16/03/2017
راځئ چې سبق ووایو!
د پورته سرلیک لاندې د بلخ د لرې پرتو ولسوالیو له هغې جملې چهاربولک، چمتال، دولت آباد او شولګرې ولسوالیو ګڼ شمېر مشرانو، ځوانانو، د مدني ټولنو غړو، د لیسو مدیرانو او دیني عالمانو تر منځ ګډه مشورتي ناسته ترسره شوه. دغه کمپاین د بلخ ولایت د پوهنی ریاست مرستیال ښاغلی لاجمیر افغانزی په نوښت او هڅو رامنځ ته شوی چی لومړی ناسته یی نن د عظیم الشان قران په څو مبارکو آیاتونو پیل شوه. ویاند د غونډې په اړه وویل: لکه څرنګه چې تاسو ته معلومه ده د بلخ د لرې پرتو سیمو چې اکثره یې پښتون میشته دي، د پوهې له ډېوې څخه محرومه پاتې شوي. لامل یې د مشرانو او د پلرونو لخوا ښوونې او روزنې ته نه پاملرنه او د ناسم فکر، ذهنیت شتون دی، کوم چې دغه ټولنه یې د تعلیم له ښېګڼو څخه لرې ساتلې ده. ویاند د غونډې له ګډونوالو څخه وغوښتل تر څو په دې تړاو او د پښتنو پلرونو لخوا ښونځیو ته د ماشومانو او نجونو نه پرېښودلو لامل په ګوته او له ملګرو سره یې شریک کړي.
د غونډې ټولو ګډونوالو له هغې جملې لاجمیر افغانزي، عطامحمد ساهو، مېرمن قمر نوري، استاد جان محمد افغانزوی، خیبر امیري، سیدمحمد حریق، تاج محمد مبارز، مدیر احمدشاه واکمن، اغلې سارا، لعل جان آشنا، مدیر محمد عظیم عمري , نجیب پاڅون او نورو ګډونوالو خپل هراړخیز او ګټور نظرونه، مشورې وړاندې او د دې کمپاین د ښه مخته وړلو لپاره د یو منظم تشکیل د جوړېدو لپاره ګډ پلان جوړ او د پراخوالي لپاره یې خپل اندونه شریک کړل.
د غونډې په وروستۍ برخه کې د ملګرو او مشرانو په ګډې غوښتنې سره دا وویل شو چې (راځئ چې سبق ووایو) کمپاین به د چهاربولک له ولسوالۍ څخه پیل او د بلخ لرې پرتو سیمو ته به هم وغزول شي.
غونډه مازیګر مهال پای ته ورسېده.
