Hoërskool Strand Oud Skoliere Bond

60 jaar reunie

Die Matrieks van 1966 (Eerste matriekklas van Strand Hoërskool) hou DV die 13 en 14 Maart hulle 60 jaar reunie.
Ons is maar min wat nog kan, maar die groepie kom wel op 13 Maart om 18:30 by Ruimte Sentrum (waar die skool op 2 Feb 1962 begin het) bymekaar vir 'n gesellige braai, en dan ook weer op 14 Maart om 09:30 vir ontbyt by Bossa, Strand.
Ongelukkig, as gevolg van besige skedule aan die skool se kant, is daar nie 'n besoek aan die skool geskeduleer nie. Ietwat van 'n teleurstelling, maar ons verstaan.
Indien daar iemand is wat belangstel om die Vrydag-aand se braai by te woon, skakel my asseblief by 082 460 6638 of ePos by [email protected].

Groete

Piet du Toit
082 460 6638
Matriek 1966

https://www.facebook.com/share/p/17kSxfZWQq/

Die Hoërskool Strand groet mnr. Andries Louw

Andries Louw is ‘n legende wat deur baie leerders, ouers en personeel geëer word vir sy onbaatsugtige diens aan die Hoërskool Strand. Hy was nie net ’n onderwyser nie - hy het generasies gevorm. Sy klaskamer was ‘n veilige hawe en ‘n plek van ontdekking waarin leerders kon leer van Afrikaans, boeke, die lewe – en ja, selfs van die wynkultuur. Leerders het meer as net taal by hom geleer; hulle het geleer om fyn te kyk, mooi te luister en met integriteit te leef.
Sy goeie verhouding met die leerders blyk duidelik uit die kontak wat hy nou nog met oudleerders het. Hy het menige leerders geïnspireer om hulle drome uit te leef en baie van hulle spog vandag as dokters, wynmakers en skrywers. Elkeen sal sonder huiwering sê dat hy ’n rol gespeel het in wie hulle geword het.
Sy betrokkenheid buite die klaskamer was net so merkwaardig. Hy was vir 38 jaar betrokke by rugby en krieket as afrigter, skeidsregter, spanbestuurder of bloot die lojale ondersteuner wat nooit ’n wedstryd mis nie. Hy het ook kultuurgeleenthede en skoolfunksies met soveel entoesiasme bygewoon dat dit eenvoudig nie dieselfde sonder hom gaan wees nie. As seremoniemeester het hy elke funksie met warmte, humor en styl aangebied. Sy jarelange diens op die beheerliggaam is ook ‘n bewys van die vertroue wat kollegas en die gemeenskap in hom gestel het.
Paul Valéry se woorde, “A great man is one who leaves others at a loss after he is gone,” beskryf hom perfek. Die leemte wat hy laat, getuig van die enorme waarde wat hy tot die Hoërskool Strand toegevoeg het.
Mnr. Louw, ons onthou jou met dankbaarheid, respek en groot waardering. Jy sal vir baie jare nog deel van ons stories – en ons harte – wees. En jy sal gewis gemis word.

Baie baie Geluk!!

Hoërskool Strand sluit amptelik aan by Noord-Suid Rugbytoernooi

Hoërskool Strand is trots om aan te kondig dat ons amptelik genooi is vir deelname aan die 2026 Noord-Suid Rugbytoernooi by die Afrikaanse Hoër Seunskool (Affies) in Pretoria.
Hierdie toernooi is een van die mees gesogte en glansryke skolerugby kompetisies.
Hierdie is ’n groot mylpaal vir ons rugby-ontwikkelingsprogram en bewys die merkwaardige groei die afgelope paar jaar.

’n Kernfaktor van ons vooruitgang is die SA rugby-afrigters wat as konsultante by ons ontwikkelingsprogram betrokke is en aktief help om toekomstige talent te identifiseer en te ontwikkel. Hierdie samewerking verseker dat Hoërskool Strand se spelers toegang het tot kundigheid op die hoogste vlak.

Hoërskool Strand is besonder trots om op meriete nou deel te wees van hierdie Noord-Suid elite platform.
2026 gaan ’n merkwaardige seisoen wees. Die Arende vlieg nou hoër – en Hoërskool Strand is slaggereed om ons skoolgemeenskap met trots en passie te gaan verteenwoordig.

Suzuki Helderberg
Rest Assured
BUCO Somerset West

Ons innige meegevoel aan Wilhelm Coetzee, Matriek 1985, se familie, vriende en kollegas met sy heengaan.
Die Arende familie rou saam met julle.

HOËRSKOOL STRAND KFC 7’S RUGBYTOERNOOI 2025
Kom ondersteun ons jaarlikse Sewes Rugbytoernooi by Hoërskool Strand – ’n dag propvol aksie, talent en spangees!
32 spanne ding mee om as kampioespan aangewys te word in die o/15- en o/17 �ouderdomsgroep.
16 skole neem deel aan hierdie spogtoernooi waar jong talent uitgestal word!
📅 Datum: 13 September 2025�📍 Plek: Hoërskool Strand�⏰ Tyd: 08:00-17:00�🍗 Hoofborg: KFC – dankie vir julle ondersteuning!

Bring die hele gesin
vir ’n dag van aksievolle hardlooprugby, goeie kos, musiek en onvergeetlike oomblikke.
Almal is welkom – ons sien jou daar!

KFC

Ons innige meegevoel aan Riaan Truter se familie en vriende met sy heengaan.
Die Arende familie rou saam met julle.

Baie Geluk aan al hierdie spelers sowel as die afrigters!! Ons is uiters trots op julle en julle prestasies!

Uitstaande rugbyprestasies tydens Junie-vakansie

Tydens die afgelope Junie-vakansie het verskeie van ons leerders landwyd aan provinsiale rugbytoernooie deelgeneem en uitstekend presteer.
Ons O/19 Disa-spelers het aan die Reitz-week in die Vrystaat deelgeneem, waar hulle baie goed gevaar het. Kealan Milton is aangewys as die beste linkervleuel van die toernooi – ’n besondere prestasie. In die 7’s-rugbygedeelte van die week is Justin Phillips en Kealan Milton ook gekies as die beste 7’s-spelers van die toernooi.
Die O/16 Disa-span het in Frankfort aan die VKB-week deelgeneem waar die Disas vir die eerste keer in die geskiedenis die toernooi gewen het. In die finaal het die span met 31-0 teen Natal geseëvier – ’n indrukwekkende oorwinning.
● DC Fourie is aangewys as die beste agsteman van die toernooi en is opgeneem in die toerspan wat later vanjaar na Namibië reis.
● Shakeel Adams is ook beloon vir sy puik spel en is ingesluit in die VKB-span. (nie-reisend)
Ons is veral trots op Preston-Lee Tobias, wat vir die O/16 WP Grant Khomo-span in Pretoria uitgedraf het – die grootste vertoonvenster vir opkomende spelers. Preston het uitstekend gespeel en bewys dat volharding en harde werk beloon word.
👉 Ons spog met 18 spelers wat vanjaar in hoë vlak verteenwoordigende spanne ingesluit is. Die Arende belê in spelers om te presteer!
👏 ’n Spesiale gelukwensing aan ons drie afrigters wat self ook by die spanne betrokke was:
● Mnr. Kieron van der Merwe (Disas O/19)
● Mnr. Marcus Pretorius en mnr. Shaun Prins (Disas O/16)

Ons innige meegevoel aan Sandra ne haar familie en vriende.