Departamenti i Gruas - KBI Rahovec

17/09/2026

Në Qendrën Kulturore Islame në Rahovec u shënua një tjetër moment i veçantë dhe i gëzueshëm, ku Fatmire Hoxha bëri hapin e saj të parë në leximin e Kur’anit.

Ky moment ishte veçanërisht emocionues, duke pasur parasysh përpjekjen dhe këmbënguljen që Fatmirja kishte treguar gjatë gjithë rrugëtimit të saj. Megjithatë, pavarësisht vështirësive dhe pengesave, ajo nuk u dorëzua dhe vazhdoi me durim e përkushtim.

Pikërisht kjo përpjekje e saj e bëri këtë ditë edhe më të veçantë. Rrugëtimi i Fatmire Hoxhës është një shembull i bukur se përparimi nuk matet gjithmonë me shpejtësi, por me këmbëngulje dhe mosdorëzim. Për të gjitha gratë dhe vajzat që hasin vështirësi gjatë mësimit të Kur’anit, shembulli i saj është një kujtesë se çdo hap, sado i vogël, ka vlerë dhe se nuk duhet hequr dorë nga rruga e mësimit.

Me këtë rast, mualimja Safete Sylka mbajti një ligjëratë rreth Dhuntive të Allahut me mesazhe të dobishme dhe inkurajuese duke theksuar rëndësinë e të qenit falenderuese për atë që posedojmë.

Pjesë e këtij gëzimi ishin nxënëset, gratë dhe vajzat e Qendrës Kulturore, si dhe familjarët e Fatmire Hoxhës, të cilët e ndanë së bashku këtë moment të bukur.

Momenti më emocionues i këtij aktiviteti ishte kur vetë Fatmire Hoxha lexoi faqen e parë të Kur’anit. Leximi i saj u përcoll me një ndjenjë të veçantë gëzimi dhe mirënjohjeje, pasi pas gjithë përpjekjeve të saj, ajo më në fund arriti të hapë një faqe të re në rrugëtimin me Librin e Allahut.

Në përfundim, aktiviteti u shoqërua me një koktej të përgatitur nga vetë Fatmire Hoxha, si shprehje e gëzimit dhe falënderimit për këtë ditë të veçantë, të cilën ajo e ndau me familjen dhe nxënëset e Qendrës.

Lusim Allahun që t’ia lehtësojë Fatmires vazhdimin e mësimit, t’ia shtojë dashurinë për Kur’anin dhe ta bëjë këtë hap fillimin e një lidhjeje edhe më të fortë me Fjalën e Tij. Gjithashtu, urojmë që përpjekja dhe këmbëngulja e saj të jetë frymëzim për çdo grua dhe vajzë që dëshiron ta mësojë Kur’anin, pavarësisht vështirësive që mund të hasë gjatë rrugës.

06/09/2026

“A jam unë nxënëse e Muhammedit ﷺ?”

Më 6 shtator 2026, në Qendrën Kulturore Islame në Rahovec, Departamenti i Gruas pranë KBI Rahovec organizoi një program fetar dhe edukativ me temën “A jam unë nxënëse e Muhammedit ﷺ?”

Aktiviteti u organizua me rastin e muajit të lindjes së Muhammedit ﷺ dhe fillimit të vitit të ri shkollor. Qëllimi ishte të rikujtohej shembulli i Muhammedit ﷺ si mësues dhe edukator dhe të nxitej dashuria për dijen dhe edukatën e mirë.

Programi u hap me lexim të Kur’anit nga Ruvejda Sylka, ndërsa Medina Rama e pasuroi programin me disa ilahi.

Në vazhdim, Sadije Durguti, koordinatore e Departamentit të Gruas pranë KBI Rahovec, mbajti ligjëratën me temën e programit. Në ligjëratë u theksua rëndësia e dijes, edukatës dhe marrjes së Muhammedit ﷺ si shembull në jetën e përditshme, veçanërisht për nxënëset në fillim të vitit të ri shkollor.

Në përfundim, për të pranishmet u shtrua një koktej me ëmbëlsira dhe lëngje, i mundësuar nga një donatore anonime. E falënderojmë përzemërsisht dhe lusim Allahun që ta shpërblejë për bujarinë dhe kontributin e saj.

Falënderojmë të gjitha pjesëmarrëset dhe kontribuueset që ndihmuan në realizimin e këtij aktiviteti.

Departamenti i Gruas pranë KBI Rahovec
“Të mësojmë, të edukohemi dhe të bëhemi nxënëse të denja të Muhammedit ﷺ.”

05/09/2026

29/08/2026

22/08/2026

Më 22 gusht 2026, në Prishtinë u mbajtën Garat e Diturive Fetare, të organizuara nga Kryesia e Bashkësisë Islame të Kosovës, përkatësisht Drejtoria Fetaro-Arsimore dhe Departamenti i të Rinjve.

Në garë morën pjesë nxënësit më të dalluar nga 18 qytete të Kosovës, duke garuar në fusha si Kurani, Akaidi, Fikhu dhe Historia Islame. Përveç pjesës garuese, aktiviteti u shoqërua edhe me programe artistike të përgatitura nga nxënësit.

Ekipi ynë, i përbërë nga Husejn Abazibra, Alea Canta, Ryvejda Sylka, Medina Rama dhe Sara Durguti, nën udhëheqjen e mualimes Safete Sylka, bëri një paraqitje shumë dinjitoze, duke dëshmuar përgatitje të mirë si në aspektin e njohurive fetare, ashtu edhe në paraqitjen skenike.

Pjesëmarrja në këtë garë ishte një përvojë e çmuar për nxënësit tanë dhe një dëshmi e punës dhe përkushtimit të tyre.

Allahu e shpërbleftë mualimen Safete Sylka dhe nxënësit tanë për gjithë mundin e dhënë, ua shtoftë dijen dhe i udhëzoftë drejt sukseseve të mëtejshme!

20/08/2026

Sot, në Qendrën Kulturore në Rahovec, u mbajt një program modest me rastin e hyrjes së vogëlushes Sara Isma në Kuran.

Në këtë program u fol disa fjalë rreth rëndësisë së edukimit dhe arsimimit të fëmijëve, si dhe për përgjegjësinë e prindërve në kultivimin e dashurisë ndaj Kuranit dhe vlerave të bukura islame. Të pranishmëve iu drejtua koordinatorja e Departamentit të Gruas pranë KBI-së në Rahovec, Sadije Durguti.

Më pas, vogëlushja Sara lexoi me emocion faqen e parë të Kuranit, duke shënuar kështu një hap të bukur e të rëndësishëm në rrugëtimin e saj me Librin e Allahut.

Programi u përmbyll me një koktej të shtruar nga familja e Sarës, ku u shërbyen edhe ëmbëlsira tradicionale.

Lusim Allahun që ta begatojë Sarën, ta bëjë Kuranin dritë në zemrën e saj dhe ta bëjë atë prej fëmijëve të dobishëm për familjen, shoqërinë dhe gjithë vendin.

Allahu i bëftë fëmijët tanë të dobishëm, të edukuar dhe të lidhur me Kuranin!

13/08/2026

Sot, në Qendrën Kulturore në Rahovec, u zhvillua një program i vogël dhe modest, me rastin e hyrjes në lexim të Kur’anit të nxënëseve Muadhe dhe Zerina Kollari.

Edhe pse jetojnë në mërgim, larg vendlindjes, kjo nuk u bë pengesë që ato të mësojnë shkronjat e Kur’anit dhe të hedhin hapat e parë në rrugën e mësimit të Librit të Allahut.

Ato iu bashkuan “karvanit” të gjyshes së tyre, Bademe Kollari, e cila, që nga koha kur filloi vetë të mësonte shkronjat e Kur’anit, nuk u ndal së përhapuri këtë dashuri te familjarët e saj. Një nga një, ajo solli mbesat, vajzat dhe nuset e saj për të mësuar Kur’anin në qendrën tonë.

Sot, nga familja Kollari, më shumë se dhjetë anëtarë vazhdojnë mësimin e Kur’anit në Qendrën Kulturore qoftë fizikisht apo përmes mësimit online.

Kjo është një dëshmi e bukur se dashuria për Kur’anin nuk njeh moshë, distancë apo kufij dhe se shembulli i mirë i një gjysheje mund të bëhet shkak që një familje e tërë të lidhet me Librin e Allahut.

Programi u shoqërua me një fjalim të mbajtur nga koordinatorja e Departamentit të Gruas pranë KBI-së në Rahovec, ndërsa nxënëset Muadhe dhe Zerina lexuan pjesë nga Kur’ani, duke shënuar kështu një hap të rëndësishëm në rrugëtimin e tyre të ri.

Në përfundim, për të pranishmit u shtrua një koktej rasti me ëmbëlsira tradicionale dhe pije freskuese.

Një program i thjeshtë në përmasa, por i madh në kuptim: dy vajza që nisën rrugëtimin e tyre me Kur’anin dhe një familje që vazhdon ta përcjellë këtë dashuri brez pas brezi.

02/08/2026

Të dielën, më 2 gusht 2026, në Qendrën Kulturore në Rahovec u organizua një program i veçantë për nxënëset që kanë hyrë në leximin e Kur’anit, si dhe për nxënësen që përfundoi hatmen.

Në këtë program, nxënëset Qefsere Salimusa, Florije Durguti, Allmira Kollari, Lindite Miftari dhe Ëmbla Sylka festuan hyrjen në Kur’an dhe lexuan faqen e parë të tij, duke shënuar kështu fillimin e rrugëtimit të tyre me Librin e Allahut. Ndërsa Era Limanmera, e cila përfundoi hatmen, lexoi faqen e fundit të Kur’anit.

Ligjëratën e mbajti mualimja Safete Sylka, e cila foli për rëndësinë e edukimit të fëmijëve, duke vënë theks të veçantë në rolin e prindërve si shembulli i parë dhe më i rëndësishëm për ta. Ajo theksoi se fëmijët mësojnë dhe ndjekin më shumë veprat e prindërve sesa fjalët e tyre.

Programi u përmbyll me një koktej të përgatitur nga vetë nxënëset e përmendura, duke e bërë këtë ditë edhe më të veçantë për të gjitha pjesëmarrëset dhe familjet e tyre.