24/08/2026
МАҚОМИ АВВАЛИ ЛИТСЕЙ - ТӮҲФА БА ҶАШНИ ИСТИҚЛОЛИЯТ
Дар доираи машварати августии кормандони соҳаи маорифи вилояти Суғд, ки дар Кохи фарҳанги ба номи Абӯабдуллоҳи Рӯдакии шаҳри Хуҷанд бо иштироки Раиси вилояти Суғд муҳтарам Раҷаб Аҳмадзода ва Вазири маориф ва илми Ҷумҳурии Тоҷикистон муҳтарам Саидзода Раҳим Ҳамро баргузор гардид, натиҷаҳои фаъолияти муассисаҳои таълимии вилоят дар самти таълиму тарбия, омодасозии хонандагон ба олимпиадаву озмунҳо ва дастовардҳои омӯзгорону хонандагон мавриди таҳлил ва баррасӣ қарор гирифтанд.
Дар машварати мазкур фаъолияти муассисаҳои таълимӣ дар давраи гузашта ҷамъбаст гардида, барои ноил шудан ба натиҷаҳои боз ҳам баландтар дар соли нави таҳсил вазифаҳои мушаххас муайян карда шуданд. Таъкид гардид, ки баланд бардоштани сифати таълим, рушди қобилияти зеҳнӣ ва эҷодии хонандагон, омода намудани насли донишманду соҳибистеъдод ва иштироки фаъол дар олимпиадаву озмунҳои ҷумҳуриявию байналмилалӣ аз самтҳои муҳими фаъолияти муассисаҳои таълимӣ ба ҳисоб мераванд.
Дар ин машварати муҳим Муассисаи давлатии таълимии "Литсей барои хонандагони болаёқат дар шаҳри Хуҷанд" бо натиҷаҳои назарраси худ дар самти олимпиадаҳои фаннӣ мавқеи пешсафиро соҳиб гардид.
Аз ҷумла, хонандагони литсей дар олимпиадаҳои фаннӣ ба 36 ҷойи фахрӣ сазовор гардида, дар байни муассисаҳои таълимии вилоят ҷойи аввалро ишғол намуданд. Барои чунин натиҷаи назаррас литсей бо мукофотпулии 7 000 сомонӣ қадрдонӣ карда шуд.
Ба даст овардани чунин натиҷаҳои назаррас, пеш аз ҳама, аз фазои сулҳу субот ва тинҷиву оромӣ, дастгириҳои пайвастаи давлату Ҳукумати Ҷумҳурии Тоҷикистон ба соҳаи маориф, фароҳам овардани шароити мусоиди таълиму тарбия, инчунин фаъолияти самараноки роҳбарияти литсей, заҳмати содиқонаи омӯзгорон ва талошҳои пайвастаи хонандагон сарчашма мегирад.
Роҳбарияти муассиса ҷиҳати фароҳам овардани шароити мусоиди таълимӣ, дастгирии омӯзгорони фаъолу соҳибтаҷриба, муайян ва рушди хонандагони болаёқат, ташкили машғулиятҳои иловагӣ ва омодасозии ҳамаҷонибаи хонандагон ба олимпиадаву озмунҳо пайваста тадбирҳои заруриро роҳандозӣ менамояд. Ҳамзамон, ба баланд бардоштани сифати таълим, истифодаи усулҳои муосири таълим ва ҷорӣ намудани таҷрибаи пешқадам дар раванди таълим таваҷҷуҳи махсус зоҳир карда мешавад.
Ин дастоварди назаррас далели он аст, ки дар литсей ба баланд бардоштани сатҳу сифати таълим, ошкор ва рушди истеъдоди хонандагон, омодагии ҳамаҷонибаи онҳо ба олимпиадаҳо ва озмунҳои фаннӣ таваҷҷуҳи махсус зоҳир карда мешавад. Омӯзгорони муассиса пайваста кӯшиш менамоянд, ки бо истифода аз усулҳои муосири таълим, машғулиятҳои иловагӣ, кор бо хонандагони болаёқат ва омодасозии мақсаднок барои олимпиадаҳо қобилияту дониши хонандагонро боз ҳам рушд диҳанд.
Дар баробари дастовардҳо дар олимпиадаҳои фаннӣ, соли таҳсили гузашта хонандагони литсей дар дигар озмуну чорабиниҳои зеҳнӣ, фарҳангӣ, варзишӣ ва эҷодӣ низ иштироки фаъол дошта, бо натиҷаҳои назаррас баромад намуданд. Аз ҷумла, хонандагони муассиса дар озмунҳои ҷумҳуриявӣ ва минтақавӣ, олимпиадаҳои фаннӣ, чорабиниҳои фарҳангӣ ва дигар мусобиқаҳои зеҳниву эҷодӣ фаъолона иштирок намуда, сазовори ҷойҳои ифтихорӣ гардиданд.
Дастоварди 36 ҷойи фахрӣ ва гирифтани ҷойи аввал дар миқёси вилояти Суғд барои коллективи литсей натиҷаи арзандаи фаъолияти як соли таълимӣ ба ҳисоб рафта, дар арафаи таҷлили 35-солагии Истиқлоли давлатии Ҷумҳурии Тоҷикистон аҳамияти хоса дорад. Ин натиҷа ҳамзамон масъулияти роҳбарият, омӯзгорон ва хонандагонро барои нигоҳ доштани мавқеи пешсаф ва ба даст овардани дастовардҳои нав бештар менамояд.
Бо мақсади идомаи ин муваффақиятҳо дар литсей минбаъд низ ба баланд бардоштани сифати таълим, истифодаи самараноки технологияҳои муосир, такмили маҳорати касбии омӯзгорон, рушди қобилияти хонандагони болаёқат ва омодагии онҳо ба олимпиадаву озмунҳои сатҳи ҷумҳуриявию байналмилалӣ таваҷҷуҳи аввалиндараҷа дода хоҳад шуд.
