22/06/2026
💥 YANGIBOZOR TUMANIDA “YOSH IQTIDORLAR FESTIVALI” YUQORI SAVIYADA O‘TKAZILDI
Yangibozor tuman Maktabgacha va maktab ta’limi bo‘limi tashabbusi bilan tumandagi barcha umumiy o‘rta ta’lim maktablari hamda maktabgacha ta’lim tashkilotlari ishtirokida “Yosh Iqtidorlar festivali”ning tuman bosqichi ko‘tarinki ruhda bo‘lib o‘tdi.
Festivalda Yangibozor tuman hokimi A.Masharipov, tuman prokurori B.Eshnazarovlar ishtirok qilib tadbir ishtirokchilarini qutladilar.
Mazkur festival o‘tgan o‘quv yili davomida barcha ta’lim muassasalarida bosqichma-bosqich tashkil etilib, o‘quvchi-yoshlar va tarbiyalanuvchilarning ijodiy, intellektual, sport va san’at yo‘nalishlaridagi qobiliyatlarini namoyon etish, ularni qo‘llab-quvvatlash hamda yangi iste’dodlarni kashf etishga xizmat qildi.
Festivalning tuman bosqichida ta’lim muassasalarining eng iqtidorli o‘quvchilari va tarbiyalanuvchilari o‘z mahoratlarini namoyish etdilar. Tadbir davomida milliy va zamonaviy raqslar, musiqiy chiqishlar, badiiy kompozitsiyalar, tasviriy va amaliy san’at namunalari ko‘rgazmalari hamda innovatsion loyihalar taqdim etildi. Ishtirokchilarning chiqishlari tomoshabinlarda katta taassurot qoldirdi.
Festival yosh avlodning iste’dod va qobiliyatlarini yuzaga chiqarish, ularning bo‘sh vaqtini mazmunli tashkil etish, vatanparvarlik, milliy qadriyatlarga hurmat va ijodkorlik ruhida tarbiyalashga qaratilganligi bilan alohida ahamiyat kasb etdi.
Shuningdek, ushbu tadbir mamlakatimizda amalga oshirilayotgan “Dolzarb 90 kun” loyihasi doirasidagi vazifalar bilan hamohang tarzda tashkil etilib, yozgi ta’til davrida bolalar va yoshlarning bo‘sh vaqtini mazmunli o‘tkazish, ularni madaniyat, san’at, sport, kitobxonlik va ijodiy faoliyatga keng jalb etish maqsadlariga xizmat qildi. Festival davomida namoyish etilgan chiqishlar va ko‘rgazmalar yoshlarning iste’dodini rivojlantirish hamda ularning intellektual salohiyatini oshirish borasidagi ishlarning amaliy natijasi bo‘ldi.
Tadbir yakunida faol ishtirok etgan ta’lim muassasalari, iqtidorli o‘quvchilar va tarbiyalanuvchilar tuman hokimligining tashakkurnimasi,hamda qimmatbaho sovg‘alar bilan rag‘batlantirildi.
Xorazm viloyati Yangibozor tuman maktabgacha va maktab ta'limi bo'limi
Maktabgacha va maktab ta’limi vazirligi
