Gjimnazi "Xhevdet Doda"

14/09/2026

Gjimnazi “Xhevdet Doda” - Prishtinë fton të gjithë operatorët ekonomikë/bizneset e interesuara që të paraqesin ofertat e tyre për:
Furnizim me ushqim, ujë dhe pije për bufenë e shkollës
Për më shumë detaje, referojuni dokumentit “Ftesë për ofertë”.

11/09/2026

Kemi pasur kënaqësinë të mirëpresim në shkollë Drejtorin e Arsimit, z. Arianit Elshani.

Gjatë kësaj vizite, diskutuam lidhur me fillimin e vitit të ri shkollor, përgatitjet, ecurinë e procesit mësimor, si dhe sfidat me të cilat përballet shkolla jonë.

Falënderojmë z. Elshani për vizitën dhe mbështetjen e vazhdueshme që i ofron shkollës sonë.

02/09/2026

Në ambientet e shkollës sonë u mbajt trajnimi me temën: “Hartimi i planeve vjetore dhe dymujore në bazë të Kurrikulës Bërthamë dhe Programit Lëndor”
Trajnimin e udhëhoqi pedagogia e shkollës, Aferdita Hoxha, e cila përmes prezantimit, diskutimeve dhe aktiviteteve praktike trajtoi rëndësinë e planifikimit të harmonizuar me dokumentet kurrikulare.
Gjatë trajnimit u analizuan dokumentet, u thelluan njohuritë për hartimin e planeve vjetore, dymujore dhe ditore, si dhe u shkëmbyen përvoja profesionale.
Trajnimi u karakterizua nga bashkëpunimi, diskutimet profesionale dhe angazhimi aktiv i pjesëmarrësve.

01/09/2026

Mirë se vini, nxënës të dashur! 📚

Ju urojmë një vit shkollor të mbarë, të suksesshëm dhe plot arritje!
Qoftë ky një vit i mbushur me motivim, përkushtim dhe shumë momente të bukura së bashku.

Mirë se erdhët në shkollën tuaj! ❤️

31/08/2026

NJOFTIM

Të bashkëngjitur e gjeni listën e nxënësve të klasave të 10-ta, të ndarë sipas paraleleve.

Urime fillimin e vitit të ri shkollor 2026/2027!
Ju urojmë shumë suksese, arritje dhe një vit të mbarë!

Ndërrimi i parë: 07:45
Ndërrimi i dytë: 13:15

Ndërrimi i parë
Klasat 12/1 – 12/11
Klasat 11/1 – 11/3

Ndërrimi i dytë
Klasat 10/1 – 10/11
Klasat 11/4 – 11/11

Mirë se vini në Gjimnazin “Xhevdet Doda”!

Lista e nxënësve të klasave të 10-ta...

04/08/2026

Nxënësi i Gjimnazit "Xhevdet Doda" përfaqësoi Kosovën në programin prestigjioz të Departamentit të Shtetit të SHBA-së

Me krenari ndajmë suksesin e nxënësit tonë Mat Baruti, i cili përfundoi me sukses programin ndërkombëtar ODYLP EAGLE 2026 (Excellence in AI and Global Leadership Exchange), një iniciativë e Byrosë për Çështje Arsimore dhe Kulturore ECA të Departamentit të Shtetit të Shteteve të Bashkuara të Amerikës, e zbatuar nga Legacy International.

Pas përfundimit me sukses të programit, Mati u pajis me certifikatë zyrtare, duke dëshmuar angazhimin dhe pjesëmarrjen e tij në këtë program ndërkombëtar. Programi mblodhi të rinj me potencial të lartë lidershipi nga vende të ndryshme, me fokus zhvillimin e aftësive në inteligjencën artificiale, inovacion, sipërmarrje, diplomaci dhe bashkëpunim ndërkombëtar.

Gjatë programit në Seattle dhe Washington, D.C., Mati përfaqësoi Kosovën duke marrë pjesë në ligjërata, punëtori, vizita studimore dhe takime me ekspertë në institucione dhe kompani me renome botërore, përfshirë Google, Microsoft, Amazon, Boeing dhe University of Washington.

Një nga momentet më të rëndësishme të programit ishte vizita në Departamentin e Shtetit të SHBA-së, ku pjesëmarrësit u njohën nga afër me diplomacinë amerikane dhe programet ndërkombëtare të shkëmbimit rinor. Aktiviteti u pasqyrua edhe në postimin zyrtar të Byrosë për Çështje Arsimore dhe Kulturore ECA.

Jemi të lumtur që një nxënës i Gjimnazit "Xhevdet Doda" pati mundësinë ta përfaqësojë Kosovën në një program të këtij niveli. Ky sukses përfaqëson një arritje të rëndësishme për Matin dhe njëkohësisht një promovim dinjitoz të shkollës sonë në arenën ndërkombëtare. Pjesëmarrja në programe të tilla është dëshmi e përkushtimit, punës dhe potencialit që kanë të rinjtë e Kosovës për të kontribuar dhe për t'u dalluar në mjedise ndërkombëtare. Besojmë se kjo përvojë do ta motivojë Matin të vazhdojë të zhvillojë potencialin e tij, të arrijë suksese të reja dhe të mbetet një shembull frymëzues për bashkëmoshatarët e tij.

I urojmë suksese të vazhdueshme në rrugëtimin e tij akademik dhe profesional dhe jemi të bindur se ai do të vazhdojë ta përfaqësojë me dinjitet Gjimnazin "Xhevdet Doda" dhe Kosovën në
iniciativa të tjera kombëtare dhe ndërkombëtare.

10/07/2026

NJOFTIM

Komisioni Profesional për Regjistrimin e Nxënësve në klasën e dhjetë (X) ka shqyrtuar aplikacionet e kandidatëve që kanë konkurruar për regjistrim në vitin shkollor përkatës, duke u bazuar në kriteret e përcaktuara në konkursin e shpallur nga Drejtoria e Arsimit e Komunës së Prishtinës.

Pas përfundimit të procesit të shqyrtimit dhe vlerësimit të aplikacioneve, Komisioni Profesional publikon listën e kandidatëve të pranuar dhe të papranuar për regjistrim në klasën e dhjetë (X), si në linkun në vijim:

https://online.anyflip.com/zaici/mwoj/mobile/index.html

Të gjithë kandidatët që nuk janë pranuar mund t’i tërheqin dokumentet më 10 dhe 13.07.2026, nga ora 09:00 deri në 12:00. Ankesat mund të paraqiten gjithashtu më 10 dhe 13.07.2026, gjatë të njëjtit orar (09:00 - 12:00). Tërheqja e dokumenteve dhe paraqitja e ankesave bëhet në administratën e shkollës.

2026-27 finale publikim

06/07/2026

📢 NJOFTIM PËR HAPJEN E KONKURSIT PËR REGJISTRIMIN E NXËNËSVE NË KLASËN E DHJETË

Njoftohen të gjithë kandidatët se është hapur konkursi për regjistrimin e nxënësve në klasën e dhjetë.

🗓️ Afati i aplikimit:

Aplikimi online është i hapur nga data 07 korrik 2026, deri më 09 korrik 2026, në ora 16:00.

💻 Mënyra e aplikimit:
Online, përmes platformës edukryeqyteti.org.

📑 Pas aplikimit online, nxënësi është i obliguar t’i dorëzojë në shkollë këto dokumente:
* Fletëaplikimin (i cili gjenerohet pas aplikimi online në postën e juaj elektronike e-mail);
* Dëftesën origjinale të klasave VI–IX;
* Ekstraktin e lindjes.

📌 Ju lutemi t’i dorëzoni dokumentet origjinale të kërkuara në Gjimnazin “Xhevdet Doda” deri më 09.07.2026.
Dorëzimin e dokumentave mund ta bëni nga ora 08:00 deri 16:00.

⚠️ Kandidatët që nuk i dorëzojnë fizikisht dokumentet e kërkuara në shkollë brenda afatit të përcaktuar nuk do t’u merret parasysh aplikimi.

📄 Për më shumë informata rreth kritereve dhe procedurës së aplikimit, ju lutem referojuni konkursit të publikuar.

Sqarim: Për çdo problem teknik gjatë aplikimit, ju lutem paraqituni në shkollë.

Suksese të gjithë kandidatëve!

Zgjedhni shkollën dhe drejtimin ku dëshironi të aplikoni. Procesi është i thjeshtë, i sigurt dhe plotësisht online.

02/07/2026

Njoftojmë me kënaqësi të gjithë komunitetin shkollor se 100% e maturantëve tanë e kanë kaluar me sukses provimin e Maturës. Ky sukses i plotë është dëshmia më e mirë e punës së palodhur dhe e angazhimit serioz gjatë gjithë vitit. Falënderojmë profesorët për kontributin dhe urojmë maturantët për fillimin e një kapitulli të ri në jetën e tyre!

15/06/2026

🎓 Më 11.06.2026, në një atmosferë festive dhe emocionuese, u mbajt Ceremonia e Diplomimit të Maturantëve, duke shënuar përfundimin e një kapitulli të rëndësishëm në jetën e nxënësve tanë dhe fillimin e një rrugëtimi të ri drejt sfidave dhe mundësive të ardhshme.

Ceremonia mblodhi së bashku maturantët, prindërit, mësimdhënësit dhe mysafirë të tjerë, të cilët ndanë gëzimin dhe krenarinë për arritjet e gjeneratës së sivjetme. Me fjalët e tyre përshëndetëse ceremoninë e nderuan Drejtori i shkollës, z. Isak Bregaj, Drejtori i DKA-së Prishtinë, z. Arianit Elshani, Kryetarja e KDSH-së, znj. Nazlije Korça, ish-nxënësi i gjimnazit, tani Prof. Dr. Blerim Rexha, si dhe Kryetarja e Rinisë së shkollës, znj. Ema Kuçi.

Gjatë ceremonisë u ndanë mirënjohje për 11 nxënës të dalluar, duke vlerësuar përkushtimin, angazhimin dhe suksesin e tyre gjatë viteve të shkollimit.

Diplomimi nuk përfaqëson vetëm fundin e një etape arsimore, por edhe fillimin e një periudhe të re, të mbushur me ëndrra, ambicie dhe mundësi të reja. I urojmë të gjithë maturantët për këtë arritje të rëndësishme dhe ju dëshirojmë suksese në çdo hap të rrugëtimit të tyre të ardhshëm!🎉

Mirënjohje e veçantë për Korporatën Rugova për furnizimin me ujë gjatë ceremonisë.