26/05/2026
Die ADHD kind is nie stout nie
deur Albie Jordaan
(Christian Life and Parenting Coach)
Baie kinders met ADHD word elke dag verkeerd verstaan. Hulle word beskryf as “ongedissiplineerd”, “lui”, “moedswillig”, “onbeskof” of eenvoudig net “stout”. Maar baie keer is dit glad nie die volle waarheid nie.
ADHD gaan nie net oor aandag nie. Dit gaan grootliks oor selfregulering en uitvoerende funksies van die brein. Met ander woorde: die kind sukkel nie noodwendig om te weet wat reg is nie… die kind sukkel om dit konsekwent uit te voer. Dit is ’n baie groot verskil.
Baie ADHD kinders hoor heeltyd dinge soos: “Jy luister nie.” “Jy probeer nie hard genoeg nie.” “Jy vergeet alles.” “Hoekom doen jy dit alweer?” Maar wat ouers en onderwysers baie keer nie sien nie, is die innerlike stryd wat daardie kind elke dag beleef.
Die ADHD brein sukkel dikwels met impulsbeheer, emosionele regulering, fokus, organisering, tydsbestuur, werksgeheue en die vermoë om reaksies te beheer voordat hulle gebeur. Dit beteken die kind reageer baie keer voordat hy dink. Nie omdat hy noodwendig stout wil wees nie… maar omdat die brein se “remstelsel” swakker werk.
Dit is hoekom baie ADHD kinders later spyt is oor wat hulle gedoen het. Hulle sê dikwels: “Ek weet nie hoekom ek dit gedoen het nie,” of: “Ek wou dit nie doen nie.”
Baie van hierdie kinders leef ook onder geweldige emosionele druk. Hulle hoor heeldag negatiewe kommentaar. Hulle word baie reggehelp. Hulle voel anders as ander kinders. Hulle beleef mislukking meer gereeld. En baie begin later glo: “Ek is die probleem.” Dit raak ’n pynlike identiteit.
Daarom is dit gevaarlik wanneer ons ADHD kinders net as “stout” etiketteer. Want ’n kind wat konstant voel hy is verkeerd, begin maklik moed verloor.
Dit beteken natuurlik nie dat kinders met ADHD geen grense nodig het nie. Inteendeel. Hulle het dikwels nóg meer struktuur, duidelike roetines, kalm leiding, konsekwente grense en emosionele ondersteuning nodig.
Maar daar is ’n groot verskil tussen: “Hierdie kind is stout” en: “Hierdie kind sukkel met vaardighede wat nog ondersteuning nodig het.” Daardie verskil verander hoe ons na die kind kyk.
Wanneer ons verstaan dat ADHD baie keer ’n selfreguleringsuitdaging is, begin ons anders reageer. Ons beweeg weg van om 'n kind sleg te laat voel oor hulleself, aggressie en konstante straf… na begrip, leiding, emosionele 'connection', vaardigheidsontwikkeling en ondersteuning.
Baie ADHD kinders is ongelooflik kreatief, sensitief, energiek, nuuskierig, humoristies en vol potensiaal. Maar hulle benodig volwassenes wat verder kyk as net die gedrag.
Kinders doen beter wanneer hulle ondersteuning kry vir die vaardighede waarmee hulle sukkel.
Die ADHD kind is nie noodwendig stout nie. Baie keer is dit ’n kind wat harder probeer as wat mense besef… maar wie se brein hulp nodig het om dinge te bestuur wat vir ander mense vanself kom.
👉🏻14-dae Whatsapp Kursus: VERSTAAN ADHD EN BEGELEI JOU KIND -Albie Jordaan
https://www.facebook.com/share/p/1Em4QB2Xzm/
👉🏻Vir persoonlike aanlyn sessies om ouers te help:
https://www.elcty.co.za/book-sessions/
