Batoul M. Ghadeer - بتول غدير

خلال الفترات الماضية كان كتير عم يجيني سؤال:
كيف بدي اتعلّم تسويق؟
شو الخطوات لفوت بمجال التسويق؟

ولسهولة وإفادة الجميع قررت أعمل جلسة تفاعلية أونلاين بحيث أقدر غطي كل هالنقاط، على أمل تكون هالجلسة مفتاح يساعد المهتمين للدخول لمجال التسويق بالشكل الأفضل.

* يلي عندو الرغبة بالحضور، يا ريت تعبّو الفورم، هو بسيط وسريع ليخليني أعرف نظّم الجلسة بأفضل طريقة ممكنة.

* نقاط الجلسة:
- خطوات تعلّم التسويق من ناحية نظرية.
- خطوات تعلّم التسويق من ناحية عملية.
- الحديث عن تخصصات التسويق وكيف عليك اختيار تخصصك.
- المهارات اللازمة للمسوّق.
- مفاتيح ونصائح لتعلّم التسويق بطريقة عمليّة.
- حاجات ومتطلبات السوق العربية للعمل كمسوّق.
- الأدوات اللازمة في مجال التسويق.
- أسئلة ونقاشات.

* الموعد النهائي للجلسة رح يتم الإعلان عنو عبر جروب واتس آب بينضاف عليها كل الراغبين بالحضور.

جلسة للحديث عن خطوات تعلّم التسويق مرحبا! أنا بتول غدير، المدير التنفيذي لوكالة مينتس للتسويق الرقمي، اختصاصية في المجال بخبرة 7 سنوات في السوق العربية. تلقيتُ العديد من الأسئلة حول: (كيف أبدأ في مجال ....

الشركات السورية اليوم وتحدّي المسؤولية الاجتماعية بظل الز.لز.ال.

شو يعني المسؤولية الاجتماعية للشركات؟
بيعني كيف الشركات بتقدر تساهم إيجاباً بتطوير المجتمع والبيئة المحيطة فيها، وتطرح حلول لحل مشاكل متواجدة بتفيد المجتمع بشكل غير ربحي.
واليوم أكتر من أي وقت مضى، الشركات ملزمة بالمساهمة والمساعدة المجتمعية بعيداً عن أي نشاط ترويجي ربحي.

شفنا كتير نماذج لشركات ساهمت بالفترة الماضية وبالصورة أحد مساهمات شركة MTN Syria .

↙️ بنفس الوقت، كان في شركات عم تعاني شلون ممكن تأدي مسؤوليتها الاجتماعية خصوصاً إذا الخدمة/المنتج تبعها ما بيفيد بشكل مباشر بالحدث لتطرحو بشكل مجاني أو بسعر التكلفة، فشو العمل بهالحالة؟

• المساهمة المالية أو العينية للجهات المختصّة.
• المساهمة البشرية: عن طريق تجنيد الفرق للمساعدة على الأرض.
• المساهمة التنظيمية: في شركات مطوّرة أنظمة أو حلول ذكية داخلية وارد كتير تكون بتخدم الظرف الحالي (مثال: أنظمة إدخال البيانات وتنظيمها وتنسيقها وفلترتها).
• المساهمة النفسية المجتمعية: ممكن تنعكس على شكل محتوى قادر يرفع ويحسّن من الحالة النفسية ويطرح حلول بالتعاون مع مختصّين أو الاستعانة بمصادر موثوقة.

↙️ والسؤال التاني يلي عم يسبّب حيرة للشركات وأحياناً عتب من المحيط:
هل مسموح أو لازم الشركة تنشر على السوشال ميديا بشو أو كيف عم تساعد؟

✅ من وجهة نظر تسويقية ما في ضرر على الشركة أنو تشارك كيف عم تقدر تقدّم مساعدة بظل الحدث طالما طريقة العرض بعيدة تماماً عن الابتذال والمتاجرة والترويج واستخدام لغة حسّاسة وغير إنسانية.
بالنهاية الشركة من حقها تخبّر المجتمع المحيط فيها إنها جزء منو وبتدعمو ومستعدة تبذل اللي فيها عليه لتفرجي الناس أنو وجودها حولهن مانو معتمد فقط على الربح وإنما هي جاهزة ومن واجبها تساعد وتدعم وترد الجميل للمكان والشريحة والمجتمع يلي حاضنها وعم يكبّرها.

✅ومن وجهة نظر مجتمعية كمان ما بلاقي في ضرر -شخصياً- لأن في كتير شركات تانية وارد ما يكون عندها اطلاع على مفهوم المسؤولية الاجتماعية ولما تشوف باقي الشركات بالسوق عم تساهم، رح تعرف أنو في شي لازم تعملو بدورها وتتحرك.

كل هالحكي شرعي ومشروط ارتباطو والتصاقو بالقيم الإنسانية والمجتمعية وبعيد بالمطلق عن الترويج التجاري البحت والأساليب المبتذلة، لأن وقتها رح تكون الشركة عرضة لهجوم سلبي عنيف والجهود اللي انبذلت تجيب رد فعل عكسي تماماً.

بالنهاية أنا سعيدة بمستوى الوعي يلي شفتو بالسوق السورية وفي كتير شركات ما ترددت أنها تساهم وتساعد لوجه الله.
على أمل يخلص هالكابوس وترجع الحياة لمجاريها ويكون الجميع بصحة وسلامة جسدياً ونفسياً 💚

يوم عن يوم عم أعجز عن التعبير بهيك وضع.
وكلما اكتب عم حس انو شو ما انكتب ما بيهوّن ولا بيخفف ولا بيسكّن.
كل الرحمة لأرواح شهداء الزلزال بسورية وتركيا، والشفاء العاجل للمتضررين جسدياً ونفسياً.

حقكن تاخدوا وقتكن لترتاحوا نفسياً بعد يلي صار.. ما تكبتوا مشاعركن. الله يهوّن ويهدّي بال وقلب الجميع ويكون معكن.

وأنا سهرانة مع ChatGPT وعم ندردش عن حملات فاشلة لشركات عالمية ونحللها وناخد ونعطي 😬

مرق كتير حملات فاشلة سواء لـ Pepsi, Nivea, United Airlines, McDonald's....
خصوصاً بين ال 2010 - 2017..

الجميل فيهن أنو هيدي الشركات معروفة بإنها عملاقة تسويقيا ومع هيك اقترفت أخطاء فادحة يا جماعة! بس قاموا وتعلّموا وبعدهن مستمرين لهلا!

في خطأ غريب عملتو McDonald's انو اطلقت حملة عبر تويتر اسمها كان هدفها تخلي الزباين يحكو عن تجربتهن الفريدة وقصصهن مع وجباتهن، بس اللي صار العكس تماما!!
الناس صارت تحكي التجارب البشعة وتنتقد بقوة وما تركت شي قابل للانتقاد ما انتقدتو لدرجة McDonald's فقدت السيطرة بالمطلق على الحملة.

المهم طلع الخطأ الأكبر هو توقيت الحملة!
اطلقوا الحملة بوقت كتير حسّاس، كان في تحرّك عالمي لمحاربة الوجبات السريعة ووجبات الغذاء غير الصحّية.

✅ توقيت حملتك وظروف السوق والمجتمع المحيطة المرتبطة بمنتَجك أحد أهم العناصر يلي ممكن تدرسها ✅

** الصورة طريفة وأنا عم بحبش بتفاصيل القصص:
بنفس الوقت كانت بيبسي ونيڨيا متصدرين بالحملات الفاشلة 🤣 الجماعة متصالحين مع حالهن 😬

الـ ChatGPT مو أحسن منكن😌
شاركوني قصة فاشلة تسويقيا بتعرفوها وبتعتبروها ملهمة (ولو كانت لبراند مو معروفة) 👇🏼💬

عمرك ما تجي تسأل عن معلومة بعينها!
اسأل عن الكيفية، الطريقة، التجربة، نقيضها، نقدها، مناقشتها، وما وراء كواليسها!
📌 دعوة مجانية بآخر البوست 👇🏼

أكتر كلمات بيسمعوها مني طلابي والفرق يلي بشتغل معها لما يسألوني شي، هي:
• ابحث وخبرني.
• حلل وفكّر وشاركني.
• اصطدم بالمشكلة واصفن بالحل وتعال نحكي.
• جرّب واستنتج وناقشني.
أنا معك لعلمك تكتسب العقلية الصحيحة كمسوّق. أما جوجل ويوتيوب بيتكفلو باستخراج المعلومة.

البعض بأول الطريق بيفكروني عم عذبهن أو بيعتبروه رد غير نموذجي لـ Mentor عم يمشي معهن ببداية مسارهن المهني بالتسويق.
بس! الأمر هو النقيض تماماً.

أنت كـ baby steps marketer مفروض تتعلّم *العقلية الصحيحة لتفكّر كمسوّق*.. شو بيعني هالحكي؟
- اتعلّم كيف تحلل وتستخلص استنتاجات.
- اتعلّم كيف تقرأ وتستقرأ بيانات/تقارير/خطط/أسواق/ترندات تسويقية أو إشارات معينة.
- اتعلّم كيف تبحث وتستخرج المعلومة الصح والمفيدة.
- اتعلّم كيف تنقد فكرتك وفكرة غيرك بهدف التحسين.
- اتعلّم كيف تفكر منطقياً، وتفهم عاطفياً جمهورك وزبونك.
- اتعلّم كيف تتواصل وتوصّل فكرتك.
- اتعلّم كيف تكون جوكر بعدة مهارات ناعمة.
- اتعلّم كيف تراقب حالات وتجارب وحملات وأسواق ومنتجات ومحتويات -سواء فاشلة أو ناجحة- وتقدر تاخد الدروس منها.
- اتعلّم كيف تملك جرأة اكتشاف وخوض تطورات الأدوات والتكنولوجيا وتطويعها لمساعدتك.

هاد كلو أولى بكتيير إنك تتعلّمو وأثمن ما يمكن تاخدو (مني أو من أيا mentor أو leader تاني).
المعلومات بالتسويق بتتقادم سريعاً، وبتطلب منك بحث عميق ودائم وحثيث (بكل ما للكلمة من معنى).
بالتالي إذا كان اعتمادك عليي هو فقط إني أعطيك المعلومة الصح، أنت ما استفدت إلا لفترة قصيرة!

✅ ع سيرة اكتساب العقلية التسويقية:
* هل أنت مهتم تحضر لقاءات (مخصصة مو لايف) خفيفة ظريفة اونلاين لندردش ونتشارك بعض التجارب والقصص حول التسويق مجاناً؟
اكتبلي بالتعليقات 💬

💬 أكبر تحدي على الإطلاق:

تواجه وتستوعب وتتأقلم مع فكرة تكرار "المحاولة والفشل" بدون ما تحط أعذار ومبررات. ⭕
وصولاً لمرحلة التعلّم والخبرة واستخلاص النتائج ثم "المحاولة والنجاح". ✅

📌 هيدي العقلية مهم تكتسبها خصوصاً إذا كنت شغّال بمجال التسويق.

كيف بتقدم عرض بيع ناجح؟
وعلى شو بتركّز بتسعير وترويج منتَجك؟

الأسواق والمنافسة وتطوّر الأدوات ودخول الذكاء الاصطناعي صاروا كلهن عم يفرضوا شروط ومتطلبات وأشكال جديدة لتقديم المنتجات وتسعيرها وتقييمها وحتى تسويقها.

واليوم، ما عاد الزبون بيدفع سعر المنتَج لنفس الأسباب يلي كان يدفعلها سابقاً.
طريقة تقييم البدائل واختيار البديل المناسب إلو صار محكوم بعدة عوامل، بتخليه يقول (أوك اشتريت)!
كيف لازم تفكّر؟ وشلون تحدّث طريقة بيعك وتسويقك للمنتَج؟

• بدال ما تسعّر بحسب (كم ساعة) عمل، هلا بدك تسعّر (كم السرعة) يلي قادر تخدم فيها زبونك.
• بدال ما تعتمد على (الجودة العالية) للمنتَج، سعّر بحسب (النتائج) يلي بتضمنها لزبونك.
• بدال ما تحدد (القيم والمنافع) يلي رح يكسبها زبونك، سعّر اعتماداً ع (الحلول) يلي قادر تقدمها لمشاكل زبونك.

بهاد الشكل رح يختلف أسلوب اقناعك للزبون سواء بالعملية البيعيّة أو التسويقية.

من أجمل تعاريف الحظ اللي تصبّحت فيها اليوم! 💚

"كلما عملت أكثر، كلما زاد حظك.
(كيم إكلين، من كتاب "في ظل الحياة المرئية")

يمكنك بعملك الجاد جذب النجاح باتجاهك.
هناك الكثير من الأشياء التي تستطيع عملها، والتي تعمل كمغناطيس للحظ.
هناك الكثير من الروافع في خدمتنا، والتي تعمل على رفع احتمالية الحظ في حياتنا."

* منقول من النشرة البريدية لـ د. Fadi Alshalabi - فادي الشلبي .

نهاركن حظوظ مستحقة، وجمعة مباركة 🙏

اذا قطعت ٦٠٪ من تعلّم تخصص مهني معين، وكان عندك حرية اختيار طريقة احتراف المجال. شو بتختار؟ 💬

1️⃣ التحاق بفترة تدريبية internship بشركة.
2️⃣ تسجيل كورس متقدّم.
3️⃣ تطبيق عملي لمهمات مشابهة لسوق العمل.
4️⃣ رقم ۳ مع وجود شخص مُرشد mentor.
5️⃣ العمل مع مجموعة اختصاصيين على مهمة/مشروع.
6️⃣ شي تاني.... اتركلي ياه بالتعليق.

أهم كورس لتعلّم التسويق بتخصصاته، مجاناً! 🎁
(خلاصة آخر 3 سنين).

وين جاية؟ كأن انبسطت وكييفت وقلت خاي حصلنا على كنز! 😬
بمجرد تكتب الكلمة المفتاحية للتخصص يلي بدك تتعلمو بتلاقي آلاف النتائج على جوجل أو يوتيوب أو مواقع الكورسات الشهيرة. بس اللي بدي خبرك ياه أهم! 🏅

رحلة التعلّم أهم من تعلّمك للمعلومة ذاتها.. شو يعني؟
وشو الطريقة يلي بنصح فيها -وبعتمدها شخصياً- لتتعلّم ذاتياً؟

↙️ مهم تعرف لتتعلّم أي شي أنت بحاجة تمرق بهالمراحل:

• الإطار النظري (مصطلحات، تعاريف، مفاهيم، اختصارات، مناهج، طرق وآليات...الخ).
• الإطار العملي (كيفية التطبيق، خطوات، نماذج، حالات سابقة... الخ).
• أهم الأدوات ذات الصلة (قدرتك على استخدام أدوات تسهّل وتدعم وترفع جودة عملك جزء لا يتجزّأ).
• الاطلاع على تجارب سابقة، نصائح، حيل، خلاصات (اطلع بدون ما تتحيّز أو تنعدى أو تتبنّى إلا بعد التجريب).
• تطبيق عملي على حالة وهمية، أو انترن شيب بشركة أو تقديم الخدمة مجاناً.
• تصنيف النقاط المهمة والمراحل بـ checklist قابلة للتطوير وللتعديل دائماً.

✅ وسائل هالرحلة وارد تكون (اختار مزيج وليس وسيلة وحدة فقط):

- كورسات مدفوعة و/أو مجانية.
- البحث ثم البحث ثم البحث.
- كتب، مقالات، تدوينات، فيديوهات، بودكاست...الخ
- تغذية بصرية/استلهام (اذا مصمم تغذيتك البصرية هي بوسترات، اذا سوشال ميديا تغذيتك هي حسابات وصفحات فاشلة أو ناجحة، اذا سيو تغذيتك هي مواقع بترافيك عالي...الخ).
- التحليل والنقد ومشاركة الرأي.
- المشاركة والاندماج بمجتمعات تخصصية وأشخاص خبيرة.

إذا بتمشي هالمراحل، أنا بأكدلك إنك رح تتعلّم أكتر مما أنت ذاتك متوقع!
كمية المهارات (soft & hard) والخبرات والآفاق الجديدة يلي رح تنفتح بذهنك وتساهم بتطويرك تفوق الشي يلي وارد تتعلمو بكورس واحد فقط!

بعتقد هلا يمكن أخدت أهم كورس لتتعلّم التسويق (أو غيرو) بتخصصاته ومجاناً! 😉

جازف واطلع من مساحة الأمان تبعك😉
وقتها بس رح تحس كل خلايا دماغك صحيانة، الأدرينالين ألف، الأفق صار أوسع، مفهوم الفشل والنجاح تغيّر، وحتى حياتك رح تكون "مُنعِشة". 😎

نهاركن انتعاش💚

كل الشركات اليوم عم تروح لفكرة الإعلانات المدفوعة وبتهمل فكرة الاهتمام بالـ Organic.
بس هل هالشي قرار حكيم وكافي تسويقياً؟

بعد الاحتكاك بمشاكل تسويقية عديدة عم تعاني منها الشركات بالإمارات وقطر والسعودية، لاحظت أنو دايماً بيكون الخيار الأسرع للاتخاذ من مدير التسويق هو "بدنا نعمل إعلان يجيب مبيعات" أو "بدنا حدا شاطر بإعلانات الـ Generate Leads".
وأول شي بسألهن: الصفحة شغّالة ع الأورجانيك بطريقة صحيحة وصحّية ومستمرة؟
بالغالب بيكون الجواب (لا..) أو (مننشر بس بشكل متقطّع).

✅ شو العقلية الصحيحة اللي لازم تفكّر من خلالها أنت كـ مسوّق رقمي أو خبير سوشال ميديا لتتخذ القرار الصحيح؟

1. أفهم خوارزمية المنصة:
أي منصة سوشال ميديا شغّالة وفق خوارزميات (قادر تقرأ عنها ع جوجل أو مدونة المنصة ذاتها) وهي الخوارزميات هي يلي بتحكم عملية فلترة المحتوى والوصول والتفاعل وحتى كيفية استهداف الإعلانات المدفوعة.

2. صفحة الشركة أصل تسويقي ثمين:
بدك تعتبر صفحة الشركة أصل من أصولها المهمة، مهم تكون نشيطة وعم يننشر محتوى "صديق" للخوارزمية و"حبيب" للشريحة المستهدفة بشكل مستمر ومتطوّر. بحيث تقدر مع الزمن تخلق متابعين دائمين للصفحة وجمهور محتمل من الشريحة المهتمة فعلاً بشركتك ومنتجاتها.

3. تعلّم الخوارزمية لتقدر تعلّمها لاحقاً:
بعد ما تكون عرفت كيف تشتغل خورازمية المنصة، حافظت على صفحتك نشيطة وغنية بالمحتوى، وخلقت قاعدة جماهيرية (ولو متواضعة ولكن مهتمّة حقيقة) بتكون قطعت شوط حلو بأنك تعلّم الخوارزمية مين أنت وشو بتقدّم ومين الشريحة الأهم بالنسبة إلك وهاد جزء جوهري رح تعتمد عليه لاحقاً حتى بإعلاناتك المدفوعة.

4. مرحلة الإعلانات المدفوعة:
بعد ما تكون قطعت المراحل التلاتة، بتقدر تلجأ بفعالية أكبر للإعلانات المدفوعة يلي وارد تبلشها بميزانية صغيرة وتستغل تعب الشهور السابقة عالـ Organic وتروح باتجاه حملات (إعادة الاستهداف) سواء لأشخاص شافو فيديوهات معينة عندك عالصفحة، أو شريحة الـ Lookalike اللي بتعني إنك تقول لخوارزمية الإعلان (بدي استهدف الشريحة اللي بتشبه باهتماماتها الأِشخاص المتابعين لصفحتي مثلاً.
هون وقتها بتكون بلشت توجّه الخوارزمية بالاتجاه الصح وبالتالي بتصير مطمن أكتر للعائد على الاستثمار بإعلاناتك ووارد مع الأيام تزيد بالتدريج ميزانية إعلاناتك (ما تزيدها مباشرة وبشكل أسّي - منحكي ببوست لاحق عن السبب).

طيب بتول أوك.. ليش الشركات ما بتروح لهالخيار؟
- حلو السؤال شكراً إنك سألت! 😁

الشغل على الأورجانيك طويل الأمد وبدو صبر، والإعلانات هي الوسيلة الأقصر والأسرع لتحرّك العجلة.
والسيناريو الحاصل أنو لتقدر تجيب أكبر نفع من الإعلانات بدك media buyer شاطر وشغّال بنفس مجال الشركة وبالسوق لفترة طويلة وعندو خبرة كبيرة بالاستهداف الشريحة الصح وهاد الشي مو دايماً عم يكون متاح أمام الشركات لاعتبارات كتيرة.
مما عم يودّي لسيناريو تاني: إعلانات فاشلة ما بتأدي الغرض، هدر كبيرة بالميزانيات، وبالتالي نظرة سيئة للإعلانات والمسوّقين الشغالين بالمجال على حد سواء. 🙄

** نقطة إضافية:
المتَل السائد تبع (لا تحط كل البيض بسلّة وحدة) هو حقيقة ما لازم تغض نظر عنها، يعني المفروض الشركة -أو أنت كمسوّق- ما تعتمد على السوشال ميديا وإعلاناتها فقط لتجيب زباين محتملين أو Leads. الأفضل تكون شغّال ع أكتر من صعيد ويشتغلو كل الأنشطة التسويقية بشكل متكامل مع بعضها البعض. (هي صار بدها فيديو مو بوست 😄)

*موضوع الليدز منحكي عنو أسا قريباً لأنو كبير وضروري خصوصي بالأزمة الاقتصادية يلي عم تمرق فيها كل الشركات.

💬 بالتعليقات في 2 سكرين شوت (على سبيل المثال لا الحصر) لإعلانات شركات كبيرة معتمدة على قوة استهدافها الأورجانيك لتحقق إعلان مدفوع ناجح.