Vidya Mandir Marathi Primary,Dahisar East

विद्या मंदिर मराठी प्राथमिक शाळा.
नमस्कार🙏
शाळेत गुढीपाडवा हा सण अत्यंत उत्साहात आणि विविध उपक्रमांद्वारे साजरा करण्यात आला. हिंदू नववर्षाची सुरुवात आणि गुढीपाडवा या सणाचे औचित्य साधून
स्नेहभोजनाचे आयोजन करण्यात आले होते. सर्वांनी एकत्र बसून स्वादिष्ट पारंपरिक पदार्थांचा आस्वाद घेतला.
या साजरी करणाचे काही क्षणचित्रे.....

विद्यामंदिर मराठी प्राथमिक शाळा.
नमस्कार🙏
दि. २६ फेब्रु. २०२६
आमच्या शाळेत विद्यार्थ्यांच्या सहभागातून एक आगळावेगळा आणि उपयुक्त उपक्रम राबविण्यात आला. विद्यार्थ्यांच्या मदतीने लालमाठ, वांगी, टोमॅटो,पुदिना,मेथी,पालक फुलझाडे व औषधी वनस्पती इत्यादींचे रोपण करून परसबाग तयार करण्यात आली. लावलेल्या भाज्यांची पूर्ण वाढ झाल्यानंतर विद्यार्थ्यांनी भाज्यांची खुडणी केली.
विद्यार्थ्यांनी स्वच्छता, नियोजन आणि संघभावना यांचे उत्कृष्ट उदाहरण दाखवत भाज्या निवडल्या. योग्य पद्धतीने भाजी तयार करून घेतली. तयार केलेली भाजी मुलांना खाऊ घालण्यात आली. मुलांनी आवडीने भाजीचे सेवन केले.
या संपूर्ण प्रक्रियेमुळे विद्यार्थ्यांमध्ये आत्मविश्वास, जबाबदारीची जाणीव आणि आरोग्याबद्दलची जागरूकता निर्माण होण्यास नक्कीच मदत होईल. या उपक्रमाची काही क्षणचित्रे.....

नमस्कार🙏
विद्यामंदिर मराठी प्राथमिक विभाग
१८ फेब्रुवारी २०२६ रोजी शाळेत छत्रपती शिवाजी महाराज यांची जयंती मोठ्या उत्साहात साजरी करण्यात आली. शिवरायांची टाळ व लेझीमच्या गजरात, जयजयकार करत मिरवणूक काढण्यात आली. कार्यक्रमाची सुरुवात महाराजांच्या प्रतिमेला पुष्पहार अर्पण करून व दीपप्रज्वलनाने केली.
विद्यार्थ्यांनी शिवाजी महाराजांच्या जीवनावर आधारित भाषणे, कविता व पोवाडे, शिवरायांच्या जीवनातील काही प्रसंगावर आधारित गीते व नृत्य सादर करून पूर्ण जीवनपट उभा केला. विद्यार्थ्यांनी शिवकालीन वेशभूषा परिधान करून छोटेखानी नाटिका सादर केली. या कार्यक्रमातून विद्यार्थ्यांना शिवाजी महाराजांचे धैर्य, शिस्त, स्वाभिमान आणि राष्ट्रप्रेम समजले.गारदने कार्यक्रमाची सांगता झाली. याची काही क्षणचित्रे...

विद्या मंदिर मराठी प्राथमिक शाळा
दि. २०/०१/२०२६
सावित्रीच्या लेकी – लेक वाचवा, लेक जगवा या राज्यस्तरीय अभियानाच्या अनुषंगाने समाजामध्ये मुलींच्या शिक्षणाबाबत, सुरक्षिततेबाबत तसेच स्त्री-पुरुष समानतेबाबत जनजागृती व्हावी या उद्देशाने विविध उपक्रमांचे आयोजन करण्यात येत आहे. याच उपक्रमांचा एक भाग म्हणून शाळेमध्ये पालकांसाठी रांगोळी स्पर्धेचे आयोजन करण्यात आले होते. या स्पर्धेत पालकांनी सुरेख रांगोळ्या काढण्याचा प्रयत्न केला.
प्रथम तीन क्रमांक व उत्तेजनार्थ पारितोषिक देऊन कौतुक करण्यात आले.
अशा उपक्रमांमुळे शाळा व पालक यांच्यातील नाते दृढ होण्यास मदत होते, तसेच पालकांच्या कलागुणांनाही वाव मिळतो. हेतूपुरस्सर आयोजित केलेल्या स्पर्धेची काही क्षणचित्रे....