Dr. Shahram Ali Kazho

بانگەوازێك لە فراكسیۆنی پارتی دیموكراتی كوردستان لە پەرلەمانی كوردستان

بۆ كۆمەڵگای نێودەوڵەتی و ڕای گشتی

ئێمە لە فراكسیۆنی پارتی دیموکراتی کوردستان لە پەرلەمانی كوردستان، بەنیگەرانییەكی زۆرەوە لە دوایین ڕووداو و پەرەسەندنەكانی سوریا و ڕۆژئاوا دەڕوانین، ڕەچاونەكردنی تایبەتمەندی و مافەكانی گەلی كورد لە سووریا و پەرەسەندنی ئاڵۆزی و شەڕ و پێكدادان لەدژی گەلی كورد دەبێتە هۆی تێکدانی ئاشتی و ئارامی ئەو ناوچانە و ئەگەری ئاوارەیی و ڕوودانی كارەسات و نەهامەتی و پاكتاوی ڕەگەزی بۆ خوشك و براكانمان لە رۆژئاوا لێ دەكەوێتەوە. لە لایەكی ترەوە گەلی كورد لە رۆژئاڤا لەسەر زێد و خاكی خۆی، لەپێناو برایەتی و یەكسانی و پاراستنی مافەكانی مرۆڤ و دژایەتیی ستەم و تیرۆر تێكۆشاوە و، لەساڵانی ڕابردوودا، لە شەڕی دژی تیرۆردا قوربانیی زۆری داوە. ئەو بارودۆخەی ئێستا لە سووریا لەئارادایە، دەبێتە هۆی ئەگەری سەرهەڵدانەوەی داعش و تیرۆر كە ئەمە خۆی لەخۆیدا هەڕەشەیەكی زۆر جدییە لەسەر سەقامگیری و ئاساییشی ناوچەكە.

فراکسیۆنی پارتی لەپەرلەمانی كوردستان لەژێر ڕۆشنایی ڕوانگە و هەوڵەكانی سەرۆك بارزانی بۆ پاراستنی گەلی كورد لە ڕۆژئاوا و لە سۆنگەی هەست كردن بە بەرپرسیارێتیی نەتەوەیی و نیشتیمانی، داواکارە کۆمەڵگەی نێودەوڵەتی و هاوپەیمانان لەئاست بەرپرسیارەتییاندابن و هەنگاوی کاریگەر بنێن بۆ ڕاگرتنی دەستبەجێی گرژی و شەڕو پێكدادانەكان لە سووریا و ڕێگریكردن لە قووڵتووتربوونی قەیران و هەروەها ڕێگریكردن لە سەرهەڵدانەوەی داعش و تیرۆر و توندڕۆیی.

داوا دەكەین دەستبەجێ كۆتایی بە شەڕ لەدژی خوشك و براكانمان لە سووریا بهێندرێت و كێشەكان لەڕێگەی دیالۆگ و بە شێوازی ئاشتیانە چارەسەر بكرێن و لە سووریایەكی ئازاد و دیموكراتدا مافی هەموو پێكهاتەكان و مافەكانی گەلی كورد لە سووریا بەپێی یاسا و دەستوور گەرەنتی بكرێن.



فراكسیۆنی پارتی دیموكراتی كوردستان لە پەرلەمانی كوردستان

20/ 1/ 2026

پەیامێک لە سەرۆک بارزانییەوە

بەناوی خودای مەزن و دلۆڤان

سەبارەت بە دوایین پەرەسەندن و گۆڕانكارییەكانی سووریا و لە چوارچێوەی هەوڵدان بۆ چارەسەركردنی كێشەكان، دوێنێ كۆبوونەوەیەكی هاوبەشی گرنگمان لەگەڵ نێردەی تایبەتی سەرۆك ترامپ بۆ كاروباری سووریا و فەرماندەی گشتیی هێزەكانی سووریای دیموكرات و سەرۆكی ئەنەكەسە هەبوو.

هیوادارین بە زووترین كات ئەو شەڕ و ئاڵۆزی و گرژییانە ڕابگیرێن كە ئێستا لەنێوان هێزەكانی حكوومەتی سووریا و هێزەكانی سووریای دیموكرات لە ئارادایە و هەموو لایەك بۆ ئەو ڕێككەوتنانە بگەڕێنەوە كە پێشتر بۆ چارەسەركردنی كێشەكان و گەییشتن بە سەقامگیری لەنێوان لایەنەكانی سووریا بەستراون. هەروەها دەرچوونی مەرسوومی سەرۆكی سووریا لەبارەی مافەكانی كورد بە هەنگاوێكی ئیجابی و ئاراستەی دروست دەزانین و هیوادارین ببێتە زەمینەیەك بۆ ئەوەی بە ڕەزامەندیی لایەنە پەیوەندیدارەکان دەوڵەمەند بکرێت و بە شێوەیەکی یاسایی و دەستوری، گەرەنتیی مافەكانی گەلی كوردی لەسەر بنیات بنرێت.

مسعود بارزانی
۱۸ی کانوونی دووەمی ۲٠۲٦

زۆر سوپاس بۆ دەزگای خێرخوازی بارزانی کە لە سەر ڕاسپاردەو فەرمانی جەنابی سەرۆک بەهانای لێقەوماوانی کارەساتی لافاوی چەمچەمال و دەوروبەری چوون.
دەستتان خۆش بێت ستافی دەزگای خێرخوازی بارزانی
لەهەر چوار پارچەی کوردستان شوێن دەست و پەنجەی ڕەنگینی هاوکاری و بەهاناوەچوونتان دیارە.
وەکوو هەمیشە سەربەرزن و جێگای شانازین
هەر سەرکەوتوو و تەندروست بن

پێویستیمان بە یاسایەکی بەهێزی پاراستنی ئاسایشی هەرێمی کوردستان هەیە.
ناکرێت چەتە و مافیا ناوخۆیی و دەرەکیەکان بە ڕۆژی ڕووناک و بە ئاشکرا هەڕەشە لە هەرێم و هاوڵاتیانمان بکەن و دواتر هەڕەشەکان ڕێک وەکوو خۆی جێبەجێ بکەن وە ئێمەش یاسایەکمان نەبێت تاکوو خێراو وەکوو پێویست وەڵامیان بدەینەوە یاخود ترس لە جێبەجێ کردنی یاسا ببێتە ڕێگر لەبەردەم هەڕەشە وکار و نییەتی تیرۆریستانەیان.
یاسایەک تاکوو دەستی حکومەتی هەرێم واڵا بکات لە بەکارهێنانی هەموو ئامرازێک بۆ پاراستنی هاوڵاتیان و دامودەزگا هەستیارەکانی هەرێمی کوردستان.
یاسایەک بۆ دەستنیشان کردن و دەستگیرکردنی هەموو ئەوانەی بە وشەیەکیش دەبنە هەڕەشە بۆ ئاسایش و شەرعیەتی قەوارەی هەرێمی کوردستان.
ئەم بابەتە کاری هەرە لەپێشینەمان دەبێت لە پەرلەمانی کوردستان
د. شەهرام عەلی کەژۆ
ئەندامی پەرلەمانی کوردستان

ئەمڕۆ
کۆبونەوەی فراکسیۆنی پارتیمان لە پەرلەمانی کوردستان لە باڵەخانەی پەرلەمان.