Муассисаи таҳсилоти миёнаи умумии #3-и ноҳияи Рӯдакӣ

Санаи 17 май дар маркази ноҳияи Рӯдакӣ Рӯзи дави миллӣ ва веломарафон бо як шукуҳу шаҳомати хосае баргузор гардид. Дар ин чорабинии муҳими варзишӣ омӯзгорон ва хонандагони зиёде (писарону духтарон) аз муассисаи таҳсилоти миёнаи умумии №3-и ноҳияи Рӯдакӣ низ фаъолона иштирок намуда, соҳиби ҷойҳои аввал ва ҷоизаву ифтихорномаҳои хотиравӣ гардиданд. Хонандаи синфи 10 "Б"-и таълимгоҳ Аллаёров Абдувалӣ дар давидан ва хонандаи синфи 9 "Ғ" Холов Аҳмад дар веломарафон сазовори ҷойҳои якум гардиданд, ки ин натиҷа ифтихори муассиса мебошад. Маъмурияти таълимгоҳ ба омӯзгорони фанни тарбияи ҷисмонӣ ва хусусан, омӯзгор Урозов Шералӣ, ки ҳарду хонандаи дар боло зикршуда шогирдони ӯ мебошанд, миннатдории худро баён менамояд. Дар оянда низ маъмурият ва кулли омӯзгорони муассиса кӯшиш менамоянд, ки дар пешрафт ва комёбии насли наврас саҳми арзандаи худро гузоранд.

Санаи 7 феврали соли ҷорӣ дар муассисаи таҳсилоти миёнаи умумии №3-и ноҳияи Рӯдакӣ озмуни "Беҳтарин хушнавис" аз рӯйи номинатсияҳои "Ман зебо менависам" барои хонандагони синфҳои 1-4, "Хушнависӣ зебопарастист" барои хонандагони синфҳои 5-7 ва "Қалами сабз" барои хонандагони синфҳои 8-11 баргузор гардид. Иштирокчиён хеле зиёд буданд ва озмуни мазкур шаффоф ва дар сатҳи баланд гузаронида шуд. Ҳадаф аз баргузории озмуни мазкур баланд бардоштани ҳисси ватандӯстӣ, эҳтиром гузоштан ба забони давлатӣ ва ҷалби насли наврас ба дурусту зебо навиштан мебошад.

Дар давоми моҳи ноябри соли ҷорӣ дар муассисаи таҳсилоти миёнаи умумии №3-и ноҳияи Рӯдакӣ бахшида ба Рӯзи парчами давлатии Ҷумҳурии Тоҷикистон миёни писарбачаҳои синфҳои 5 ва 6 мусобиқаи футболи хурд баргузор гардид. Дар мусобиқаи мазкур 14 даста иштирок намуданд. Бозии финалӣ хело ҳам шавқовар сурат гирифт, ки дар он дастаи синфи 6 "Ғ" дастаи синфи 6 "А"-ро шикаст дода, ҷоми мусобиқаро ба даст овард. Дар арафаи ҷашни Рӯзи парчами давлатии Ҷумҳурии Тоҷикистон ҷом, медалҳо, ифтихорномаву тӯҳфаҳои хотиравӣ дар ҷамъомади махсус ба ғолибон супорида шуданд.

Санаи 22 ноябри соли 2025 дар муассисаи таҳсилоти миёнаи умумии №3-и ноҳияи Рӯдакӣ даври ноҳиявии Олимпиадаи фаннӣ миёни хонандагони синфҳои 9-11 гузаронида шуд. Муовини Раиси ноҳияи Рӯдакӣ Исмоилзода Заррина чорабинии мазкурро ҳусни оғоз бахшида, озмунро кушода эълон намуд. Баъдан ҳамаи иштирокчиёни Олимпиада Суруди миллиро ба таври зинда хонданд. Озмун шаффоф, тибқи талаботҳои зарурӣ ва дар сатҳи баланд гузаронида шуд.