SHFMU "Elfir Behrami" - Metehi

Shëtitja njëditore nëpër Kosovë me klasën e IX-të 2026

E shtunë, datë: 30.05.2026, në kuadër të aktiviteteve jashtëkurrikulare realizuam shëtitjen njëditore me klasën e nëntë, ku nxënësit tanë patën mundësinë që të njihen për së afërmi me bukuritë natyrore dhe monumentet kulturore të vendit tonë, Kosovës. Vizituam: Ujëvaren e Mirushës, Burimi i Drinit të Bardhë, Shpellën e Radacit, qytetin e Pejës, Grykën e Rugovës, Ura e Fshejtë, Lidhjen e Prizrent, Kalanë e Prizrenit.

Në emër të shkollës e falënderojmë shumë bashkatdhetarin tonë, që jeton dhe vepron në Angli z. Rexhep Haliti, i cili na i ka dhënë mjetet financiare për ta bërë pagesën e autobusit për nxënësit tanë. Çdoherë do të jemi mirënjohës ndaj tij dhe gjithësecilit, që shprehë dëshirën për të dhënë kontribut dhe për ta ndihmuar shkollën dhe nxënësit tanë, e të cilët fatmirësisht janë të shumtë dhe çdoherë të gatshëm të na ndihmojnë neve si shkollë.

I falënderojmë edhe mësimdhënësit që ishin prezentë për angazhimin e tyre, Agjensionin Alberti Tours për transportin dhe korrektësinë.

Po ashtu, e falënderojmë edhe kujdestaren e klasës së nëntë znj. Zimrite Kosumin për angazhimin dhe kujdesin e saj të treguar ndaj nxënësve në lidhje me këtë shëtitje!

Nxënësve ju urojmë suksese në vazhdimësi!

Me respekt!
Drejtoria e shkollës

Shëtitja në natyrë, datë: 21.05.2026

Në kuadër të aktiviteteve të planifikuara të këtij viti shkollor, shkolla jonë organizoi Shëtitjen në natyrë me të gjitha klasat, që nga klasa Parafillore deri në klasën e nëntë në vendin e quajtur Te Plepat, në Orllan, si dhe u vizitua Kulla e Komandantit Zahir Pajaziti.

Shëtitja u organizua me transport si dhe ushqim, ku nxënësit tanë falë donatorit , u bë pagesa e autobusit si dhe ushqimit në restaurant , ku nxënësit tanë ishin shumë falënderues ndaj tij, si dhe u kënaqën shumë.

Drejtoria e shkollës falënderon shumë donatorin i cili ka dashur të mbetet për këtë ndihmë në të mirë të nxënësve dhe shkollës sonë, ku falë që janë të shumtë, po e kemi më të lehtë organizimin e shëtitjeve, vizitave në vende dhe institucione të ndryshme.

Bashkëpunimi shkollë-komunitet është shumë i mirë, si dhe shpresojmë që do të vazhdojë edhe më tej.

Falënderojmë edhe të gjithë mësimdhënësit që u angazhuan, që kjo shëtitje të shkojë mirë e mbarë.

Ju faleminderit!

Me respekt,
Drejtoria e shkollës

Njoftim në lidhje me Testin e Arritshmërisë 2026

Të nderuar nxënës, duke u bazuar në Vendimin e datës 25.04.2026, nga MASHT-i, Testi i Arritshmërisë për klasën e IX-të do të mbahet më datën, 26 qershor 2026.

Për të gjitha detajet tjera në lidhje me këtë njoftim do t’ju njoftojmë me kohë.

Kërkoj nga ju nxënës të dashur të klasës së IX-të të shkollës sonë, që të përgatiteni dhe t’i kushtoni vëmendje të veçantë këtij Testi, sepse është një hap shumë i rëndësishëm për synimet tuaja, që të arrini atë që dëshironi.

Me respekt!
Drejtoria e shkollës

Nxënësit e klasës së IX-të, të shoqëruar nga Drejtori i shkollës dhe kujdestarja e klasës së nëntë Zimrite Kosumi vizituan IAAP “Fan S. Noli” dhe IAAP “Isa Boletini”, në Podujevë në kuadër të aktivitetit “Dyertë e Hapura”, ku gjatë kësaj vizite nxënësit tanë patën mundësinë të njihen nga afër me Drejtimet Profesionale që këto shkolla ofrojnë, me qëllim për një orientim sa më të favorshëm në karrierë.

Falënderojmë drejoritë e këtyre dy shkollave dhe stafin arsimor për mikëpritjen dhe ligjëratat që ata u ofruan nxënësve tanë për secilin Drejtim Profesional Arsimor.

Nxënësve tanë u urojmë shumë suksese në rrugëtimin e tyre arsimor dhe në zgjedhjet që ata do të bëjnë në zhvillimin e tyre në karrierë!

Sinqerisht,
Drejtoria e shkollës

Olimpiada e Gjuhës Shqipe në nivel Komunal

Sot janë shpallur fituesit e kësaj gare, ku në mesin e 4 më të mirëve është edhe nxënësja jonë Blerina Shabani, një nxënëse e dalluar dhe e përkushtuar e shkollës sonë.

Nxënësja jonë, në bazë të rezultatit të arritur në nivel komunal, shkollën tonë, por edhe komunën tonë do ta përfaqësojë në nivel Ndërkomunal, ku shpresojmë në aftësinë, angazhimin, maturinë e saj për një rezultat të lartë.

Falënderojmë arsimtarën e Gjuhës shqipe të shkollës sonë, znj. Emine Gashi, për punën dhe kontributin e saj në lidhje me këtë Garë. Po ashtu, falëmderojmë edhe prindin e Blerinës, i cili ka një bashkëpunim të mirë me shkollën.

Duhet falënderuar edhe të gjithë prindërit dhe komunitetin për bashkëpunimin që tregojnë çdo herë e më shumë.

Andaj, në emër të Drejtorisë së shkollës, nxënëses tonë, Blerina Shabani i urojmë shumë suksese dhe mbarësi në përfaqësimin në Gara Ndërkomunale, në Olimpiadën e Gjuhës Shqipe!

Me respekt,
Drejtoria e shkollës

22 Prilli - Dita Botërore e Tokës

Sikurse në vitet e kaluara edhe sot për të shënuar këtë datë dhe ditë, përveç punimeve artistike në lidhje me këtë datë u organizuan aktivitete dhe iniciativë në kuadër të shkollës për të pastruar dhe mirëmbajtur hapësirat brenda dhe jashtë shkolle, pra të mbledhim ato pak mbeturina përreth shkollës dhe rrugës që të shpie në shkollë dhe hapësirave përreth saj me nxënësit dhe mësimdhënësit e klasave parafillore - 5 dhe klasat 6-9, me qëllim ndërgjegjësimin dhe vetëdijësimin në lidhje me mbrojtjen e mjedisit.

Toka është i vetmi planet në univers ku ka jetë. Dhe, për të siguruar vazhdimin e jetës është thelbësore të mirëmbahen dhe kujdesemi për pasuritë natyrore.

Andaj 22 Prilli - Dita Botërore e Tokës është caktuar si e tillë për të na e kujtuar të gjithëve, se Toka dhe ekosistemet e saj na sigurojnë jetë dhe ushqim, ndaj dhe nuk duhet të abuzojmë.

Ta ruajmë dhe kujdesemi për natyrën, që të kemi ajër të pastër dhe shëndet të plotë!

Me respekt,
Drejtoria e shkollës

Njoftim në lidhje me Testin vlerësues me nxënësit e klasës së 9-të dhe rezultatet e arritura për Olimpiadën e Gjuhës Shqipe në nivel shkolle dhe përfaqësimin e shkollës në Garën Komunale.

Drejtoria e shkollës, nxënëses Blerina Shabani i uron suksese të mëtutjeshme në Garat Komunale, Shtetërore dhe Ndërshtetërore!

Olimpiada e Gjuhës shqipe në nivel shkolle

Sot, nxënësit tanë të klasës së 9-të mbajtën një test vlerësues në lëndën Gjuhë shqipe. Testi u administrua nga Komisioni i vlerësimit në nivel shkolle.

Nxënësi/nxënësja më e dalluar do ta përfaqësojë shkollën tonë në nivel komunal në Olimpiadën e Gjuhës shqipe.

Nxënësit ishin të përkushtuar dhe shumë kreativ.

Nxënësve u urojmë suksese dhe le të fitojë më i miri!

Falënderojmë adminitratoret për punën dhe përkushtimin në organizimin e kësaj gare.

Me respekt!
Drejtoria e shkollës

Vizitë nga mjekët e QMF-së, Podujevë

Sot, në shkollën tonë u realizua një vizitë/kontrollë nga stafi i QMF-së, Podujevë me nxënësit e klasave I, V dhe IX për higjienën personale, peshën, boshtin kurrizor, shputat e këmbëve, kontrollën e dhëmbëve dhe të pamurit – kontrolla thelbësore për zhvillimin e shëndetshëm të fëmijëve, të cilar janë shumë të rëndësishme, sepse u ndihmojnë nxënësve në identifikimin dhe parandalimin e hershëm të problemeve shëndetësore, duke kontribuar në mirëqenien e përgjithshme të nxënësve.

Ne si Drejtori e shkollës ju jemi shumë mirënjohës stafit mjekësor të QKMF-së në Podujevë, në krye me doktorin e respektuar . Shaip Aliu për profesionalizmin dhe përkushtimin e treguar në lidhje me kontrollet e cekura më lartë.

Ju falemindrit!

Me respekt,
Drejtoria e shkollës