SHFMU "Selman Riza" Fushë Kosovë

Njoftim për testin e arritshmërisë

22 Prilli – Dita e Tokës

Me rastin e 22 prillit, Ditës së Tokës, aktivi i klasëve të katërta, me nxënësit realizuam një sërë aktivitetesh me qëllim ndërgjegjësimin për mbrojtjen e mjedisit.

Fillimisht diskutuam për rëndësinë e ruajtjes së natyrës dhe ndikimin që ka ndotja në jetën tonë të përditshme.

Më pas, organizuam pastrimin e oborrit të shkollës dhe hapësirave përreth, duke grumbulluar mbeturinat dhe duke i ndarë ato sipas llojit. Gjithashtu, mbollëm disa lule dhe bimë dekorative për ta bërë ambientin më të pastër dhe më të gjelbër.

Nxënësit përgatitën postera dhe vizatime me mesazhe sensibilizuese si: “Ruaje Tokën”, “Mos ndot mjedisin” dhe “E ardhmja është në duart tona”. Këto punime u vendosën në ambientet e shkollës për të ndërgjegjësuar edhe të tjerët.

22 Prilli, Dita e Tokës

Me rastin e 22 Prillit – Ditës së Tokës, në shkollën tonë u realizua një aktivitet edukativ me nxënësit, me qëllim rritjen e ndërgjegjësimit për mbrojtjen e mjedisit.

Aktiviteti filloi me një diskutim të shkurtër rreth rëndësisë së ruajtjes së natyrës dhe sfidave aktuale si ndotja, mbeturinat dhe ndryshimet klimatike.

Nxënësit ndanë mendimet dhe përvojat e tyre, duke treguar interes dhe përgjegjësi për ambientin ku jetojnë.

Atmosfera ishte pozitive dhe bashkëpunuese. Nxënësit treguan përkushtim dhe kreativitet, duke e kuptuar se secili ka rol në ruajtjen e mjedisit.

Ky aktivitet kontribuoi në forcimin e ndjenjës së përgjegjësisë dhe kujdesit ndaj natyrës, duke i nxitur nxënësit që të zbatojnë në përditshmëri praktika të mira për një mjedis më të pastër.

I falënderojmë mësimdhënëset:
Lavdije Dervishi-Nika, Benazire Bajçinca dhe Naxhije Shala për organizimin e këtij aktiviteti.

Sot mirëprita nxënësin Kron Tërnava për të vlerësuar një arritje të veçantë – fitoren në garën “Spelling Bee”. Kjo garë nuk është vetëm test i drejtshkrimit, por edhe i përkushtimit, durimit dhe punës së vazhdueshme.

Fituesi ynë ka treguar njohuri të shkëlqyera, përqendrim dhe vetëbesim përballë sfidave. Çdo fjalë e shqiptuar saktë është rezultat i orëve të tëra ushtrimi dhe dëshirës për të mësuar më shumë.

Kjo fitore nuk është vetëm një çmim, por një dëshmi se puna dhe këmbëngulja gjithmonë shpërblehen. Sot, ne nuk festojmë vetëm një fitues, por edhe një shembull për të gjithë nxënësit e tjerë që të synojnë më shumë dhe të mos dorëzohen.

Urime Kron për këtë sukses të merituar!
Ju urojmë edhe shumë arritje të tjera në ardhmen.

Nga drejtoria e shkollës.

Për nder të Ditës Ndërkombëtare të Sindromës Down, psikologia e shkollës, së bashku me asistentet për fëmijët me nevoja të veçanta, kanë organizuar aktivitete sensibilizuese me moton “Ec në këpucët e mia”.
Ky aktivitet ka për qëllim rritjen e vetëdijes dhe ndërgjegjësimit te nxënësit për pranimin e dallimeve, si dhe promovimin e barazisë dhe respektit ndaj fëmijëve me sindromën Down.
Gjatë aktivitetit, nxënësit patën mundësinë të diskutojnë dhe të ndajnë përvojat dhe njohuritë e tyre rreth sindromës Down, duke kontribuar në një atmosferë më të hapur, bashkëpunuese dhe gjithëpërfshirëse.

Në kuadër të bashkëpunimit të ndërsjellë, Shtëpia Botuese Dukagjini ka dhuruar në formë donacioni 208 lektura shkollore për ciklin fillor (klasat 1-5), të cilat janë dedikuar për bibliotekën e shkollës dhe do të jenë në shërbim të nxënësve tanë, duke kontribuar në nxitjen e leximit dhe pasurimin e fondit librar të shkollës. 📚

Me këtë rast, përfaqësuesit e Shtëpia Botuese Dukagjini ndanë edhe një mirënjohje për shkollën tonë, në shenjë falënderimi dhe bashkëpunimi, me rastin e 32-vjetorit të themelimit të kësaj shtëpie botuese.

Pranimi-dorëzimi i donacionit u realizua nga drejtori i shkollës, në bashkëpunim me përfaqësuesin e Shtëpia Botuese Dukagjini,

Shkolla jonë e çmoi lart këtë donacion dhe falënderoi përzemërsisht shtëpinë botuese Dukagjini për mirënjohjen, donacionin dhe bashkëpunimin korrekt ndër vite. 🙏📖

11 mars 2026

Në kuadër të lëndës Edukata Qytetare, nën udhëheqjen e mësimdhënëses Vildane Sllamniku Kokollari në shkollën tonë u realizua një aktivitet me temën:vullnetarizmi, humanizmi dhe solidariteti.

Nxënësit organizuan dhe përgatitën disa pako ushqimore për familjet më në nevojë, duke treguar shpirtë human dhe solidaritet.

Ky aktivitet kishte për qëllim të nxisë tek nxënësit ndjenjën e përgjegjësisë, humanizmit dhe gatishmërinë për të ndihmuar ata që kanë më shumë nevojë.

Falënderojmë të gjithë nxënësit dhe kontribuesit për përkushtimin dhe zemërgjerësinë e treguar. 🤝❤️

📌 Ekspozita përmbyllëse - SHFMU “Selman Riza”

Sot u mbajt aktiviteti përmbyllës në kuadër të projektit “Fuqizimi i Nxënësve Kundër Diskriminimit dhe Dhunës në Shkolla”, ku u prezantuan punimet kreative të nxënësve, të realizuara gjatë aktiviteteve dhe trajnimeve të projektit mbi temat e trajtuara.

Këto punime pasqyrojnë mendimet, ndjeshmërinë dhe mesazhet ndërgjegjësuese të nxënësve kundër diskriminimit dhe dhunës, duke dëshmuar fuqinë e shprehjes kreative si mjet për ndryshim shoqëror.

🙏 Falënderojmë SHFMU "Selman Riza" Fushë Kosovë dhe gjithë stafin për mbështetjen e vazhdueshme dhe bashkëpunimin e shkëlqyer gjatë gjithë zbatimit të projektit.

Në veçanti, shprehim mirënjohje për:
• Drejtorin Esad Simnica,
• Zëvendësdrejtoreshën Bukurie Rizahu,
• Arsimtarin e Artit Besim Zymberi,
për angazhimin, përkushtimin dhe përkrahjen e vazhdueshme ndaj nxënësve dhe kësaj nisme.

🖼️ Kjo ekspozitë shënon një moment të rëndësishëm reflektimi dhe përmbylljeje, duke vendosur në qendër zërin dhe kreativitetin e nxënësve si aktorë të ndryshimit pozitiv në komunitet.

Ky aktivitet është pjesë e projektit “Fuqizimi i Nxënësve Kundër Diskriminimit dhe Dhunës në Shkolla”, që synon të fuqizojë nxënësit për të luftuar diskriminimin, dhunën, ngacmimin dhe abuzimin me substanca, duke krijuar një mjedis më të sigurt dhe gjithëpërfshirës - me fokus të veçantë tek komunitetet Rom, Ashkali dhe Egjiptian. 🌍

🤝 Falënderime të përzemërta për Dukatin e Madh të Luksemburgut, The Foundation House dhe Luxembourg Aid & Development për mbështetjen dhe partneritetin e tyre në realizimin e këtij projekti.

Urime nxënësve fitues në lëndën e Fizikës për rezultatet e shkëlqyera. Suksesi juaj dëshmon punë të palodhshme, logjikë të fortë dhe përkushtim ndaj dijes shkencore.

Sibora Hoxhaj klasa e IX-të dhe
Rejana Raci, klasa VIII-të

Suksese!

NJOFTIM

Të hënën fillon gjysmëvjetori i dytë në Komunën e Fushë Kosovës

Njoftojmë opinionin publik se të hënën, më 19 janar, rifillon procesi mësimor në të gjitha institucionet arsimore të Komunës së Fushë Kosovës.

Pas stabilizimit të situatës së krijuar nga vërshimet dhe sanimit të plotë të problemeve me sistemin e ngrohjes në shkollat ku kishte prishje, janë krijuar të gjitha kushtet e nevojshme për fillimin normal dhe të rregullt të procesit mësimor.

Me këtë rast, Drejtori i Drejtorisë Komunale të Arsimit në Fushë Kosovë, z. Adriatik Zeqiri, u ka përcjellë një mesazh urimi nxënësve dhe mësimdhënësve:

“Nxënës të dashur, ju urojmë mbarësi dhe suksese në mësime gjatë gjysmëvjetorit të dytë. Mësimdhënësve u shprehim mirënjohje të veçantë për përkushtimin, profesionalizmin dhe kontributin e tyre të vazhdueshëm në edukimin dhe formimin e brezave të rinj.”

Drejtoria për Arsim mbetet e përkushtuar në garantimin e kushteve të sigurta dhe cilësore për zhvillimin e procesit edukativo-arsimor.

Njoftim për shtyrjen e fillimit të gjysmëvjetorit të dytë

Duke u bazuar në gjendjen aktuale në territorin e Komunës së Fushë Kosovës, si pasojë e kushteve tejet të rënda atmosferike dhe reshjeve të vazhdueshme, të cilat kanë shkaktuar vërshime në shumë lagje dhe fshatra të komunës, si dhe duke marrë parasysh vështirësitë serioze në sigurimin e ngrohjes në disa institucione arsimore dhe temperaturat e ulëta, është vlerësuar se nuk janë krijuar kushtet minimale për zhvillimin normal të procesit mësimor.

Në këtë kontekst, merret vendim që fillimi i gjysmëvjetorit të dytë të shtyhet për një (1) javë, dhe se gjysmëvjetori i dytë do të fillojë më datë 19 janar në të gjitha institucionet e arsimit parauniversitar në Komunën e Fushë Kosovës.

Ky vendim është marrë në funksion të sigurisë së nxënësve dhe stafit arsimor, si dhe për të garantuar mbarëvajtjen e rregullt të procesit mësimor.

Për çdo informatë shtesë, publiku do të njoftohet përmes kanaleve zyrtare.

DKA – Fushë Kosovë - 11 Janar 2026