Shfmu Filip Shiroka - Prishtinë

Klasa e IX vizitoi shkollat e mesme në Prishtinë

Sot, nën udhëheqjen e ars. Ariana Kçiku, klasa e IX ishte për vizitë në tri shkolla të mesme publike në Prishtinë: Sh.M.T. "28 Nëntori", IAAP "Hoxhë Kadri Prishtina" dhe Gjimnazi "Xhevdet Doda".

U njohën nga afër për kushtet e aplikimit nëpër këto shkolla dhe dokumentacionet e nevojshme. Pastaj vazhduan me kabinetet e shkollës për të parë instrumentet, pajisjet profesionale të punës.

Falenderojmë stafet e shkollave për mikpritjen dhe informimin e tyre ndaj nxënësve tanë.

👩‍🏫Sot në ambientet e Gjimnazit Matematikor u mbajt Olimpiada e Përbashkët e Gjuhës Shqipe – faza e dytë (niveli komunal) për nxënësit e klasave të nënta nga shkollat e Komunës së Prishtinës.

✍️Shkolla jonë garoi me dy nxënëset tona shembullore në këtë fushë, Alean dhe Fionën.

Pjesëmarrja e tyre është një sukses në vetvete dhe një dëshmi e punës së vazhdueshme që bëhet në shkollën tonë për zhvillimin e dijes.

Falënderojmë nxënëset dhe mësimdhënësen Ars. Sofije Ismajli për angazhimin dhe përfaqësimin e shkollës sonë dhe u urojmë suksese në këto gara.👏

📢 LIGJERATË VETËDIJESUESE NGA POLICIA E KOSOVËS NË SHKOLLËN TONË 🇽🇰

👨‍🏫Sot u zhvillua një ligjëratë edukative për nxënësit, e mbajtur nga Policia e Kosovës me temën: “Parandalimi i ngacmimeve seksuale & masat ligjore ndëshkimore ndaj tyre”.

Gjatë ligjëratës, nxënësit u informuan në mënyrë të detajuar për:

- Kuptimin e ngacmimeve seksuale dhe format e tyre (verbale, fizike dhe përmes rrjeteve sociale);
- Rëndësinë e respektimit të kufijve personalë dhe dinjitetit të secilit individ;
- Mënyrat se si mund të identifikohen situatat e rrezikshme dhe si të reagojnë në mënyrë të sigurt;
- Hapat që duhet të ndërmerren në rast të përballjes me ngacmime (njoftimi i prindërve, mësimdhënësve dhe institucioneve përkatëse);
- Pasojat ligjore dhe masat ndëshkimore që parashihen për kryerësit e këtyre veprimeve, sipas legjislacionit në fuqi.

☺️Falënderojmë PK-në për kontributin e tyre të çmuar dhe bashkëpunimin në edukimin e brezave të rinj. Ata na premtuan vazhdimin e bashkëpunimit me aktivitete të ngjashme në të ardhmen me komunitetin e nxënësve.

Respekto shokun/shoqen!🖐
Mos ngacmo!🚫
Lajmëro ngacmimin! 🙅‍♂️

🌍 Në kuadër të shënimit të Ditës së Tokës, stafi i shkollës sonë, së bashku me nxënësit, ka realizuar një aksion pastrimi në ambientet përreth shkollës dhe në stacionin e autobusit.

🌳Ky aktivitet kishte për qëllim rritjen e ndërgjegjësimit për rëndësinë e mbrojtjes së mjedisit dhe ruajtjen e hapësirave tona të përbashkëta të pastra dhe të shëndetshme.

🌿Falënderojmë të gjithë nxënësit për angazhimin dhe shembullin e mirë që dhanë. Njëkohësisht, ftojmë gjithë komunitetin që të kontribuojnë në ruajtjen e pastërtisë së fshatit tonë çdo ditë.

Së bashku për një mjedis më të pastër! 🌱

SHKOLLA JONË ËSHTË PAJISUR ME KONDICIONERË

Shkolla jonë shpreh mirënjohjen e thellë për Gntc - Gorenje për donacionin bujar prej 12 klimash për shkollën tonë. Ky kontribut i çmuar është një dëshmi e përgjegjësisë sociale dhe përkushtimit ndaj arsimit dhe mirëqenies së nxënësve tanë.

Një falënderim i veçantë shkon edhe komunitetit te prinderve dhe mesimdhenesve te shkolles per kontribuimin financiar per instalimin e klimave. Po ashtu dhe kompanise montuese per punen profesionale dhe me kohe.

Gjithnjë jemi në përkushtim për të krijuar kushte sa më optimale për zhvillimin e orëve. Një ambient i rehatshëm ndikon drejtpërdrejt në përqendrimin, shëndetin dhe performancën e nxënësve dhe stafit, duke e bërë mësimin më efektiv dhe më cilësor.

Faleminderit për mbështetjen dhe kontributin tuaj në përmirësimin e kushteve në arsim!

🖥Shkolla jonë shpreh mirënjohjen për Drejtorinë Komunale të Arsimit për mbështetjen e vazhdueshme dhe kontributin e çmuar në përmirësimin e kushteve të mësimdhënies.

Sot shkolla jonë është pajisur me 5 ekrane të mençura (digjitale) që përbën një hap shumë të rëndësishëm drejt modernizimit të procesit arsimor dhe rritjes së cilësisë në mësimnxënie.

👩‍🏫Stafi mësimor po ashtu u trajnua nga personat kompetent lidhur me përdorimin Androidit të këtyre pajisjeve.

📏Pajisjet padyshim që do ta fasilitojnë punën e mësimdhënësve dhe do të jenë faktorë kyç në rritjen e interesimit të nxënësve për mësimnxënie.

PROFILI I SHKOLLËS

ShFMU "Filip Shiroka" gjindet në fshatin Slivovë K. Prishtine, 23 km. larg qytetit. Në këtë shkollë mësimi mbahet prej ciklit parashkollor deri në kl. IX dhe në të mësojnë fëmijët e fshatrave Slivovë, Llajshec, Brusë, Kukaj, Hanroc. Shkolla është themeluar në vitin 1927.

Në objekt shkollor klasat në gjuhën shqipe u vendosën në vitin 1955. Klasa e V me mësim në gjuhën shqipe është hapur në vitin shkollor 1969/70 në lokalet e Shtepisë së Kulturës. Me 11 nxënës shkollë e plotë fillore (tetëvjeçare) në gjuhën shqipe është bërë në vitin shkollor 1973/74. Komuna e Prishtinës në vitin 1964 shkollën e emërtoi me emrin "Vllazërim Bashkim". Me 20 Qershor 1992 me vendimin nr.8 Ministria e Arsimit e Republikës së Kosovës, këtë shkollë e emërtoi me emrin: Shkolla Fillore e Mesme e Ulët "Filip Shiroka".

Në kuader të kësaj shkolle është edhe PNF në fshatin Llajshec 5 km. larg nga shkolla amë.
Punën arsimore shkolla në Llajshec nisi në vitin 1980 në shtëpi private kurse objekti shkollor është ngritur nga komuna në vitin 1987 në një sipërfaqe prej 150 m² dhe oborr prej 30 ari. Pasi lokali në Llajshec nuk i plotësonte kushtet për shkak të rritjes së numrit të nxënësve, në Gusht 2011 filloi ndërtimi i objektit të ri në një sipërfaqe prej 500 m² me lokale përcjellëse dhe ngrohtore qendrore. Lokali është kryer dhe mësimi mbahet në lokale të reja. Pas vitit 1999 kjo shkollë filloi zhvillimin dhe fuqizimin e vet, duke u plotësua të gjitha kërkesat për rregullimin e infrastrukturës dhe plotësimin e kushteve për punë dhe cilësi më të mirë.

Në shkollën amë në Slivovë dhe PNF në Llajshec, punohet me një ndërrim.