01/08/2026
ဖားကန့်တွင် KIA ကတိုက်ခိုက်ခဲ့တာကြောင့် မကြာခဏဓါးပြတိုက်လေ့ရှိတဲ့ စစ်ကော်မရှင်လက်အောက်ခံ ရှမ်းနီတပ်သားနှစ်ဦး သေဆုံး။
ဩဂုတ် ၊ ၁ ၊ ၂၀၂၆။
ကချင်ပြည်နယ် ၊ ဖားကန့်မြို့ လုံးခင်းကျေးရွာမှာ မကြာခဏဓားပြတိုက်နေတဲ့ စစ်ကော်မရှင်လက်အောက်ခံ ရှမ်းနီ(SNA) တပ်သားနှစ်ဦး အလစ်ငိုက်တိုက်ခိုက်ခံရပြီး သေဆုံးခဲ့ပါတယ်။
ဒီကနေ့ ဩဂုတ်လ ၁ ရက်နေ့၊ မနက် ၉ နာရီ ၃၀ အချိန်လောက်က လုံးခင်းကျေးရွာ ထွန်းတောက် ဆီဆိုင်အနီးမှာ ပါဂျရိုကားနဲ့ပါလာတဲ့ စစ်ကောင်စီရဲ့ ခမရ ( ၃၈၄ )တပ်ဖွဲ့ဝင်တွေကို ကချင်လွတ်လပ်ရေးတပ်မတော် KIA ကပစ်ခတ်တိုက်ခိုက်ခဲ့တာပါ။
" ကားတစ်စီးရပ်တာနဲ့ သေနတ်ကျည်အကဒ်လိုက်ဆွဲသွားတာ။ ကားပေါ်ကဆင်းတဲ့နှစ်ယောက်က နေရာမှာတင်ပွဲချင်းပြီး ဆုံးသွားတယ်။ ကျန်တဲ့ ကောင် တွေကထွက်ပြေးတာ နောက်ကနေလိုက်ပစ်သေးတယ် " လို့ လုံးခင်းကျေးရွာမှာ နေထိုင်တဲ့ ဒေသခံတစ်ဦးက Manau Voice ကိုပြောပါတယ်။
တိုက်ခိုက်မှုကြောင့် အဆိုပါရှမ်းနီတပ်သားနှစ်ဦးသေဆုံးပြီး သေနတ်တစ်လက် ရရှိခဲ့တယ်လို့ သိရပါတယ်။
" လုံးခင်းရွာက စစ်တပ်စိုးမိုးထားတဲ့နေရာလို့ပြောလို့ရတယ်။ ဓားပြတိုက်ခံရတာလည်း နေ့တိုင်းလိုကြားနေရ။ သူတို့လာမှာကို သတင်းရလို့ ကြိုစောင့်ပြီး ပစ်တာ။ အလောင်းကိုတော့ လူမှုကူညီရေးအဖွဲ့က သယ်သွားကြပြီ" လို့ အောင်ရာကျေးရွာမှာနေထိုင်တဲ့ ဒေသခံတစ်ဦးက ပြောပါတယ်။
လွန်ခဲ့တဲ့ ဇွန်လ ၁၇ ရက်နေ့ကလည်း လုံးခင်းကျေးရွာမှာ ဆက်ကြေးကောက် ဓားပြတိုက်နေတဲ့ စစ်ကောင်စီတပ်သားကို ကချင်လွတ်လပ်ရေးတပ်မတော် ( KIA ) ကဖမ်းစီးနိုင်ခဲ့တယ်လို့လည်း သိရပါတယ်။
သတင်း - Ah Gue
စာမူတည်းဖြတ် - ကိုကျော်ဝဏ္ဏ
ပုံစာ - ဒီကနေ့ ဩဂုတ်လ ၁ ရက်နေ့မနက်မှာ (KIA) က ပစ်ခတ်တိုက်ခိုက်ခဲ့တာကြောင့် သေဆုံးသွားတဲ့ စစ်ကော်မရှင်လက်အောက်ခံ ရှမ်းနီ (SNA) တပ်သားနှစ်ဦးအား တွေ့မြင်ရစဉ်။
