09/04/2023
سرسايه د روژې لپاره داسي ده لکه د لمانځه لپاره سجده سهوه.
سرسایه او احکام يې
د رمضان د مياشتي روژه د مځکي او اسمان ترمنځ وي، تر هغه وخت پوري نه پورته کيږي ترڅو سرسايه اداء نه سي.
د روژې مياشت پر سرسايه باندي ولاړه ده، ځکه چي سرسايه د روژې د پاکوالي لپاره واجب سوې ده. هغه چټي او بېهوده، او بې ځايه کړني چي روژاتي په روژه کي تر سره کړي وي، سرسايه د هغو ټولو لپاره د پاکوالي سبب ګرځي.که څوک غواړي چي روژه يې ژر قبوله سي نو د سرسايې په ورکولو کي دي بېړه وکړي.
د سرسايې د واجبېدو وخت:
سرسايه د هجرت په دوهم کال د شعبان په میاشت کي واجب سول، هغه کال چي په همدې کال کي د رمضان روژه فرض سوې وه.
د سرسايې د وجوب دلیل:
د سرسايې پر وجوب باندي دليل د نبي کريم -صلی الله عليه وسلم - دا حديث شريف دئ، چي ابن عمر -رضي الله عنهما- یې د نبي کريم -صلی الله عليه وسلم- څخه روايت کوي:
عَنِ ابْنِ عُمَرَ رَضِيَ اللَّهُ عَنْهُمَا، قَالَ : فَرَضَ رَسُولُ اللَّهِ صَلَّى اللَّهُ عَلَيْهِ وَسَلَّمَ زَكَاةَ الْفِطْرِ صَاعًا مِنْ تَمْرٍ أَوْ صَاعًا مِنْ شَعِيرٍ عَلَى الْعَبْدِ وَالْحُرِّ، وَالذَّكَرِ وَالْأُنْثَى، وَالصَّغِيرِ وَالْكَبِيرِ مِنَ الْمُسْلِمِينَ.(صحيح البخاري | كِتَابٌ : الزَّكَاةُ | بَابُ فَرْضِ صَدَقَةِ الْفِطْرِ, رقم الحديث: 1503)
نبي کريم - صلی الله عليه وسلم- سرسايه پر خلکو فرض کړل، چي يوه کاسه د خورما يا اوربشي پر هر آزاد او مريي، نارينه او ښځينه، لوی او کوچني باندي چي مسلمانان وي.
د سرسايې حکمت:
سرسايه د روژې د نقصاناتو او کميو جبيره ده او فقيران د اختر په ورځ له سوال او فقر څخه د راګرځولو لپاره واجب سوې ده. وکيع بن الجراح وايي:
زکاة الفطر لشهر رمضان کسجدة السهوه للصلاة. (رواه الدار القطني)
