Coach kamilia kamel

كل عام وانتم بخير ❤️

في زحمة الحياة والضغوط والمسؤوليات… ساعات الإنسان بينسى إن أعظم مشروع في حياته مش الشغل، ولا الإنجاز، ولا حتى الوصول لأهدافه
أعظم مشروع هو: تزكية نفسه.

إنه يحاول كل يوم يبقى أنقى من جواه، أهدى، أصدق، أقرب لربنا، وأكثر وعي بنفسه.

والجميل في الأيام المباركة دي ( العشر من ذي الحجة ) إنها مش بتيجي بس علشان نكتر من العبادات بشكل شكلي، لكنها بتيجي كفرصة حقيقية نراجع بيها قلوبنا وأرواحنا، ونسأل نفسنا:
إيه أخبار علاقتي بربنا؟
إيه أخبار علاقتي بنفسي؟
هل قلبي مطمّن فعلًا… ولا بس مشغول ومجهد؟

ناس كتير بتدور على الراحة النفسية في كل حاجة حواليها، مع إن جزء كبير من السلام الحقيقي بيبدأ من جوا
لما الإنسان يحس إن بينه وبين ربنا صلة حقيقية.
لأن القرب من ربنا مش بس بيشيل حمل مشاكل الحياة، لكنه بيدي الإنسان حاجة أعمق:
الصلابة النفسية.

إنك تعدّي أيام صعبة من غير ما تنهار.
تتوجع لكن ما تفقدش الأمل.
تضيق بيك الدنيا لكن يفضل جواك يقين إن ربنا مش هيسيبك لوحدك.

تزكية النفس مش رحلة كمال، لكنها رحلة صدق ومحاولة مستمرة.
وكل مرة نحاول نفهم نفسنا أكتر، ونعالج ضعفنا، ونتقرب من ربنا بصدق بنكتشف إن جوانا قدرة على التغيير ماكنّاش شايفينها قبل كده.

فما تيأسش من نفسك
وما تبطلش تحاول
يمكن خطوة صغيرة صادقة بينك وبين ربنا في الأيام دي… تغيّر حاجة كبيرة جواك للأبد

شاركني: إيه أكتر حاجة بتحاول تزكّي نفسك فيها الفترة دي ؟




#وعي


#طمأنينة

حاسس كانك في سباق ولا زم تلحق بس انت مش عارف تلحق ايه بالظبط ؟
اهو تلحق وخلاص لان الكل بيجري

كل يوم تشوف حد بدأ مشروع وحد سافر وحد غيّر جسمه، وحد اتغيّرت حياته في ٣٠ يوم

ومع الوقت الإنسان يبدأ يحس إنه متأخر
إنه لازم يجري طول الوقت
لازم ينجز أسرع
يتغير أسرع
يوصل أسرع

لكن الحقيقة؟
مش كل تأخير معناه إنك فاشل

وفي وسط دوشة المقارنات دي
بتيجي العشر من ذي الحجة كأنها رسالة
“اهدأ واقترب.”

ربنا ما طلبش منك تبهر الناس
ولا تعيش مستنزف عشان تثبت إنك ناجح
لكن طلب منك خطوات صادقة
ركعتين بخشوع
ذكر من القلب
صدقة صغيرة
نية طيبة
وقلب مطمن يحاول يرجع له

العشر من ذي الحجة مش ايام عادية
دي احب الايام الى الله
هي موسم للسكينة وسط عالم بيجري و مستعجل

مش لازم تعمل كل حاجة دفعة واحدة
ولا تلحق كل الناس
أحيانًا أعظم الطاعات
إنك تبطّئ قليلًا
وتسمع روحك
وترجع لقلبك
وترجع لربنا بدون استعجال

ولو حاسس إن الدنيا بتسحبك طول الوقت للجري
يمكن دي إشارة إن روحك محتاجة تهدى وتقرب اكثر لربنا مش سرعة وجري وتذكر ان الدنيا ساعة وليست خلود

الان حان الوقت للعمل اكتب خطة بسيطة مرنة تناسب ظروفك للعشر من ذي الحجة

وكن مع الركب الذي يسعى للجنة ولو باقل القليل

ولا تكن مع الذين ضل سعيهم في الحياة الدنيا






#وعي

يمكن تعبك مش لأن الحياة ضدك…
يمكن لأنك شايفاها من زاوية بتوجعك.

انهاردة وأنا ماسكة الماوس، فجأة لقيت إن السهم على الشاشة مش بيتحرك صح

كل ما أحاول أتحكم فيه، يروح في الاتجاه العكسي.

توترت، وافتكرت إن الماوس باظ.

لكن لما بصّيت كويس
اكتشفت إني أنا اللي ماسكاه بالعكس.

وده بالضبط اللي بيحصل مع ناس كتير في حياتهم.

تفضلي تحاولي تصلّحي شغل، أو علاقة، أو نفسية،
وتفتكري إن المشكلة في الدنيا
في الناس
في الظروف
في الحظ

مع إن أحيانًا المشكلة مش في اللي حواليكي،
المشكلة ممكن تكون إنك بتتعاملي مع نفسك بالطريقة الغلط.

بتضغطي على نفسك طول الوقت وتستغربي ليه تعبانة.

بتحاول ترضي الكل وتستغربي ليه مستنزفة.

بتكتمي مشاعرك وتستغربي ليه مخنوقة.

بتعيشي بدور مش دورك… وتستغربي ليه حاسة إنك تايهة.

أوقات كتير…
أول خطوة للتحسن مش إننا “نغيّر حياتنا”.
لكن إننا نمسكها صح.

✨ اسألي نفسك النهارده
إيه أكتر شيء اكتشفتي مؤخرًا إن المشكلة ماكنتش فيه… لكن في الطريقة اللي كنتِ شايفاه أو بتتعاملِي بيها؟

اكتبي كلمة ( تغيير ) وهبعتلك ملف فيه خمس خطوات سهلة تساعدك

#اكسبلور

#وعي



#الوعي
#مشاعر
#حياتك
#تغيير
#تحفيز

الصبح البوتاجاز مش راضي يشتغل
أول فكرة؟ “اليوم باظ!”

بس الحقيقة؟
اكتشفت ان الغاز مش عندي أنا بس اللي مش شغال
المشكلة في العمارة كلها.

طب أعمل إيه؟
أقعد مستنية؟ أتوتر؟ أقول مفيش فطار؟

ولا أستخدم اللي شغال فعلاً؟

توستر ✔️
ميكروويف ✔️
كاتل ✔️

وفعلا الفطار اتعمل عادي جدًا بالحاجات المتاحة

الفكرة مش في البوتاجاز.
الفكرة في عقلك وهو بيقرر:
“هل في حلول؟ ولا خلاص أقفل اليوم؟”

إحنا بنعمل كده في حياتنا كل يوم
أول ما حاجة تقف
علاقة، شغل، فرصة، مزاج، طاقة

بنقرر إن “كل حاجة وقفت”.

مع إن الحقيقة:
في حاجات تانية شغالة… بس إحنا مش شايفينها.

يمكن باب اتقفل
بس في أبواب كتير مفتوحة بس انتي مركزة بس على المقفول.

يمكن شخص خذلك…
بس في ناس واقفة جنبك وانتِ مش شايفهم.

يمكن طاقتك قليلة…
بس لسه عندك القدرة تعملي حاجة بسيطة تحركك.

الحياة مش بتقف
إحنا اللي بنقف عند أول عطل.

دلوقتي
اكتبي 3 حاجات في حياتك “شغالة”
حتى لو صغيرة جدًا والكلام هنا مش على الادوات

وشوفي هتبدأي تتحركي ازاي من المتاح مش المفقود.

قوليلي في الكومنت:
إيه الحاجة اللي كانت “مش شغالة” في حياتك…
واكتشفتي بعد كده إن في بدائل؟

ولو حاسة إنك واقفة ومش شايفة أي حلول

ابعتِلي كلمة “حركة” في الرسائل

ونشتغل سوا على إنك تخرجي من حالة الجمود وترجعي تمشي خطوة بخطوة بثقة ووضوح

مش كل حاجة محتاجة تتحارب… في حاجات محتاجة تتساب ورا ظهرك

في لحظة معينة في حياتك، هتكتشفي إن أكبر استنزاف ليكي
مش من اللي بيحصل
لكن من محاولتك إنك تتحكمي في كل حاجة.

بتحاولي تتحكمي في:
ردود الناس
مشاعرهم
قراراتهم
اللي حصل واللي كان المفروض يحصل

ولما تفشلي (وده طبيعي)
بتدخلي في دايرة تعب مالهاش نهاية.

✨ هنا بقى الفرق الحقيقي يبدأ:

في حاجات جوا دايرة تأثيرك
وفي حاجات براها تمامًا

🟢 دايرة تأثيرك

* رد فعلك
* طريقة تفكيرك
* اختياراتك
* حدودك
* تفسيرك للأحداث
* قرارك إنك تكمّلي أو تقفي

دي المساحة اللي لو اشتغلتي عليها… حياتك هتتغير فعلاً.

🔴 برا دايرة تأثيرك:

* الناس هتفكر فيكي إزاي
* حد يحبك أو لا
* الماضي
* ظروف حصلت بالفعل
* مزاج الآخرين
* ردود أفعالهم

كل ما بتحاولي تتحكمي في الحاجات دي
كل ما بتخسري طاقتك… وبتبعدي عن سلامك النفسي .

✨ التغيير الحقيقي:

مش إن الحياة تبقى مثالية…
لكن إنك تبقي هادية من جواكي حتى وهي مش مثالية.

إنك تمشي للامام. مش تقاومي كل حاجة.
تفهمي… مش تتحكمي.
ترخي ايدك عن الحاجات اللي مش في ايدك تغييرها … مش تمسكي في كل حاجة

تمرين هيساعدك جدا تشوفي الحقيقة

اكتبي موقف مضايقك دلوقتي
وقسمي الصفحة لنصين:
جاوبي على السؤالين دول
1. إيه اللي أقدر أتحكم فيه؟
2. إيه اللي لازم أسيبه ومش في ايدي اعمل فيه حاجة ؟

وهتتفاجئي قد إيه كنتِ شايلة فوق طاقتك 💔

قولّي في الكومنت:
أكتر حاجة كنتي بتحاولي تتحكمي فيها وهي أصلاً برا دايرة تأثيرك؟

لو حاسة إنك شايلة فوق طاقتك…
ومش عارفة تفرّقي بين اللي في ايدك واللي لازم تسيبيه،

ممكن نشتغل على ده سوا في جلسة خاصة تساعدك ترجعي لنقطة هدوءك من جديد 🤍
ابعتِلي كلمة “جلسة” وحبعتلك التفاصيل

رحلة البحث عن نفسك الضايعة جوه علاقة هي أصعب وأهم مشوار ممكن تاخديه في حياتك والسؤال الحقيقي هنا هو امتى اختفيتي من حياتك وبقت كل دنيتك بتلف في ساقية شخص تاني وليه سمحتي لروحك تبهت وشغفك ينطفي وانتي بتحاولي ترضي طرف تاني على حساب كيانك

انتي بقيتي بتختاري السكوت عشان تتفادي الزعل وبقيتي بعيدة عن صحابك اللي كانوا بيشبهوكي وقللتي من طموحاتك وهواياتك لحد ما نسيتي انتي مين أصلا والمشكلة الحقيقية مش دايما بتكون فيه هو لكن المشكلة إنك ربطتي قيمتك وحالتك المزاجية برضاه عنك وفقدتي بوصلتك الشخصية

تضييع نفسك عشان حد مش دليل حب لكنه دليل على فقدان التوازن النفسي والحل بيبدأ بخطوات صغيرة وموجعة في الأول لكنها بتحررك في الآخر ارجعي لنفسك من تاني واتعلمي تقولي لأ حتى لو في حاجات بسيطة وخصصي وقت لحاجة انتي فعلا بتحبيها بعيد عن اهتماماته وارجعي تواصلي مع الناس اللي بيقدروكي لشخصك مش لكونك شريكة فلان

استرجاع هواياتك وصحابك وشغفك هو اللي هيرجعلك تقلك وقيمتك في عين نفسك وفي عين اللي معاكي لأن الست اللي ليها حياة وأهداف واضحة هي اللي بتقدر تبني علاقة صحية ومتوازنة مبنية على الشراكة مش على الذوبان والتبعية الكاملة

لو حاسة إنك تهتي في النص ومش عارفة ترجعي للطريق أو مش فاكرة ملامح نفسك القديمة ابعتي رسالة دلوقتي وتعالي نشتغل سوا خطوة بخطوة عشان نسترد كل اللي ضاع منك ونبني ليكي شخصية قوية وعلاقة سوية تحترم وجودك وكيانك

#الحب # #الإحتواء #الشغف #قيمتك #اهتماماتك