The club club entreprenariat iset kairouan

كلمة jalons او بالانجليزية mile-stone بالدارجة حجرة الكيلومتر و تنجم تكون بالفرنسية زادة اسمها événement...

هي outil ضروري عند اي مدير مشروع مهما كانت طريقة الي يستعمل فيها لادارة المشروع... jalon نقطة توقف، يتم فيها تقيم وحدة من مراحل المشروع و الا تقييم مدى توفر الوثائق و les livrables متاع المشروع و الا اتخاذ القرارات للباقي متاع المشروع ...

نقاط توقف هذم الهدف منهم تقليل تراكم المشاكل و حلهم في كل مرحلة و بمجرد ما يتم المصادقة على المرحلة هذيكا المشروع و الاشغال تتعدى للمرحلة الي بعدها..
تحديد les jalons يتم وقت لplanification متاع المشروع نلقاوهم خصوصا في diagramme de gantt و يتحطو بشكل مسبق،

مفيهمش عدد معين فقط يكونو بالعدد الكافي باش المشروع يمشي... كيف كيف مفيش حد معين يحددهم مدير المشروع، الحريف، المراقب موش مهم...

اليوم مفمش بزنس،

اليوم موضوع اخر، اول شي مبروك للمتخرجين جدد "welcome to the real life"
نعرفو انو حتى حد حكالكم اش مش تعملو كي تاخذو شهادة و انكم واقفين على مفترق طرق موش عارفين اشنوما الخيارت المتاحة بنسبة ليكم ، ليوم مش نحكولكم على فرصة مذبيكم ما تضيعوهاش خصوصا انو ناس لكل تقزم فيها بما فيهم بعض الاساتذة يحتقروها، لكن نطمنكم انو اي حد يقزمها او يحتقرها ما يعرفش العالم و صناعة حاليا كيفاه تمشي و كيفاه كلمة "ou équivalent" صارت ملح ما يغيب على طعام في عروض شغل،
ليوم مش نحكولكم على كل شي متعلق بالمستار و علاه المستار مهمة برشة و علاه لازم تزربو في تقديم توا بحكم اكبر الكليات تسكر على بكري :

هذم صور من فورماسيون
les fondamentaux de management des risques الي صارت نهار ثلاثاء مع اشرف العوادي
الي نشكروه على تطوع و تقديم الفرمسيون هذي و استعدادو لتقديم دورات تكوينية في مجالات اخرى

عسلامة ناس الكل ، ان شاء الله نهار ثلاثاء 14h00 مش يكون عندنا فرمسيون في اساسيات ادارة المخاطر /gestion des risques و الي هي مهارة ضرورية لناس الكل خصوصا في مجال الاستثمار ، مجال المالي، مجال informatique ، مجال ادارة المشاريع ، مجال صحة و سلامة المهنية. ..

ان شاء الله الفرمسيون مش تكون بتقديم من مؤسس و رئيس السابق لمنظمة انا يقظ iwatch الي خبرتو تكوينو في جامعات برمنغهام و منسوتيا و ستاندفورد و تونس يخليه من ابرز المختصين في المجال هذا

عسلامة ناس الكل ، ليوم نحكو على موضوع يمثل مشكل لاغلب اصحاب شركات... الي هو استخلاص ديون

تلقى فلوسك مفرتة عند الحرفاء في شكل ديون وانت معندكش سيولة لازمة باش تتحرك ، يقول لقايل نبيع كان بالحاضر لهنا نقلك تفقد تنافسية متاعك و تتمسح من المرشي بسهولة كبيرة بحكم الحريف ديما يلوج على flexibilité و معاملة الخاصة رغم مشاكلهم...

من الحلول المعروفة عالميا لاستخلاص ديون خصوصا وقت تبدى محتاج لفلوس ضروري و موعد لخلاص مزال بعيد هو factoring..
بكل بساطة تبيع ديونك لشركة اخرة و الي هي متخصصة في الامور هذي وتتسمى شركات factoring يشرو فاتوراتك في شكل عقد بالطبيعة موش بسومهم الاصلي بحكم انو فمة ريسك متاع عدم دفع تتوفرلك انت سيولة و يتحملو هوما امور لخلاص مع حرفائك، الفارق بين شريان من عندك و القبضان هذاكا هامش ربح متاعهم و عموما شركات factoring تبدى قوية برشة ماليا و زادة فيها فريق قوي برشة متاع محاسبين و مستشارين قانونين، و قطاع الfactoring تنظمو منظمة تخصيم الدولية FCI facialatiting open account receivables finance

الحل ثاني لاستخلاص ديون هو شركات تحصيل ديون و الا les entreprises de recouvrement ، نتصور كلنا شفنا في افلام الاكشن العصابات ديما عندها ناس المهمة متاعها تحصيل الديون بالعنف و تهديد بالقتل،. هذم شركات كيما اكاكا اما بالقانون ، عموما تلقهم عندهم مستشارين قانونين و جبائين و محاسبين ، يصححو معاك كنتراتو مقابل نسبة من ديون و الا بالاجر و تعطيهم carte blanche باش يتصرفو مع الحريف المهم يجيبولك فلوسك، يتفاوضو، يرفعو قضايا... بساسة بالقوة موش مهم المهم انت تاخذ فلوسك بشكل قانوني ...

عسلامة ناس الكل ، مزالنا مواصلين في الحديث على اساسيات المحاسبة، ليوم مش نحكو على جباية (القباضة) و انواع البتيندا و شركات..

في تونس عندنا زوز عايلات كبار متاع تصنيف جبائي :
الشخص الطبيعي : الي هو انسان عندو معرف وحيد الي هو رقم بطاقة تعريف متاعو ، و عندو معرف جبائي الي هو رقم البتيندا،
الشخص طبيعي ينجم يتمتع بدفع الاداءات بنظام تقديري ، regime forfaitaire الي هو يخص الانشطة البسيطة و يعمل تصريح مرة بركة في العام و يخلص 200 دينار في العام اكهو ، و نظام هذا الدولة ماشية و تحب تتخلص منو، لدرجة انك تنجم تخرج منو لنظام اخر اما متنجمش ترجعلو...

النظام الثاني هو نظام حقيقي regime reel، الي هو معقد شوية حسب نشاط متاعك عندك اداءات معينة تدفعها كيما الاداء على قيمة المضافة، كيما مساهمة في صندوق الاجراء.... ، التصريح متاعك تعملو كل شهر و ما يلزمكش تفوت نهار 15 من كل شهر باش تحط تصريح متاعك مكانش تتخطى حسب نشاط متاعك و الخطية تبدى غالبا من 50 دينار

التصنيف ثاني هو الشخص المعنوي الي في تعريف لبسيط متاعو هو مؤسسة هو تجمع/كيان متاع اشخاص او اموال ، مستقل عن الاشخاص الي كونوه... بمعنى اخر وقت تصير مشكلة الاشخاص الي كونوه و ممتلكاتهم معندهمش دخل فيه...
الشخص المعنوي ينجم يكون جمعية او شركة و لهنا نحكو على شركات الي كلها خاضعة لنظام الاداءات الحقيقي كيما شخص طبيعي، و اخر اجال باش يحطو الاداءات متاعهم هو قبل 28 من كل شهر مكانش يتخطو و يخضعو لنفس الاداءات متاع شخص طبيعي خاضع لregime rèel مع فروق بسيطة حسب نشاط بحكم انو فمة انشطة لازمها رخص، و عموما شركات اكثر موثوقية في تعامل معها من الاشخاص طبيعيين، و زادة كيما قلنا بكري المكونين متاعها و ممتلكاتهم محمية في حالة المشاكل

عسلامة ناس لكل باش نواصلو اليوم حديثنا على اساسيات المحاسبة ، انت كصاحب مشروع او freelancer, ديما عندك مشكلة...متاع بقداه مش تبيع المنتج ، او بقداه مش تقدم services متاعك مشكلة chiffrages يعني...

لهنا فمة مدرسة متاع تشوف الاسعار في سوق و تعمل حاجة تشبه اما للاسف موش ديما الموضوع مربح خصوصا كي تبدى بادي جديد، لاك في نفس مستوى المنافسين و لا عندك إمكانياتهم،

المدرسة ثانية تسعر وحدك،

اذا منتج صناعي ،
تحسب اش استعملت مواد اولية + هامش صغير (متاع تغير الاسعار عموما بن 2 و 4٪ ) + قداه شد وقت خدمة و بطبيعة انت تعرف الخدام قداه مش تخلصو في ساعة حتى لو انت خدمت بيدك و معندكش خدامة (خاطر كي مش تسعر ليوم غدوة مش يصير عندك خدامة و موش مليح زيادة الاسعار ديما) + مصاريف نقل (اذا فمة) /مصاريف تعليب (اذا فمة) ....
مجموع الحسبة هذي تضربو في هامش ربح متاعك الي عموما يمشي بين (10 و 35٪) و بنسبة للوخيان الملتزمين و يتحرو برشة امور شريعة و دين هامش ربح ما يفوتش 25٪ في اغلب المذاهب

اما اذا انت تعمل في خدمات او freelancer ، مثال يجيك حد يقلك اخدملي logo و الا اعملي conception mècanique و الا application... لهنا مفمش مواد اولية و مفمش نقل... الحاجة الوحيدة الي عندها قيمة هي الوقت.. قداه مش تشدك الخدمة وقت ، تحدد قداه مش تشدك وقت و تضرب في سعر ساعة الي عموما تبدى من 15 دينار، و بطبيعة فمة حد ادنى للحساب، يعني مثال خدمة تشدك فقط نصف ساعة اكيد ماكش باش تحسبها نصف ساعة، بمعنى اخر خدمة ساعة او ساعتين و ما اقل تحددلهم سعر فيكس مثال 30 دينار لاي خدمة ساعتين و ما اقل و الباقي ترجع تحسب بساعة ....

عندنا الوخيان الي يخدمو في نقل كيمون و يخدم كريات، لهنا فمة برشة طرق اما عموما الحساب يمشي حسب المسافة و حجم الكميون، كيمون صغير الكيلوماتر بدينار و 200 مليم كمعدل حاليا ، اكبر شوية يولي ب1 دينار و 500 و اكاكا كل ما يكبر الكميون تختلف تسعيرة و زادة الوزن كيف يبدى مخلي الكميون في حدو الاقصى نفس العملية و بطبيعة بعد تدخل فيها معاملات حسب نوعية الحريف و كي نقول دينار و 200 هذا وقت سلعة تبدى فوق الكميون مرواحك فارغ متحسبوش على الحريف ،

عسلامة ناس الكل ، اي رائد اعمال لازم يكون عندو حد ادنى من معرفة بأساسيات و مفاهيم المحاسبة باش يعرف يسير مشروع متاعو..

ليوم مش نحكو اش معنها الاصول les actifs :
في تفسيرهم لبسيط هذم اي حاجة تملكها شركة اوصاحب المشروع و عندهم قيمة مادية يعني كي تبيعهم يولو فلوس، مثال عقارات، كراهب ، مكينات ، ديون عند les client، قايمة متاع كليونات ،stock متاع سلعة ، افكار و براءات اختراع مسجلة، سيولة نقدية في بانكة اسهم في شركات اخرة ... هذم لكل يتسماو اصول شركة و الي هوما ضمانة و مصدر قوة و استمرارية شركة، مالاخر اي حاجة تجيب فلوس هي الاصول بنسب للمستثمر

الاصول تتقسم لنوعين :
-اصول متداولة الي هي stock سلعة و الا cash في بانكة ، ديون عند الكليونات ...

-الاصول ثابتة الي هي تتمثل في العقارات و علامة تجارية...

الخصوم les passifs

الي هي نجمو نلخصوها في كلمة الالتزامات و المسؤلية المادية عند ناس... يعني ديونك عند البنوك و المزودين، خلاص الخدامة و غير
و الخصوم نجمو نقسموها

-لخصوم متداولة الي هي دفوعات الي واجبة عليك باش تدفعها في 12 شهر،

- الخصوم الثابتة الي الدفعان متاعها ينجم يفوت 12 شهر

بمجرد تعرف انت قيمة اش تملك، و تطرح منو قيمة ديون و الالتزامات لهنا الي مش يبقى يتسمى هو حقوق الملكية و الا حقوق المساهمين تتسمى l'équité بالفرنسية، و الي هي تمثل مساهمة شركاء، بمعنى اخر في حالة افلست شركة نحسبو قيمة حقوق الملكية و نقسموها على شركاء حسب المساهمة متاعهم

عسلامة ناس لكل ساعات تصيرلنا انو كي تطلب صحن كفتاجي ، يقلك تحب معها كعبة ڨازوز ؟ تبدى تلعب في لعبة على نات apps تقترح عليك سلاح او درع او اي مميزات بالفلوس مثلا...

الحاجة هذي ممكن برشة تعدات علاهم لكن حد ما وقف و سإل علاش انا عندي طلب معين او نعمل في حاجة معينة علاش يقترحو عليا هكا...

تقنية هذي تتسمى تسويق cross selling ، البيع العابر ، و يتم فيها رفع قيمة صفقة و تخريج انواع اخرة من سلعة الي ما تجيش على بالك في وقت تبدى شهية متاع الانفاق محلولة و بما انو انت قررت باش تخرج فلوس تلقى انو ما فيها باس تزيد شوية فلوس اخرين باش تاخو حاجة اخرة ، شوية مصروف ما يقلقش...

على نفس المنوال تجي تاخو في كسكروت ديراكت يقلك دوبل عظم؟!! و الا تطلب دبوزة ماء يقلك بأيترا و نص... طريقة هذي تتسم up selling او الارتقاء بصفقة و هي تنتقل بالحريف من حجم لحجم باش تخرج اكثر كمية من سلعة المتوفرة...

و فمة الحالة ثالثة الي هي dowen selling هذا كي تعرض على الحريف منتج لكن تلقى منو رفض لهنى تهبط بقيمة صفقة مثال كنت مش تعرض عليه منتج كبير تعرض عليه منتج اصغر و يتناسب مع budget متاعو مثلا يقترح عليك ڨازوزة canette في مطعم ترفض، يقلك هاو عندنا بلار صغير...