Gjimnazi "Xhevdet Doda"

🎓 Më 11.06.2026, në një atmosferë festive dhe emocionuese, u mbajt Ceremonia e Diplomimit të Maturantëve, duke shënuar përfundimin e një kapitulli të rëndësishëm në jetën e nxënësve tanë dhe fillimin e një rrugëtimi të ri drejt sfidave dhe mundësive të ardhshme.

Ceremonia mblodhi së bashku maturantët, prindërit, mësimdhënësit dhe mysafirë të tjerë, të cilët ndanë gëzimin dhe krenarinë për arritjet e gjeneratës së sivjetme. Me fjalët e tyre përshëndetëse ceremoninë e nderuan Drejtori i shkollës, z. Isak Bregaj, Drejtori i DKA-së Prishtinë, z. Arianit Elshani, Kryetarja e KDSH-së, znj. Nazlije Korça, ish-nxënësi i gjimnazit, tani Prof. Dr. Blerim Rexha, si dhe Kryetarja e Rinisë së shkollës, znj. Ema Kuçi.

Gjatë ceremonisë u ndanë mirënjohje për 11 nxënës të dalluar, duke vlerësuar përkushtimin, angazhimin dhe suksesin e tyre gjatë viteve të shkollimit.

Diplomimi nuk përfaqëson vetëm fundin e një etape arsimore, por edhe fillimin e një periudhe të re, të mbushur me ëndrra, ambicie dhe mundësi të reja. I urojmë të gjithë maturantët për këtë arritje të rëndësishme dhe ju dëshirojmë suksese në çdo hap të rrugëtimit të tyre të ardhshëm!🎉

Në ceremoninë përmbyllëse të organizuar nga Kryqi i Kuq i Kosovës, në kuadër të ciklit “Promovimi i Vlerave Humane”, shkolla jonë u vlerësua me vendin e tretë ndër 38 shkolla pjesëmarrëse në fushën “Projekti mjedisor dhe i riciklimit të materialeve”.
Kjo arritje pasqyron angazhimin, kreativitetin dhe punën e palodhur të nxënësve gjatë realizimit të projektit, duke dëshmuar se përkushtimi i të rinjve sjell ndryshime pozitive në shoqëri, kontribuon në mbrojtjen e mjedisit dhe promovon vlerat qytetare.
Ky rezultat u arrit nga nxënësit:: Morea Zullufi, Arsë Arifi, Riga Maxhera, Mat Baruti, Miri Asani, Urata Muhadri, Harea Veliu, Lurela Millaku dhe Vesa Haxholli.
Gjithashtu, nxënësit tanë u certifikuan për angazhimin e tyre në katër projekte të realizuara në kuadër të ciklit “Promovimi i Vlerave Humane”.
Projektet u realizua nën udhëheqjen e pedagoges Afërdita Hoxha dhe profesorit Armend Qafleshi.
Falënderojmë menaxhmentin e shkollës për mbështetjen e vazhdueshme, si dhe mësimdhënësit për bashkëpunimin dhe përkrahjen e tyre gjatë gjithë realizimit të projektit.
Urime nxënësve për këtë sukses dhe përfaqësimin dinjitoz të shkollës sonë!

Më 18.05.2026 u mbajt një nga mbrëmjet më të veçanta dhe më të paharrueshme për maturantët tanë. Një natë plot emocion, gëzim, elegancë dhe kujtime që do të mbeten gjatë në zemrat tona.

Pas shumë viteve pune, mësimi, sfidash dhe miqësish të krijuara, kjo mbrëmje shënoi një kapitull të rëndësishëm në rrugëtimin e tyre.

U urojmë suksese të gjithë maturantëve në hapat e ardhshëm të jetës! 🌟

AMELA ELEZI - Nxënësja më e mirë e gjeneratës

Amela Elezi, nxënëse e klasës XII/10 në Gjimnazin “Xhevdet Doda”, u shpall me meritë nxënësja më e mirë e gjeneratës, duke u dalluar për rezultate të jashtëzakonshme në mësime dhe në fushën e shkencës.

Gjatë viteve të shkollimit, Amela ka arritur suksese të shumta në fizikë dhe kimi, duke fituar vende të para dhe të dyta në gara shtetërore dhe olimpiada. Përkushtimi, serioziteti dhe dashuria e saj për shkencën bënë që ajo të përfaqësojë Kosovën në olimpiada europiane dhe botërore të fizikës në Gjeorgji, Francë, Suedi dhe Kolumbi.

Disa nga të arriturat kryesore të saj janë:

FIZIKË DHE KIMI

* Vendi i Parë në Garat Shtetërore XXVII të Fizikës (2026)
* Vendi i Parë në Garën Eksperimentale të Fizikës (2026)
* Vendi i Parë në Olimpiadën IV Kosovare të Fizikës (2026)
* Vendi i Parë në Garat Komunale të Kimisë (2026)
* Vendi i Dytë në Olimpiadën e Kimisë (2026)
* Vendi i Parë në Garat Regjionale të Kimisë (2025)
* Vendi i Parë në Olimpiadën e Kimisë (2025)
* Vendi i Dytë në Garat Shtetërore të Fizikës (2025)
* Vendi i Dytë në Olimpiadën Kosovare të Fizikës (2025)
* Vendi i Dytë në Garat Shtetërore të Fizikës (2024)

PËRFAQËSIMI NDËRKOMBËTAR

* EuPhO 2024 – Kutaisi, Gjeorgji
* IPhO 2025 – Paris, Francë
* EuPhO 2026 – Gothenburg, Suedi
* IPhO 2026 – Bucaramanga, Kolumbi

Amela Elezi mbetet shembull frymëzimi për të rinjtë, duke dëshmuar se puna, përkushtimi dhe talenti sjellin sukses të madh. Urime Amela dhe suksese të pafundme në rrugëtimin tënd!

Me krenari ndajmë suksesin e jashtëzakonshëm të nxënësve tanë në Olimpiadën e Kimisë 2026 🧪

🥇 Jon Hasani, vendi i parë për klasët e X-ta

🥈 Amela Elezi, vendi i dytë për klasët e XII-ta

Të dy nxënësit përfaqësuan me dinjitet Gjimnazin “Xhevdet Doda” dhe dëshmuan edhe një herë nivelin e lartë të punës dhe përkushtimit në shkollën tonë.

Një falënderim i veçantë shkon edhe për mësimdhënësit e kimisë për përkushtimin, mbështetjen dhe punën e vazhdueshme me nxënësit tanë.

Urime Jonit dhe Amelës për këtë arritje të mrekullueshme! 👏🎉 Suksese të mëtejshme në rrugëtimin tuaj akademik!

Sot, më datë 12.05.2026, me respekt dhe mirënjohje shënuam pensionimin e profesorit Rrustem Zekolli.

Pas shumë viteve përkushtim në arsim, ai po mbyll një kapitull të rëndësishëm të jetës së tij profesionale, duke lënë pas një kontribut të madh në edukimin e shumë gjeneratave.

I urojmë shëndet, lumturi dhe jetë të qetë në vitet e pensionimit. Faleminderit për kontributin e dhënë.

Nxënësi ynë, Kron Balidemaj (XI/11), po vazhdon të përfaqësojë me sukses Kosovën në arenën ndërkombëtare të kajakut. Sipas të dhënave të International Canoe Federation, ai garon në disiplinat Canoe Sprint, Wildwater Canoeing dhe Canoe Marathon.

Këtë javë, Kroni mori pjesë në garat e mbajtura në Szeged, ku tregoi progres të dukshëm në rezultatet e tij krahasuar me garat e mëparshme.

Në javët dhe muajt në vazhdim, ai pritet të marrë pjesë edhe në gara të tjera ndërkombëtare që do të mbahen në Brandenburg, në Mediterranean Games në Taranto, si dhe në Romania dhe vende të tjera europiane.

I urojmë Kronit shumë suksese dhe rezultate sa më të mira në garat e ardhshme! 🚣‍♂️🇽🇰

Më datë 06.05.2026, si rezultat i angazhimit të treguar gjatë “Javës së Solidaritetit”, klasat fituese që u shpërblyen me ekskursion ishin: X/11 me kujdestar prof. Armend Qafleshi, XI/6 me kujdestare prof. Gjylfidane Sumaj dhe XII/3 me kujdestare prof. Pranvera Mirena.

Në kuadër të këtij ekskursioni, nxënësit vizituan burimin “Drini i Bardhë”, një nga pasuritë më të rëndësishme natyrore të Kosovës, i njohur për bukurinë e tij dhe rëndësinë që ka për ekosistemin dhe furnizimin me ujë. Po ashtu, ata vizituan edhe qytetin e Pejës, qytet me vlera të mëdha historike, kulturore dhe turistike, i cili njihet për trashëgiminë e pasur dhe mikpritjen tradicionale.

Ky ekskursion ishte një përvojë e bukur edukative dhe argëtuese për nxënësit, duke kombinuar shpërblimin për punën dhe solidaritetin e tyre me njohjen e vendeve të rëndësishme të Kosovës.

Pjesë e këtij organizimi ishin edhe drejtori i shkollës, sekretarja, psikologia, si dhe disa nxënës nga Këshilli i Nxënësve, të cilët kontribuan në realizimin dhe mbarëvajtjen e kësaj vizite.

Më datë 04.05.2026, në kuadër të Javës së Solidaritetit, në shkollën tonë u organizua një aktivitet humanitar nga vetë nxënësit. Ata kontribuan duke përgatitur gatime në shtëpitë e tyre, të cilat i sollën në shkollë dhe u sh*tën me qëllim grumbullimin e fondeve për bamirësi.

Në dorëzimin e donacionit morën pjesë psikologia e shkollës, znj. Shkurtë Bajgora, sekretarja e shkollës znj. Albana Musa, si dhe Këshilli i Nxënësve me kryetaren Ema Kuçi dhe anëtarët Ari Rama, Verda Muçaj, Flokarta Hoxha, Murik Sylmeta dhe Ukë Beka.

Gjatë vizitës në Shoqatën e të Verbërve, nxënësit patën mundësinë të zhvillojnë një bashkëbisedim me anëtarët e shoqatës, të cilët i informuan më gjerësisht për jetën e përditshme të personave të verbër. Ata prezantuan mënyrat se si funksionojnë në përditshmëri, duke përfshirë përdorimin e mjeteve ndihmëse, aparateve mjekësore me audio në gjuhën shqipe, shkrimin përmes alfabetit Braille, si dhe përdorimin e telefonit përmes asistencës auditive.

Urojmë që përmes këtij aktiviteti të kemi sjellë sadopak lehtësim dhe të kemi përcjellë një mesazh solidariteti, dashamirësie dhe përkrahjeje.

Më datë 04.05.2026, në kuadër të aktivitetit “Liga e Shkollave”, u zhvillua ndeshja e dytë mes shkollës sonë dhe Gjimnazit të Specializuar Matematikor, ku ekipi ynë arriti fitoren. 🏆

Nxënësit tanë treguan përkushtim, bashkëpunim dhe shpirt garues gjatë gjithë lojës, duke dëshmuar edhe një herë cilësinë dhe talentin që përfaqëson shkolla jonë.

Ju urojmë djemve tanë shumë suksese në vazhdim dhe jemi krenarë për arritjet e tyre!