ซะป๊ะอเมริกา by ดร.อุ๊มลุ้ม

06/07/2026

ปามาเตียวแอ่ว Storm King Art Center พิพิธภัณฑ์กล๋างแจ้งขนาด 500 เอเคอร์ (1,265 ไร่) ตี้มีงานศิลปะร่วมสมัยขนาดใหญ่ อลังการ ตั้งโชว์อยู่ก๋างเป่งในธรรมชาติ เป๋นนึ่งในคอลเลคชั่นตี้ใหญ่ตี้สุดในอเมริกา เป๋นหน้าเป๋นต๋าของ ออเรนจ์เค้าท์ตี้แห่งรัฐนิวยอร์ค

ช่วงนี้หน้าฮ้อน ส่วนใหญ่ใบไม้ลู่กั๋นสังเคราะห์แสงก่อจะเขียว ๆ มีดอกไม้แซมล่อแมงมาผสมเกสร พิพิธภัณฑ์นี้ เปิ้นเปิดหื้อเข้าฟรีวันศุกร์แรกของเดือนมิถุนาถึงสิงหา ต้องกอยผ่อปฏิทินของเปิ้น เผื่อมีกิจกรรมเกี่ยวกับการผ่อธรรมชาติ ผ่อนก โยคะ คอนเสิร์ต

ปล๋ายกันยา ถึงต้นพฤศจิกา ใบไม้เปลี่ยนสีก่อน่าจะเป๋นแหมบรรยากาศนึ่ง

เอาไว้มาใหม่

06/04/2026

บ้านนี้บะหมีครกใหญ่ไว้แป๋งต๋ำส้ม แต่ว่า เป สเตนเลส (stainless) นี่เอาไว้ตึงล้างผัก แช่วุ้นเส้น ตี๋สุนแป้งคุ้กกี้ ละก่อเอามาต๋ำส้มได้สบายเลย ใจ๊โตยแก๋นต๋ำไม้จะได้บะบุบ

ข้าเจ้าก้าหามาแป๋งกับข้าวกิ๋นเมื่อใหญ่ ต๋อนฝึกใหม่ ๆ แป๋งจะใดก่อบะลำ จ๋นปอผอม ก่อค่อย ๆ เฮียนฮู้ว่า ขี้จิ๊เครื่องปรุงไปหน้อย

บะเดี่ยวแป๋งลำขึ้นนัก แต่ก่อต้องเฮียนฮู้ว่า แป๋งรสเข้ม บางเตื้อก่อเข้มล้ำไปจ๋นบะลำ ก่อต้องมาเฮียนฮู้ใหม่ว่า น้ำบะดาย (น้ำเปล่า) ก่อเป๋นเครื่องปรุงอย่างนึ่ง หื้อรสพอดี เช่น ทำน้ำอาจาด แป๋งต๋ำส้ม ใส่ก๊ะน้ำปลาหื้อเก็มบะปอ มันแฮงล้ำไป ใส่เกื๋อโตยจะดีเหลือ

ไผแป๋งกับข้าว มาแนะนำกั๋นโตยเน่อเจ้า

06/03/2026

แลงมา หลังเลิกงาน แมวก่อได้นั่งรถไปแอ่วตี้ใกล้ ๆ บ้าน ไปสวนสาธารณะผ่อน้ำผ่อนก กับไปฮ้านไอติม ผ่อลูกค้าตึงคนใหญ่กับหละอ่อน บางคนก่อโบกมือหื้อ

แมวมันยังบะชินเวลารถเลี้ยวก่อจะมีเสียงขะลุบตุ๊บตั๊บเบา ๆ ละก่อแขว่ก ๆ ไต่ปิ๊กตี้นั่ง

06/01/2026

ตะวาไปกิ๋นฮ้านอาหารเยอรมัน ยอมฮับเลยว่าบะแกว่น แต่ตี้เฮียนฮู้คือ ก๋ารใส่ชื่ออาหารในเมนู มันจะคนละเรื่องกับอาหารไทยกับอาหารอเมริกัน คือ ปกติ เฮาจะคาดหวังจากเมนูไทยกุ๊ภาค ว่ามันจะบอกวิธีก๋ารเกียม (ต้ม คั่ว แก๋ง ต๋ำ) กับว่าจานนั้นใส่อะหยัง (ผัก จิ๊น สมุนไพร) อาหารอเมริกันทั่ว ๆ ไปก่อจะคล้าย ๆ กั๋นคือ บรรยายว่า เป๋นจิ๊นย่างใส่ซอสบาร์บีคิว กาว่า แพนเค้กราดน้ำหวานโปะวิปครีม อะหยังแบบนี้

แต่ฮ้านเยอรมันนี่ หลายอันอาจจะเป๋นว่า อิจานนี้มีรากเหง้ามาจากแคว้นใด ซึ่งคนเขาก่อจะฮู้อัตลักษณ์ในก๋ารแป๋ง กาว่า ฮู้ว่า ไอตี้จะกิ๋นลุกตางใดมา เช่น บาวาเรียน เนิร์นแบร์เกอร์ แฟรงเฟิตเตอร์ แต่เฮาซึ่งบะฮู้ก่อว่าจะหวังเพิ่งอินเตอร์เน็ต แต่สัญญาณบะดีน่ากะ

บะเป๋นหยัง คนมักกิ๋น สั่งอะหยังมามันก่อตึงลำ เฮาก่อเลยได้ 1. ปลาเทร้าท์รมควัน เสิร์ฟเย็นกับผักกาดแก้ว โปะครีมฮอร์สเรดิช (ตี้เปิ้นเอาไปแทนวาซาบิเพราะถูกกว่านั่นนะ) 2. ไส้กรอกจากเนิร์นแบร์เกอร์ บนขนมปังเพรทเซล กับกะหล่ำดองซาวเคราท์ 3. จิ๊นลูกงัวชุบคะหนมปังทอด สไตล์เวียนนา 4. อันนี้ลูกยุจากปู่คาร์ล ซึ่งบอกว่า เยอรมันแป๋ง เค้กช็อกโกแลต ลำเน่อ ก่อเลยสั่งเค้กแบล็คฟอเรส ซึ่งเป็นเค้กช็อกโกแลตกับเชอรี่ จาก ภูมิภาคชวาร์ซวัลเดอร์

ไผมีคำแนะนำในการสั่งอาหารเยอรมัน กาว่าสังเกตอาหารจากวัฒนธรรมอื่น ๆ มาบอกมาแบ่งกั๋นเน่อเจ้า

06/01/2026

หน้า Spring นอกจากใบไม้จะออกละ สัตว์ตังหลายก่อมีลูกหน้อยเต๋มไปหมด ตึงตี้ถ่ายฮูปได้ง่ายอย่างลูกแมว ลูกไก่ กับตี้ขับรถก๋ายละหัน แต่ถ่ายฮูปบะตันอย่างลูกกว๋าง ลูกแรคคูน

05/29/2026

หันเปิ้นเอามาขายในเฟซบุ๊คมาร์เก็ตเพลสตี้อเมกา จากสามตี้ บางอันอยู่รัฐนิวยอร์ค บางอันอยู่รัฐอื่น ลุกตางใดมาหา? ศิลปะบ้านไหน? เก่าก่อนิ?
ข้าเจ้าบะเกยหันกำเตื้อ ไผเกยหันพ่องเจ้า?

05/28/2026

เกียมรถ Vanagon ยังบะแล้ว มาเกียมแมวก่อน สองตั๋วนี้เกยนั่งรถข้ามรัฐสองวันก่อเยียะมาแล้ว ตั้งแต่ย้ายมาบ้านหลังนี้ก่อบะค่อยได้นั่งรถไปไหน นอกจากไปหาหมอ ฉีดวัคซีน เวลาอยู่ในรถจะใส่ก๋ง คาดเข็มขัดไว้ตลอด ก่อเลยต้องมาฝึกใหม่ อันนี้ขึ้นรถวันแรก แบบหื้อสำรวจเต๋มตี้ จอดอยู่กะตี้ บะได้ขับไปไหน พอมพอมฮ้องแม๊ว ๆ ไต่ไปไต่มาอยู่ซาวกว่านาทีถึงจะยอมนั่งเรียบร้อย บิ๊กฟลัฟฟ์ (ขนปุ๊) ก่อฮ้อง แต่สนใจแมงตังนอกรถนักเหลือ
เดียวพอชินก่อน่าจะนิ่งขึ้น

05/27/2026

(ต่อ) รถ Vanagon ปี๋ 1991 ฉีดล้างรถเอาขี้ไคคู่ออก ดูดฝุ่น ทำความสะอาด แม้แต่แมว (ของเพื่อน) ก่อได้มาเตียวผ่อ เบาะนุ่ม เจ้าของเก่าเขาเป๋นวัยรุ่นยุค 70 รถก่อเลยมีไผ่บุหลังคา น้ำเต้าห้อยหน้ารถ สติ๊กเกอร์ข้อความห่าม ๆ เบาะมีฮูจากขี้เถ้าเป๋นตี้ ๆ
เปลี่ยนแบตฯ ก็เปิดไฟได้แล้ว แต่ต้องลุ้นกั๋นต่อว่า จะซ่อมเครื่องยนต์หื้อรถขับได้ก่อ ไว้มาอัพเดทเล่ยๆ เจ้า

05/26/2026

รถ Vanagon ปี 1991 คันนี้จอดไว้จ๋นปอขี้ไคคู่ขึ้น แต่ว่าเจ้าของก่อยังเอาไว้ใจ๊นั่งเล่น นอนเล่น คาร์ลก็เลยไปซื้อมาซ่อม เป๋นโปรเจคใหม่เจ้า เอาไว้สำหรับสันทนาการ ไปแคมปิ้ง ใหญ่ปอจะเอาแมวไปแอ่วโตยได้ ไว้มาอัพเดทเพิ่มเจ้า

07/12/2025

รายก๋ารดี ๆ น่าไปผ่อ

Public seminar: Rethinking Ethnic Studies in Southeast Asia, from July 20-22, 2025 at the First Floor Meeting Room (4107), Faculty of Social Sciences, Chiang Mai University

This seminar is jointly organized by the School of Ethnology and Sociology, Yunnan University (YNU), and the Regional Center for Social Science and Sustainable Development (RCSD), with the participation of the Center for Ethnic Studies and Development, Chiang Mai University and hosted by the Faculty of Social Sciences, Chiang Mai University.

For further details on topics and presenters, please follow the link: https://rcsd.soc.cmu.ac.th/event/seminar-rethinking-ethnic-studies-in-sea/