Azerbaycan Türkcesi Kursları

🟢 “Yay məktəbi – Bakı” proqramı çərçivəsində iştirakçılar Bakının tarixi və mədəni irsini əks etdirən bir sıra mühüm məkanları ziyarət ediblər.

🇦🇿 Ekskursiyalar zamanı tələbələr Azərbaycanın qədim tarixi, zəngin mədəniyyəti, milli-mənəvi dəyərləri və müasir inkişaf prosesi ilə yaxından tanış olmaq imkanı əldə ediblər.

✅ İştirakçılar ilk olaraq Azərbaycanın Vətən müharibəsində qazandığı tarixi Qələbəyə həsr olunmuş Zəfər Muzeyini və Qənimətlər Parkını ziyarət ediblər. Burada tələbələrə 44 günlük Vətən müharibəsi zamanı Azərbaycan Ordusunun göstərdiyi qəhrəmanlıq, əldə olunan tarixi zəfər və işğaldan azad edilmiş torpaqlar barədə ətraflı məlumat verilib. Ekskursiya zamanı nümayiş etdirilən eksponatlar iştirakçılar tərəfindən böyük maraqla qarşılanıb.

✅ Daha sonra iştirakçılar Azərbaycan Ədəbiyyat Muzeyində olublar. Muzeydə Azərbaycan ədəbiyyatının görkəmli nümayəndələrinin həyat və yaradıcılığı, klassik və müasir ədəbi irs haqqında məlumat təqdim olunub. Tələbələr Azərbaycan ədəbiyyatının müxtəlif dövrlərini əks etdirən eksponatlarla yaxından tanış olublar.

✅ Azərbaycan Xalça Muzeyinə səfər zamanı iştirakçılara Azərbaycan xalçaçılıq sənətinin tarixi, xalçaçılıq məktəbləri və milli ornamentlərin xüsusiyyətləri barədə məlumat verilib. Muzeydə nümayiş olunan qədim xalça nümunələri və tətbiqi sənət əsərləri tələbələrdə böyük maraq doğurub.

Proqram çərçivəsində iştirakçılar UNESCO-nun Dünya İrs Siyahısına daxil edilmiş İçərişəhəri də ziyarət ediblər. Ekskursiya zamanı Qız Qalası, Şirvanşahlar Sarayı kompleksi və qədim Bakı memarlığının nümunələri ilə tanış olan tələbələrə İçərişəhərin tarixi və mədəni əhəmiyyəti barədə məlumat verilib.

***
✅✅✅ Beləliklə, 8-11 may tarixlərində keçirilən “Yay məktəbi - Bakı” proqramı iştirakçıların Azərbaycan dili, tarixi və mədəniyyətinin Türkiyədə təbliği, Azərbaycan-Türkiyə qardaşlıq münasibətlərinin möhkəmləndirilməsi, eyni zamanda Azərbaycanla bağlı təəssüratların daha da zənginləşdirilməsi baxımından mühüm əhəmiyyət daşıyıb.

🟢 “Yay məktəbi – Bakı” proqramı çərçivəsində iştirakçılar Şəhidlər Xiyabanını ziyarət ediblər.

🇦🇿 Şəhidlər Xiyabanında tələbələr Azərbaycanın azadlığı və ərazi bütövlüyü uğrunda canlarından keçən qəhrəman şəhidlərin xatirəsini dərin ehtiramla yad edib, ölkənin müstəqillik mübarizəsi barədə məlumatlandırılıblar.

🇦🇿🇹🇷 Proqram iştirakçıları həmçinin Bakı Türk Şəhidliyini ziyarət ediblər. Ziyarət zamanı tələbələr Azərbaycan və Türkiyə xalqlarının ortaq tarixini, qardaşlıq və həmrəylik ruhunu əks etdirən bu müqəddəs məkanlarla yaxından tanış olublar.

✅ Şəhidlərin əziz xatirəsi ehtiramla yad edilib, Azərbaycan və Türkiyə arasında sarsılmaz dostluq və qardaşlıq münasibətlərinin tarixi əhəmiyyəti barədə məlumat verilib.

🇦🇿 🟢 “Yay məktəbi - Bakı” proqramı çərçivəsində iştirakçılar Azərbaycan Respublikası Prezidentinin İşlər İdarəsinin Prezident Kitabxanasını ziyarət ediblər.

✅ Prezident Kitabxanasının Baş məsləhətçisi-bölmə müdiri Sonaxanım Abasova tərəfindən kitabxana haqqında iştirakçılara geniş məlumat verilib.

Kitabxananın böyük məsləhətçisi, proqram təminatı qrupunun rəhbəri Tuncay Hüseynzadə isə Prezident Kitabxanasının elektron resursları və rəsmi internet səhifəsi ilə bağlı təqdimat edib.

Görüşün sonunda Azərbaycan Mədəniyyət Mərkəzi tərəfindən Prezident Kitabxanasına kitablar hədiyyə olunub, qarşılıqlı əməkdaşlıq perspektivləri müzakirə edilib və tələbələrin sualları cavablandırılıb.

***
✅ İştirakçılar həmçinin Mirzə Fətəli Axundzadə adına Azərbaycan Milli Kitabxanasında olublar. Ulu Öndər Heydər Əliyevin xatirəsinə həsr olunmuş xüsusi guşəni ziyarət edilib.

Ekskursiya zamanı kitabxana əməkdaşı tərəfindən tələbələrə kitabxananın fəaliyyəti və fondları haqqında ətraflı məlumat verilib.

🟢 "Yay məktəbi - Bakı" çərçivəsində Xəzər Universitetində görüş keçirilib

🇦🇿 Azərbaycan Respublikasının Türkiyədəki Səfirliyinin nəzdindəki Mədəniyyət Mərkəzinin Qazi Universitetindəki Azərbaycan Türkcəsi Tədris Ocağının tələbələri üçün Ümummilli Lider Heydər Əliyevin anadan olmasının 103-cü ildönümünə həsr edilmiş “Yay məktəbi – Bakı” proqramı təşkil olunub.

✅ Proqram çərçivəsində Xəzər Universitetində “Heydər Əliyev və Türkçülük” mövzusunda mühazirə təşkil olunub. Universitetin Dillər və ədəbiyyatlar kafedrasının müəllimi Əsmər Kərimova iştirakçılara Ümummilli Lider Heydər Əliyevin türk dünyasının birliyi istiqamətində həyata keçirdiyi siyasət, Türk dövlətləri arasında əməkdaşlığın inkişafına verdiyi töhfələr və milli-mənəvi dəyərlərin qorunması sahəsində fəaliyyəti barədə geniş məlumat təqdim edib.

Mühazirə zamanı Ulu Öndərin Azərbaycançılıq ideologiyası, Türk dünyası ilə bağlı strateji baxışları və gənclərin milli ruhda yetişdirilməsinin əhəmiyyəti xüsusi vurğulanıb. İştirakçılar mövzu ətrafında fikir mübadiləsi apararaq onları maraqlandıran sualları ünvanlandırıblar.

Daha sonra universitetin beynəlxalq əlaqələr şöbəsinin əməkdaşları Firuz Süleymanov, Seyran Əliyeva və Jalə Məmmədova tələbələri ali təhsil müəssisəsinin fəaliyyəti, beynəlxalq əməkdaşlıq imkanları və universitetin zəngin kitabxanası ilə tanış ediblər.

Görüş zamanı tələbələr universitetin tədris infrastrukturu, elmi fəaliyyəti və beynəlxalq layihələri barədə ətraflı məlumat əldə ediblər.

🟢 “Bir millət, iki dövlət” ideyası tələbələrlə keçirilən görüşdə diqqət mərkəzində olub

Azərbaycan Respublikasının Türkiyədəki Səfirliyinin nəzdindəki Mədəniyyət Mərkəzinin Qazi Universitetindəki Azərbaycan Türkcəsi Tədris Ocağının tələbələri üçün Ümummilli Lider Heydər Əliyevin anadan olmasının 103-cü ildönümünə həsr edilmiş “Yay məktəbi – Bakı” proqramı təşkil olunub.

✅ Proqram çərçivəsində iştirakçılar “Modern İnkişaf və Ailə” İctimai Birliyində olublar.

Görüş zamanı birliyin sədri Zərifə Quliyeva tələbələr üçün seminar keçirərək Heydər Əliyevin dövlətçilik irsi, Azərbaycan–Türkiyə qardaşlığı və “Bir millət, iki dövlət” fəlsəfəsi ilə bağlı fikirlərini bölüşüb. O qeyd edib ki, Ulu Öndərin ideyalarının gənc nəslə aşılanması, Azərbaycan dili və mədəniyyətinin beynəlxalq müstəvidə tanıdılması baxımından belə layihələr xüsusi əhəmiyyət daşıyır.

Tədbirdə Azərbaycan-Türkiyə əlaqələrinin inkişafında gənclərin rolu, ortaq mədəni dəyərlər və Azərbaycan dilinə artan maraq ətrafında fikir mübadiləsi aparılıb. Proqramın məqsədi və həyata keçirilən layihələr barədə məlumat verilib. Görüş interaktiv müzakirələrlə davam edib və tələbələrin sualları cavablandırılıb.

🟢 Azərbaycan Türkcəsi Tədris Ocağının tələbələri üçün Azərbaycan Yazıçılar Birliyində görüş təşkil olunub

Görüşdə Azərbaycan Yazıçılar Birliyinin sədri Anar Rzayev, Xalq şairi Sabir Rüstəmxanlı, akademik Kamal Abdulla, Xalq şairi Vahid Əziz, yazıçı-professor Hüseynbala Mirələmov və Azərbaycan Mətbuat Şurasının sədri Rəşad Məcid iştirak ediblər.

Görüş zamanı yazıçılar və ədəbiyyat nümayəndələri Azərbaycan dilinin zənginliyi, milli ədəbiyyatın inkişaf yolu və yaradıcılıq prosesi ilə bağlı fikirlərini iştirakçılarla bölüşüblər. Çıxışlarda Azərbaycan dilinin qorunması, milli-mənəvi dəyərlərin yaşadılması və gələcək nəsillərə çatdırılmasının əhəmiyyəti xüsusi vurğulanıb.

Görüşdə Türkiyədəki Azərbaycan Mədəniyyət Mərkəzinin nümayəndəsi Dr. Şəhla İbişova çıxışında Mərkəzin fəaliyyəti, Azərbaycan dilinin Türkiyədə tədrisi istiqamətində həyata keçirilən layihələr və tələbələrin Bakı səfərinin əhəmiyyəti barədə məlumat verib.

Ədəbiyyat nümayəndələri bu kimi layihələrin Azərbaycanın Türkiyədə daha yaxından tanıdılması, Azərbaycan dilinin, ədəbiyyatının və milli-mədəni dəyərlərinin təbliği baxımından mühüm rol oynadığını qeyd ediblər.

Görüş iştirakçıların ədəbiyyat nümayəndələrinə ünvanladıqları suallar və qarşılıqlı fikir mübadiləsi ilə davam edib.

Görüşün sonunda yazıçılar öz kitablarını imzalı şəkildə iştirakçılara hədiyyə ediblər, xatirə şəkilləri çəkilib.

🟢 Azərbaycan Türkcəsi Tədris Ocağının tələbələri üçün “Yay məktəbi-Bakı” proqramı təşkil olunub

🇦🇿 Azərbaycan Respublikasının Türkiyədəki Səfirliyinin nəzdindəki Mədəniyyət Mərkəzinin Qazi Universitetindəki Azərbaycan Türkcəsi Tədris Ocağının tələbələri üçün Ümummilli Lider Heydər Əliyevin anadan olmasının 103-cü ildönümünə həsr edilmiş “Yay məktəbi – Bakı” proqramı təşkil olunub.

Proqram çərçivəsində iştirakçılar ilk olaraq Fəxri Xiyabanda Ümummilli Lider Heydər Əliyevin məzarını ziyarət ediblər. Ziyarət zamanı Türkiyədəki Azərbaycan Mədəniyyət Mərkəzinin nümayəndəsi, Qazi Universitetinin Azərbaycan Türkcəsi Tədris Ocağının rəhbəri Dr. Şəhla İbişova tələbələrə Heydər Əliyevin həyat və fəaliyyət yolu, Türk dünyası ilə bağlı siyasəti və Azərbaycan dövlətçiliyinin formalaşmasındakı rolu barədə ətraflı məlumat verib.

Cari ilin 8-11 may tarixlərində təşkil edilən proqram çərçivəsində iştirakçılar Bakı şəhərinin tarixi və mədəni məkanları ilə tanış olub, müxtəlif tədbirlərdə iştirak ediblər.

Azərbaycan Türkiyənin Rizə şəhərində keçiriləcək kitab sərgisində fəxri qonaq statusunda iştirak edəcək.

Sərgidə ölkəmizi Türkiyədəki Azərbaycan Mədəniyyət Mərkəzi xüsusi stendlə təmsil edəcək.

🎭🎨🎶Bütün mədəniyyət xadimlərini təbrik edirik!