې ونډه روښانه شوه.
• د وزارت ارزښت او دندې: په دولتي چوکاټ کې د بهرنیو چارو وزارت ارزښت، دندې، او مسؤلیتونه، په ځانګړې توګه د ملي ګټو په ساتنه او ترویج کې د هغې رول تشریح شو.
د اجنډا سره سم له سیمینار څخه وروسته، محصلینو د ډیپلوماسۍ انسټیټیوټ د مسؤولینو په همکارۍ او لارښوونه د وزارت له بېلابېلو ادارو څخه لیدنه وکړه. پدې لیدنو کې، محصلینو فرصت وموند، چې د وزارت د کاري پروسو، اداري جوړښت، او د مسلکي کړنو په اړه د مسؤولینو سره تفصیلي بحثونه وکړي. دا بحثونه د محصلینو لپاره خورا ګټور وو، ځکه چې دوی وکولای شول خپلې پوښتنې مطرح کړي او د تجربه لرونکو ډیپلوماتانو او مسلکي کارکوونکو څخه مستقیم ځوابونه ترلاسه کړي.
د مننې او راتلونکې همکارۍ ژمنې په پار د مستقبل پوهنتون د حقوقو او سیاسي علومو پوهنځي رئیس ښاغلي نورمحمّد ثاقب د مستقبل پوهنتون په استازیتوب د بهرنیو چارو وزارت او په ځانګړې توګه د ډیپلوماسۍ انسټیټیوټ څخه د دې ارزښتناک علمي سیر د تنظیم او تود هرکلي له امله مننه وکړه. ښاغلي ثاقب د ورته پروګرامونو د دوام غوښتونکی شو، ترڅو محصلین وکولای شي په دوامداره توګه د عملي زده کړو څخه برخمن شي.
د ډیپلوماسۍ انسټیټیوټ علمي چارو مرستیال دوکتور محمّد عالم (امین) د مستقبل پوهنتون له رهبرۍ څخه مننه وکړه، چې د هېواد د راتلونکې نسل په مسلکیتوب کې نه ستړي کېدونکې هلې ځلې کوي او د مستقبل پوهنتون ادارې ته په راتلونکي کې د هر ډول علمي او عملي همکارۍ ډاډ ورکړ.
په پای کې، د مستقبل پوهنتون په استازیتوب، ښاغلي ثاقب د بهرنیو چارو وزارت او ډیپلوماسۍ انسټیټیوټ له ټولو چارواکو او کارمندانو څخه د دې ارزښتناکې لیدنې او هر اړخیزې همکارۍ له امله خپله ژوره مننه څرګنده کړه.
مستقبل، د ځلانده راتلونکې پر لور!
د نشراتو مدیریت

پاک او سالم چاپېریال د یوې پرمختللې ټولنې بنسټ دی. راځئ چې د ونو په ساتنه، د چاپېریال په پاکوالي او د طبیعي سرچینو په خوندي کولو سره د خپل هېواد د زرغون او روښانه راتلونکي لپاره ګډه هڅه وکړو.
مستقبل پوهنتون — د پوهې، مسؤلیت او زرغون راتلونکي په لور.

🚭 د تمباکو زیانونه او د ځان ساتنې لارې

تمباکو یوازې یو عادت نه دی، بلکې د خطرناکو ناروغیو پیل دی.
سګرټ، نسوار او نور تمباکويي مواد د سږو، زړه، خولې او ټول بدن روغتیا له جدي خطر سره مخ کوي.

راځئ:
✅ سالم ژوند غوره کړو
✅ ځوان نسل وژغورو
✅ له تمباکو څخه ځان وساتو

“تمباکو پرېږدئ؛ روغ ژوند غوره کړئ.”

د مستقبل پوهنتون د رهبرۍ له لوري تاسو او ستاسو درنې کورنۍ ته د لوی اختر مبارکي وړاندې کوو.
الله تعالی دې ستاسو عبادتونه، قربانۍ او دعاګانې قبولې کړي، اختر مو له خوښیو، سولې او برکتونو ډک شه. اختر مو مبارک!

په اسلامي ټولنه کې د ځوانانو مسؤلیتونو په اړه روزنیز سمینار وړاندي شو!
د اسلامي ټولنې په پرمختګ او د سالم نسل په روزنه کې د ځوانانو د مهم رول د روښانه کولو په موخه، د مستقبل پوهنتون په تالار کې د «په اسلامي ټولنه کې د ځوانانو مسؤلیتونه» تر سرلیک لاندې یو روزنیز او علمي سمینار وړاندې شو.
یاد سمینار د پوهنتون د اداري کارکوونکو، استادانو او محصلینو په پراخ ګډون ترسره شو، چې موخه یې په اسلامي ارزښتونو ولاړه ټولنه کې د ځوان نسل د مسؤلیتونو، مکلفیتونو او اغېزمن رول روښانه کول و.
یاد سمینار د اوتید مؤسسې بنستګر او نړیوال ټرېنر (روزونکی) ښاغلی دکتور حیات اللّه عتید له لوري پیل شو.
نوموړي په خپله وینا کې د اسلامي عقیدې پر بنسټ د تاریخي مسؤولیت، دیني احساس او فکري بیدارۍ ارزښت ته اشاره وکړه. همدا راز ښاغلي عتید له لوري د اسلامي اخلاقو، علمي ودې، ټولنیز مسؤلیت، ملي یووالي، د مثبت فکر ترویج، د دیني او عصري علومو ارزښت، او د ځوانانو د سالم فکري او اخلاقي روزنې په اړه هر اړخیز معلومات وړاندې شول او ټینګار وشو، چې ځوانان د ټولنې د بدلون، پرمختګ او ثبات اساسي ځواک ګڼل کېږي او باید خپل علمي، اخلاقي او ټولنیز مسؤلیتونه په ښه توګه ترسره کړي.
نوموړي ټینګار وکړ؛ چې هېڅکله پردي زموږ هېواد نه شي ابادولای، بلکې د هېواد د جوړولو مسؤولیت خپله د همدې خاورې د بچیانو پر اوږو دی. هغه محصلانو ته سپارښتنه وکړه، چې د تېر تاریخ څخه عبرت واخلي، د شخصي ګټو پر ځای ملي ګټو ته لومړیتوب ورکړي، زحمت او ستړیا وزغمي او د لوړو موخو لپاره کار وکړي.
د سمینار په پای کې د پوهنتون رئیس پوهنمل دوکتور شفیق اللّه امین وویل، چې که ځوانان علمي وړتیا او مسلکي مهارتونه لوړ کړي، نو د هېواد هره برخه به د دوی پر مټ پیاوړې شي او د هېواد سیاسي او اقتصادي خپلواکي به پیاوړې او خوندي پاته شي او د قدرمن دوکتور ښاغلي حیات اللّه عتید څخه هم مننه وکړ او ترڅنګ یې د پوهنتون مسؤولینو، د سمینار له تنظیموونکو او ګډونوالو څخه مننه وکړه او د علمي او فکري برنامو پر دوام یې ټینګار وکړ.
ګډونوالو دغه ډول علمي او روزنیز پروګرامونه ګټور وبلل.
مستقبل، د ځلانده راتلونکې پر لور!
سه شنبه ۱۴۴۷/۱۲/۰۲ مطابق ۱۴۰۵ / ۰۲ / ۲۹
د نشراتو او عامه اړیکو مدیریت

د ګډې علمي همکارۍ په موخه هوکړه لیک لاسلیک شو!
سه شنبه ۱۴۴۷/۱۲/۰۲ مطابق ۱۴۰۵ / ۰۲ / ۲۹
د مستقبل پوهنتون او د متانت پوهنتون ترمنځ د ګډو علمي همکاریو هوکړه لیک لاسلیک شو.
د دې هوکړه ليک له مخې؛ دواړه خواوې به له یوه بله سره د علمي همکاریو او په ځانګړې ډول د څېړنو په برخه کې مرستې کوي، د استاذانو او محصلینو په ظرفیت لوړونه کې به د یو بل لاسنیوی کوي، د طرفینو له لوري په جوړو شویو کنفراسونو، سمينارونو، ورکشاپونو او د ظرفیت لوړونې بېلا بېلو نورو پروګرامونو کې به ګډون او ونډه اخلي.
په همدې موخه جوړه شوې غونډه کې، مستقبل پوهنتون رئیس پوهنمل دکتور شفیق اللّه امین او د متانت پوهنتون رئیس ښاغلي قدرت اللّه سنګین یاد هوکړه لیک لاسلیک کړ او د دواړو علمي نهادونو ترمنځ د ګډو علمي همکاریو تجاربو د شریکولو په اړه د نظرونو تبادله وشو.
همدا راز د متانت پوهنتون رئیس ښاغلي قدرت اللّه سنګین د مستقبل پوهنتون د مشرتابه پلاوي له همکارۍ او چمتووالي مننه وکړه، او ویې ویل: مستقبل پوهنتون په خصوصي پوهنتونونو کې د هېواد په کچه بشپړ ملي اکاډمیک اعتبار لرونکې بنسټ په توګه، په اکاډمیکو چارو کې د تجربو او امکاناتو له پلوه یو بډای پوهنتون دی او د دواړو پوهنتونونو ترمنځ د لاسلیک شوي هوکړه لیک د موادو پلي کول د متانت پوهنتون په پرمختګ او ظرفیت لوړونه مثبت اغېز کولای شي.
مستقبل پوهنتون هڅه کوي، چې په سیمه‌ییزه او نړیواله کچه د علمي او څېړنیزو همکاریو د پراختیا له لارې د افغانستان د علمي پرمختګ لپاره بنسټیز ګامونه پورته کړي او افغانستان په تحصیلي برخه کې د سیالو هېوادونو په قطار کې ودروي.
یاده دې وي، چې د مستقبل پوهنتون د محصلینو ظرفیت لوړونې په موخه تر دې وړاندې له یو شمېر نورو بنسټونو سره هم د ګډ علمي کار په موخه هوکړه لیکونه لاسلیک کړي دي.
مستقبل د ځلانده راتلونکې پر لور!
د نشراتو او عامه اړیکو مدیریت

د مستقبل پوهنتون استاذانو لپاره د څېړنیز پروپوزل لیکلو سمینار ترسره شو!
۱۴۰۵ / ۲/۲۳
مستقبل پوهنتون علمي څېړنو اصلي کمېټې په همکارۍ د پوهنتون درې ګونو پوهنځیو استاذانو لپاره د "څېړنې پروپوزل لیکنې" تر عنوان لاندې یو مهم علمي سمینار وړاندې شو، چې موخه یې د استاذانو د څېړنیزو مهارتونو پراخونه او د پروپوزل لیکنې بنسټیز اصولو سره د هغوی اشنا کول و.
یاد سمينار د قران کریم د څو مبارکو آيتونو په خوږ تلاوت سره پیل شو. ورپسې د علمي چارو مرستیال ښاغلي استاذ نجیب اللّه نصرت د خپلې پرانیستونکې وينا په ترڅ کې د ټولو ګډونوالو هرکلی وکړ او د سمینار اهمیت یې بیان کړ. نوموړي د څېړنې د ارزښت، د پوهنتوني کادر د علمي پرمختګ او د څېړنیزو فعالیتونو د دوام اړوند پر بنسټیزو ټکو ټینګار وکړ.
وروسته د ښاغلي استاذ نورمحمّد ثاقب خپل ترتیب شوی پریزنټېشن له ګډونوالو سره شریک کړ. هغه د څېړنیز پروپوزل مهم اجزاء، لکه: د موضوع ټاکنه، ستونزه او اهمیت، موخې، فرضیې، ادبي څېړنه، میتودولوژي، تېرو لیکنو ته کتنه، مواد او کړنلاره، د توقع وړ پایلې، منابع او مهال‌وېش په تفصیل سره تشریح کړل. ګډونوالو د سمینار له علمي محتوا هرکلی وکړ او دا یې د پوهنتون استاذانو لپاره یو ارزښتناک ګام وباله.
په پای کې د ګډونوالو ترمنځ نظریات، پوښتنې او بحثونه هم وشول او د دعا په لوستلو سره پای ته ورسېد.
مستقبل؛ د ځلانده راتلونکې په لور!
بشپړ ملي اکاډمیک اعتبار لرونکې پوهنتون!

د نشراتو آمريت

د مستقبل له خصوصي پوهنتون څخه ليدنه وشوه!
ورځ، سه شنبه / ۱۵ ثور، ۱۴۰۵
د تابش پوهنتون څخه راغلي پلاوي ښاغلي پوهنیار دوکتور عبدالحمید سیرت (د تابش پوهنتون رئیس) او معاونینو یې د مستقبل پوهنتون څخه هر اړخیزه لیدنه او کتنه وکړه.
یاد پلاوي د پوهنتون له رهبرۍ سره د پېژندنې تر ناستي وروسته د رسمي کاري ورځې په بهیر کې د پوهنتون له ټولو پوهنځیو، عمومي کتابتون، لابراتوارونو او د تدریسي چاپېریال له بېلابېلو برخو څخه لیدنه ترسره کړه.
په دې پروګرام کې د دواړو پوهنتونونو مشرتابه او استاذانو ګډون درلود، چې پکې د علمي، اداري او تدریسي چارو پر پرمختګ، د نصاب پر معیاري کولو، او د څېړنیزو فعالیتونو پر پراختیا هر اړخیز بحثونه ترسره شول.
دغه لیدنه د علمي همکارۍ، تجربو د تبادلې او د لوړو زده‌کړو د کیفیت د لا پیاوړتیا په موخه تنظیم شوې وه.
نوموړي پلاوي د مستقبل پوهنتون چاري ډېرې ښه و ارزولې او د پوهنتون له هر اړخیزې همکارۍ څخه یي د خوښۍ په څرګندولو سره مننه وکړه.
د لیدنې پر مهال، د مستقبل پوهنتون بېلابېل علمي او اداري څانګې، درسي چاپېریال، کتابتون، او نورې اسانتیاوې د تابش پوهنتون پلاوي ته وروپېژندل شوې، چې د هغوی له لوري د ستاینې وړ وبلل شول.
دواړو لورو ټینګار وکړ، چې په راتلونکي کې به د ګډو علمي پروګرامونو، سیمینارونو او څېړنیزو فعالیتونو په برخه کې لا زیاتې همکارۍ ترسره شي، تر څو د هېواد د لوړو زده‌کړو سکتور لا پیاوړی او معیاري شي.
په پای کې، د تابش پوهنتون له محترم پلاوي څخه د هغوی د ارزښتناکې لیدنې مننه وشوه او د دوامداره همکارۍ هیله څرګنده شوه.
مستقبل، د ځلانده راتلونکې پر لور!
په درنښت
د نشراتو او فرهنګي چارو عمومي کمېټه
‌کړې

*مستقبل پوهنتون په تالار کې (د ثور اتمه، د مجاهدينو د بريا ورځ) يو لړ شاندارو مراسمو سره ولمانځل شوه!*
دغه مراسم د پوهنتون فرهنګي کمېټې او د پوهنځيو فرعي فرهنګي کمېټو په ګډه همکاري د همدې پوهنتون د غونډو په تالار کې تر سره شول، چې پر مهال يې د پوهنتون رئیس ښاغلی پوهنمل دکتور شفیق اللّه امین، د پوهنتون علمي چارو مرستیال ښاغلی نجیب اللّه نصرت، د پوهنځیو رئیسانو او محصلینو حضور درلود.
په پيل کې د پوهنتون رئيس ښاغلی دکتور شفيق اللّه امين وويل: د ثور اتمه په افغانستان کې د مجاهدینو د بریا ورځ ده، په دې ورځ افغان مجاهدینو له اوږدې خونړۍ مبارزې وروسته بریا خپله کړه، چې د شوروي اتحاد ځواکونو پر وړاندې د مجاهدینو په وسله واله مبارزه کې کابو دوه میلیونه افغانان شهیدان، یو نیم میلیون وګړي معیوب او میلیونونه نور له هېواده وتلو ته اړ شول.
هغه زياته کړه، د ۱۳۷۱ هجري لمريز کال د ثور په اتمه نیټه د افغان مجاهدینو بریالیتوب د افغانستان د اوسني تاریخ یوه ډیره مهمه پېښه ده، په دې ورځ د افغانستان د لوی ملت عظیمو قربانیو رنګ راووړ او زموږ د تاریخ یو نوی پړاو پیل شو.
ښاغلي دکتور امین وويل، د دې ورځې په یادونې سره د خپل هغه ویاړلي ملت د میلیونونو شهیدانو او معلولینو د قربانیو درناوی کوو، چې د سپیڅلي جهاد لارویان او د ګران هېواد د ازادۍ او ساتنې لپاره یې ځانونه نذرانه کړل او یا یې د خپل بدن خواږه اندامونه قرباني کړل.
نوموړي زیاته کړه چې، پکار ده چې د خپل ویاړلي تاریخ له کارنامو مثبته ګټه واخلو، د تېرو ترخو تجربو تکرار مخه ونیسو او نن د هېواد ژغورلو لپاره په متحدانه ډول یو بل ته د اتفاق او ورورلۍ لاسونه ورکړو
ورپسې د اجنډا سره سم، د علمي چارو مرستیال ښاغلي استاذ نجیب اللّه نصرت وویل: افغانانو تل د خپلې خاورې او خلکو څخه د دفاع په موخه قرباني ورکړې او شاتګ یې نه دی کړی، خو د بې پروایي او پردیو د دسیسو له امله یې ماتې خوړلې.
ښاغلي نصرت زیاته کړه، چې دا بریا د اللّه جلّ جلاله په نصرت او د میلیونو افغانانو په قرباني منځته راغلې ده، چې باید له امله يې د الله جلّ جلاله حمد او ثناء وویل شي، په خبره يې په نږدې وختونو کې افغانانو انګریزانو، روسانو او امریکایي اشغالګرو درېو لویو امپراطوريو ته شرموونکې ماتې ورکړې چې له امله یې ډیر نور ملتونه هم آزاد شول چې هغه ملتونه زموږ له دغه کارنامو او میړانې څخه سخت اغیزمن دي او هر وخت راڅخه مننه کوي.
د شرعیاتو پوهنځي رئیس ښاغلی ګل احمد صافی هم ټولو زده کړیالانو ته د دې ورځي په ویاړ د مبارکي تر څنګ وویل مجاهدینو د اللّه جلّ جلاله د دین ساتنه وکړه او د اللّه جلّ جلاله دښمن يې مات کړ، چې دغه وجه ده چې نن یې موږ د بریا ورځ لمانځو، په خبره يې جهاد پر ځمکه د فساد د له منځه وړلو په موخه کېږي چې پر دې اساس زیاته بهتري لري، کوم کسان چې د اللّه جلّ جلاله په لاره کې مهاجر کېږي، لوي ثوابونه ورکول کیږي، ځکه دوي د اللّه عز وجلّ د دین ساتنه کوي.
غونډه د شرعیاتو پوهنځي استاذ ښاغلي نوراللّه توحیدي له لوري په دعاء ویلو سره پای ته ورسېده.
د یو خپلواک، باسواد او پر ځان متکي افغانستان په هیله!

د نشراتو او فرهنګي چارو عمومي کمېټه