14/01/2026
ထိုင်ဝမ်ရောက် နိုင်ငံခြားသားပညာရှင်များနှင့် ကျောင်းသားများအတွက် အလုပ်လုပ်ကိုင်ခွင့်နှင့် နေထိုင်ခွင့် ဥပဒေအသစ်များ စတင်ကျင့်သုံး
ထိုင်ဝမ်အစိုးရ အမျိုးသားဖွံ့ဖြိုးတိုးတက်ရေးကောင်စီ (NDC) ၏ ထုတ်ပြန်ချက်အရ နိုင်ငံခြားသားပညာရှင်များကို ပိုမိုဆွဲဆောင်နိုင်ရန် ပြင်ဆင်ထားသည့် ဥပဒေအသစ်များသည် ယခု ၂၀၂၆ ခုနှစ်၊ ဇန်နဝါရီလမှစတင်၍ အသက်ဝင်မည် ဖြစ်ပါသည်။
၁။ ကျောင်းပြီးစ နိုင်ငံခြားသားများအတွက် အခွင့်အရေး
ထိုင်ဝမ်ဘွဲ့ရများ: ထိုင်ဝမ်တက္ကသိုလ်များမှ ဘွဲ့ရရှိထားသည့် နိုင်ငံခြားသား ကျောင်းသားများသည် ဘွဲ့ရပြီးနောက် ၂ နှစ်အထိ Work Permit (အလုပ်လုပ်ကိုင်ခွင့်) လျှောက်ထားရန်မလိုဘဲ ထိုင်ဝမ်တွင် လွတ်လပ်စွာ အလုပ်ရှာဖွေ/လုပ်ကိုင်နိုင်ပြီ ဖြစ်သည်။
ကမ္ဘာ့ထိပ်တန်းတက္ကသိုလ်ဘွဲ့ရများ: ကမ္ဘာ့အဆင့်သတ်မှတ်ချက် Top 200 တက္ကသိုလ်တစ်ခုခုမှ လွန်ခဲ့သော ၅ နှစ်အတွင်း ဘွဲ့ရရှိထားသူများသည် ထိုင်ဝမ်တွင် ၂ နှစ်ကြာ အလုပ်လုပ်ကိုင်နိုင်မည့် Open Work Permit ကို လျှောက်ထားနိုင်ပါသည်။ (ယခင်က ကုမ္ပဏီမှ အာမခံပေးရန် သို့မဟုတ် Point-based စနစ်ဖြင့် လျှောက်ရန် လိုအပ်ခဲ့ခြင်းဖြစ်သည်)။
၂။ အမြဲတမ်းနေထိုင်ခွင့် (PR) လျှောက်ထားမှုကို မြန်ဆန်စေခြင်း
ထိုင်ဝမ်တွင် ဘွဲ့ရရှိထားသူများအတွက် PR လျှောက်ထားရန် လိုအပ်သော "၅ နှစ် နေထိုင်ရမည်" ဆိုသည့် သတ်မှတ်ချက်မှ အောက်ပါအတိုင်း နုတ်ပယ်ခွင့်ရမည်ဖြစ်သည်-
ဘွဲ့ (Undergraduate): ၁ နှစ် နုတ်ပယ်ခွင့်ရမည်။
မဟာဘွဲ့ (Master's): ၂ နှစ် နုတ်ပယ်ခွင့်ရမည်။
ပါရဂူဘွဲ့ (Postgraduate/PhD): ၃ နှစ် နုတ်ပယ်ခွင့်ရမည်။ (ဆိုလိုသည်မှာ ပါရဂူဘွဲ့ရထားသူသည် ထိုင်ဝမ်တွင် ၂ နှစ် အလုပ်လုပ်ရုံဖြင့် PR လျှောက်ထားနိုင်မည် ဖြစ်သည်)
၃။ Specialist Professionals (ကျွမ်းကျင်ပညာရှင်များ) အတွက် အထူးခံစားခွင့်
ဝင်ငွေ သတ်မှတ်ချက် သို့မဟုတ် လုပ်ငန်းအတွေ့အကြုံ ပြည့်မီသည့် Specialist Professionals များသည် အချို့ကိစ္စရပ်များတွင် ထိုင်ဝမ်၌ ၁ နှစ် နေထိုင်ရုံဖြင့် PR လျှောက်ထားနိုင်ပါသည်။
၎င်းတို့၏ ဇနီး/ခင်ပွန်းများ သည်လည်း ကုမ္ပဏီမှ အာမခံပေးရန်မလိုဘဲ ထိုင်ဝမ်တွင် လွတ်လပ်စွာ အလုပ်လုပ်ကိုင်ခွင့် ရရှိမည်ဖြစ်သည်။
၄။ လူမှုဖူလုံရေးနှင့် အာမခံ အကျိုးခံစားခွင့်များ
PR မရသေးသော နိုင်ငံခြားသားပညာရှင်များသည် ထိုင်ဝမ်၏ အလုပ်သမားပင်စင်စနစ် (Labor Pension System) ထဲသို့ ဝင်ရောက်ခွင့်ရမည်။
PR ရရှိထားသူများသည် အလုပ်လက်မဲ့အာမခံ (Employment Insurance) စနစ်တွင် ပါဝင်ခွင့်ရမည်။
၂၀၂၆ ခုနှစ်၊ ဇွန်လ ၃၀ ရက် မှစတင်၍ ထိုင်ဝမ်တွင် ၁၀ နှစ်ထက်မနည်း နေထိုင်ခဲ့သော PR ရရှိထားသည့် နိုင်ငံခြားသားများသည် မသန်စွမ်းမှုနှင့် ရေရှည်ပြုစုစောင့်ရှောက်ရေး (Long-term Care) ဝန်ဆောင်မှုများကို ပထမဆုံးအကြိမ် ခံစားခွင့်ရရှိမည် ဖြစ်သည်။
NDC ဒုတိယဝန်ကြီး Jan Fang-guan ၏ ပြောကြားချက်အရ ၂၀၁၈ ခုနှစ်မှစ၍ ယခုကဲ့သို့ ဖြေလျှော့မှုများ ပြုလုပ်ခဲ့ခြင်းကြောင့် ထိုင်ဝမ်ရှိ နိုင်ငံခြားသားပညာရှင် အရေအတွက်မှာ ၃၀,၀၀၀ ခန့်မှ ၈၀,၀၀၀ နီးပါး အထိ သိသိသာသာ တိုးတက်လာခဲ့ကြောင်း သိရသည်။
#ထိုင်ဝမ်မြန်မာသတင်း
Source - focus Taiwan
