27/06/2026
✍️"দুলীয়াজান ছোৱালী মহাবিদ্যালয়ত NSS Unit -ৰ সপ্তাহজোৰা শিৱিৰৰ সফল সামৰণি"।
২০ জুনৰপৰা ২৬ জুন,২০২৬ লৈকে দুলীয়াজান ছোৱালী মহাবিদ্যালয়ত,মহাবিদ্যালয়ৰ NSS Unit ৰ উদ্যোগত ৭ দিনীয়া এক বিশেষ NSS শিৱিৰ অনুষ্ঠিত হৈ যায়। মহাবিদ্যালয়ৰ হিন্দী বিভাগৰ মুৰব্বী, সহকাৰী অধ্যাপক তথা NSS Unit টোৰ তত্বাৱধায়ক শ্ৰীযুত অমৃত চন্দ্ৰ কলিতাৰ তত্বাৱধানত মহাবিদ্যালয়ৰ ৩০ গৰাকী ছাত্ৰীয়ে এই শিৱিৰত ভলানটীয়াৰ হিচাপে অংশগ্ৰহণ কৰে।এই সাতোটা দিনতে তেওঁলোকে NSS ৰ মূলমন্ত্ৰ "NOT ME BUT YOU" ক লক্ষ্য হিচাপে লৈ বিভিন্ন কাৰ্যসূচী সম্পাদন কৰে। তেওঁলোকৰ কাৰ্যসূচীয়ে সামৰি লোৱা কামসমূহৰ ভিতৰত আছিল মহাবিদ্যালয়ৰ চৌহদৰ ভিতৰভাগ পৰিস্কাৰ-পৰিচ্ছন্ন কৰাৰ লগতে দাতিকাষৰীয়া বাট-পথৰো পৰিস্কৰণ। তেওঁলোকে দাতিকাষৰীয়া কেইবাখনো বিদ্যালয় আৰু সামাজিক অনুষ্ঠানৰ চৌহদত বৃক্ষৰোপনো কৰে। তদুপৰি, ভিতৰুৱা কেতবোৰ অঞ্চলৰ মানুহৰ ঘৰে ঘৰে গৈ প্ৰয়োজনীয় সজাগতামূলক বাৰ্তা প্ৰদান কৰি কিছুমান সমস্যা কেনেকৈ দূৰ কৰিব পাৰি তাৰো পথ দেখুৱায়। শিৱিৰত NSS ভলানটীয়াৰ হিচাপে অংশগ্ৰহণ কৰা প্ৰতিগৰাকী ছাত্ৰীয়েই খুব সক্ৰিয়ভাৱে কেউটা দিন তেওঁলোকৰ কৰ্ম সম্পাদন কৰে। তত্বাৱধায়ক শ্ৰীযুত অমৃত চন্দ্ৰ কলিতাৰ লগতে এই কেউটা দিনতে ছাত্ৰীসকলৰ লগতে থাকি তেওঁলোকক উৎসাহ আৰু প্ৰেৰণা যোগায় মহাবিদ্যালয়ৰ অন্য দুজন সহকাৰী অধ্যাপক শ্ৰীযুত পঙ্কজ ৰাজগুৰু আৰু শ্ৰীযুত প্ৰশান্ত গগৈয়ে।
২০ জুনত আৰম্ভ হোৱা শিবিৰটোৰ আৰম্ভণী অনুষ্ঠানত উপস্থিত থাকি মহাবিদ্যালয়ৰ অধ্যক্ষ ড০ উৎপল সূতে একোখন মহাবিদ্যালয়ত NSS Unit একোটাৰ গুৰুত্ব যে বহুত বেছি,সেই সম্পৰ্কত তেওঁৰ মনৰ ভাৱ আৰু আগতে লাভ কৰা তেওঁৰ অভিজ্ঞতা ব্যক্ত কৰে।সামৰণি অনুষ্ঠানটোত তেওঁ শিবিৰটোৰ সফল সমাপ্তিত সকলোলৈকে অভিনন্দন আৰু শুভকামনা জ্ঞাপন কৰে। তেওঁ NSS ভলানটীয়াৰসকলৰ লগতে মহাবিদ্যালয়ৰ সকলো ছাত্ৰীকে পঢ়া-শুনাৰ লগতে সময়ানুৱৰ্তীতা, নিয়মানুৱৰ্তিতা আৰু শৃংখলাবদ্ধতা অটুত ৰাখি কেৱল নিজৰ বাবেই নহয়,সমাজৰ বাবেও কাম কৰি যাবলৈ পৰামৰ্শ আগবঢ়োৱাৰ লগতে আহ্বান জনায়।
২৬ জুন তাৰিখটো যিহেতোকে "International Day against Drug Abuse and Illicit Trafficking" হিচাপে উদযাপন কৰা হয়, সেয়েহে,দিনটোৰ সৈতে সংগতি ৰাখি অধ্যক্ষ মহোদয়ে ছাত্ৰীসকলক এই বেয়া অভ্যাস আৰু বেয়া আচৰণবোৰ পৰিহাৰ কৰি চলিবলৈ পৰামৰ্শ আগবঢ়ায়। অনুষ্ঠানটোৰ শেষত শিৱিৰত অংশগ্ৰহণ কৰা সকলো ছাত্ৰীকে একোখনকৈ মানপত্ৰ বিতৰণ কৰাৰ লগতে দুগৰাকী শ্ৰেষ্ঠ ভলানটীয়াৰ বিচাৰি উলিয়াই তেওঁলোকক শ্ৰেষ্ঠতাৰ মানপত্ৰ প্ৰদান কৰা হয়।
