Little Steps

Little Steps خطوة صغيرة اليوم، لمستقبل كبير بكرا �

الصيف بلّش والمنقذ لملل ولادكم صار جاهز ❤​نادينا الصيفي عم يتجهّز ليستقبل عصافيركم الصغار برحلة كلها مرح وتعلُّم ​الأعما...
04/06/2026

الصيف بلّش والمنقذ لملل ولادكم صار جاهز ❤
​نادينا الصيفي عم يتجهّز ليستقبل عصافيركم الصغار برحلة كلها مرح وتعلُّم
​الأعمار المستهدفة : من عمر 3 سنوات وحتى 8 سنوات .
​جهزنالهم برنامج ممتع بيجمع بين اللعب والترفيه و التعليم
رح يكون عنّا :
1️⃣ ألعاب ذكاء وبازل
2️⃣ اللعب بالرمل
3️⃣​ رسم وتلوين
4️⃣ ​تشكيل بالمعجون وأشغال يدوية
5️⃣ ​ألعاب جماعية وحركية

​هدفنا أنّه الأطفال يستمتعوا، يتعلموا، ويكوّنوا صداقات جديدة بأجواء حلوة وآمنة ❤️
​المقاعد محدودة لحتّى نقدر نهتم بكلّ طفل ونعطيه حقه.
رح تبلّش رحلتنا يوم الإثنين 15/6/2026
للاستفسار والتسجيل، ناطرين تواصلكم معنا على الرقم : 0938374448 " اتّصال أو واتساب "

📌 الفرق بين التأخّر الطبيعي و التأخّر يلّي بده متابعة عند الأطفال 📌خلّونا نكون متأكدين أنّه كلّ طفل بيتطوّر بطريقته..في ...
09/05/2026

📌 الفرق بين التأخّر الطبيعي و التأخّر يلّي بده متابعة عند الأطفال 📌
خلّونا نكون متأكدين أنّه كلّ طفل بيتطوّر بطريقته..
في أطفال بيمشوا أو بيحكوا أبكر من غيرهم ، و في أطفال بيتأخروا شوي ، و هاد مو دائماً بيعني أنّه في مشكلة عند الطفل
بس ضروري نعرف الفرق بين التأخّر الطبيعي و التأخّر يلّي بده متابعة مع مختص.
1️⃣ التأخّر الطبيعي :
هو فرق بسيط بالتطوّر بين طفل و طفل ، وبكون ضمن الحدود المقبولة لعمره.
متل :
" طفل حكى بعمر سنتين بدل سنة ونص "
أو " طفل مشي متأخر شوي لكن حركته طبيعية "
أو " طفل خجول اجتماعياً بالبداية "
وغالباً الطفل بيتحسّن تدريجياً مع الوقت و التحفيز
2️⃣ التأخّر يلّي بده متابعة :
لمّا يكون الفرق واضح و كبير مقارنةً بعمر الطفل ، أو يكون في أكتر من جانب متأثّر
📌 علامات لازم ننتبهلها :
1. يكون الطفل بعمر سنتين وما بيحكي كلمات واضحة. متل :
_ بيكتفي بالصراخ أو الإشارة بدل الكلام
_ ما بقول كلمات متل " ماما ، بابا ، ميّ "
_ بكرر أصوات بدون كلمات مفهومة
2. ما بيستجيب لاسمه متل :
_تناديه أكتر من مرة وما يلتفت كأنّه ما سمع رغم أنّه سمعه طبيعي
_ يكون مركز بشي وما ينتبه أبداً للصوت
3. ما بيعمل تواصل بصري متل :
_ ما يتطلّع فيك وقت الحكي
_ بيتجنّب النظر أثناء اللعب أو الضحك
_ بيطلب الشي بدون ما يتطلّع بالشخص
4. ما بيفهم الأوامر البسيطة متل :
_ ما بيفهم الطلبات السهلة و البسيطة " هات الكرة "
_ ما بنفذّ الأوامر " تعال " أو " اقعد "
5. فقد مهارات كان يعرفها قبل متل :
_ كان يقول كلمات و بطّل يستخدمها
_ كان يلعب ويتفاعل و صار ينعزل
_ كان يصفّق و بطّل يعملها
6. حركته ضعيفة أو توازنه صعب متل :
_ بيوقع كتير لمّا يكون عم يمشي
_ بواجه صعوبة لمّا ينزل أو يطلع ع الدرج
_ ما بيعرف يركض متل الأطفال يلّي بعمره
7. ما بيتفاعل مع الأطفال أو أهله :
_ بفضلّ يلعب لحاله دائماً
_ ما بيهتمّ إذا حدا لعب معه و ما بشاركه بشي
_ يكون منعزل و ما بشارك أي شي مع أهله أو رفقاته

إذا كان الطفل عنده هي الأعراض أو شي منها مهمّ جداً المتابعة المبكرة عند مختصّ لأنّها بتساعد الطفل بشكل كبير
وكلّ ما اكتشفنا المشكلة أبكر ، كانت النتائج أفضل وأسهل.
و كتير مهمّ أنّه ما نقارن أطفالنا بغيرهم و نحسسهم أنّه في خطر عليهم ، و بنفس الوقت ما نهمل العلامات الواضحة.
لكلّ طفل عالمه الخاص ، واهتمامنا المبكّر فيه هو أكبر دعم إله ❤️

19/04/2026

📌 خلّونا اليوم نحكي عن الأخطاء الشائعة يلّي بتأثّر على تطوّر الطفل .

كتير من التصرفات اليوميّة منعملها بحُبٌ، بس تأثيرها ممكن يكون سلبي و عكسي بدون ما ننتبه.

1️⃣ المقارنة بين الأطفال :
لمّا نقارن الطفل بغيره " أخ، قريب، صديق " هوّ ما بشوفها تحفيز، بالعكس بحسّ أنّه " أقلّ من غيره " و هاد الشي ممكن يضعف ثقته بنفسه ويخليه يفقد الحماس 📌 الأفضل أنّه نقارن الطفل بنفسه " تقدّمه اليوم عن قبل " و نمدح جهده مو بس النتيجة.

2️⃣ الصراخ بدل التوجيه :
الصراخ بيعطي نتيجة سريعة أحياناً بس على المدى الطويل بخلّي الطفل يخاف بدل ما يفهم، أو ممكن يتعوّد ويتجاهل، يعني لا تعلّم ولا نتيجة حقيقية.
📌 الأفضل أنّه ننزل لمستواه، نحكي بهدوء، و نفسّر الخطأ بطريقة بسيطة.

3️⃣ منع الطفل من اللعب بحجة التعلّم :
كتير أهل بيعتقدوا أنّه اللعب مضيعة للوقت، بس اللعب هو الطريقة الأساسيّة يلّي بيتعلّم فيها الطفل، و حرمانه من اللعب ممكن يأثر على تطوّره.
📌 الأفضل أنّه نخصص وقت يومي للعب الحرّ و نخلّي الأطفال يقوموا أنشطة بسيطة ممتعة.

4️⃣ الحمايّة الزائدة :
الخوف الزائد بخلّي الطفل يبطّل يجرب أو يتردد، و يخاف يغلط، و يعتمد على غيره، بينما التجربة " حتّى الغلط " هيّ أهم طريقة للتعلّم.
📌 الأفضل أنّه نراقب بدون تدّخل دائم، و نتركله مساحة لحتّى يكتشف بأمان

5️⃣ استخدام الموبايل لإسكاته :
هوٌ حلّ سريع، بس ممكن يقلل التركيز، و يضعّف التواصل، و يأثّر على النوم و السلوك، خاصّة إذا صار عادة يوميّة.
📌 الأفضل أنّه نستبدله بقصص، ألعاب، أو تفاعل مباشر مع الأهل.

📍التربية رحلة، والغلط وارد
الأهم أنّه نتعلّم ونحسّن ❤️

11/04/2026

🔴 علامات تطور الطفل بعمر 2–3 سنوات :
بهاد العمر الطفل بكون عم يتطوّر بسرعة كبيرة، وفي علامات طبيعية لازم ننتبه عليها
1️⃣ التطور اللغوي " الكلام "
_ بيستخدم جمل بسيطة " كلمتين أو 3 كلمات "
_ بيعرف يسمي أشياء مألوفة " ماء ، باب ، لعبة "
_ بيفهم أوامر بسيطة " تعال ، اعطيني ، اقعد "
هون ممكن يصير يسأل " شو هاد ؟ "
2️⃣ التطوّر الحركي :
_ بيمشي ويركض بثقة
_ يطلع وينزل الدرج " بمساعدة أحياناً "
_ يمسك القلم و يخربش
3️⃣ التطوّر الاجتماعي و العاطفي :
_ بقلّد الكبار " يكنس ، يطبخ "
_ بفضلّ يلعب مع أطفال تانيين " حتى لو مو تفاعل كامل "
_ بعبّر عن مشاعره " يزعل ، يفرح ، يعصب "
و ممكن يصير عنده نوبات غضب " شي طبيعي بهالعمر "
4️⃣ التطوّر العقلي الإدراكي :
_ بيعرف الألوان البسيطة
_ بحلّ ألعاب بسيطة متل " البازل السهل "
_ بيتذكر أماكن الأشياء
_ يبدأ يتخيّل " يلعب كأنه عم يطبخ مثلاً "
📌 أيمت منقلق و منخاف ؟
إذا الطفل:
_ ما بيحكي ولا كلمات واضحة
_ ما بيتجاوب مع اسمه
_ ما بيعمل تواصل بصري
_ ما بيفهم أوامر بسيطة
📌 هون لازم استشارة مختص

📌 كيف نتعامل مع الأطفال بعمر الروضة؟ التعامل مع الطفل بهالعمر مو بس تربية ، هو بناء شخصية .كلّ كلمة ، كلّ تصرّف ، بأثّر ...
07/04/2026

📌 كيف نتعامل مع الأطفال بعمر الروضة؟
التعامل مع الطفل بهالعمر مو بس تربية ، هو بناء شخصية .
كلّ كلمة ، كلّ تصرّف ، بأثّر عليه وبضلّ معه لفترة طويلة.
📌 أهمّ طرق التعامل الصحيحة مع الأطفال :
1️⃣ الحُب قبل كلّ شي :
_ الطفل لازم يحسّ بالأمان والحب بدون شروط .. الحضن ، الكلمة الحلوة ، والاهتمام بيصنعوا فرق كبير .
2️⃣ احكي معه مو عليه :
انزل لمستواه ، احكي معه بهدوء واسمعه للآخر ، حتّى لو كلامه بسيط هو بالنسبة إله مهمّ
3️⃣ لا للصراخ و العقاب القاسي :
لأن الصراخ بخوّف الطفل ، بس ما بعلّمه ، بدال هيك لازم نشرحله الصحّ و الغلط بطريقة هادية.
4️⃣ شجّع بدل ما تنتقد :
ركّز على الأشياء الحلوة يلّي بيعملها وامدحه ، هاد بعزّز ثقته بحاله .
5️⃣ خلّي اللعب جزء من التعلّم لأن الطفل بيتعلم باللعب ، مو بالأوامر ، لهيك خلّيه يكتشف ويجرب بطريقته.
6️⃣ الصبر ثمّ الصبر :
لأن الطفل عم يتعلّم كلّ شي من الصفر ، طبيعي يغلط ، لهيك دورنا نوجّهه ، مو نغضب.
7️⃣ كون قدوة :
الطفل بقلّدك بكلّ شي ، تصرّفاتك أهم من كلامك.
📌 بالنهاية :
" الطفل متل الورقة البيضا ، و نحنا يلّي منكتب عليها " .
لهيك خلّوا كلماتكم تكون لطيفة ، و تعاملكم مليان حب ❤️

📌 كلّ طفل حسب عمره بيحتاج أنشطة بتناسبه، لأن قدراته بتتطور مع الوقت وبتصير أقوى وأوضح.الأطفال الصغار بفضلّوا اللعب البسي...
04/04/2026

📌 كلّ طفل حسب عمره بيحتاج أنشطة بتناسبه، لأن قدراته بتتطور مع الوقت وبتصير أقوى وأوضح.
الأطفال الصغار بفضلّوا اللعب البسيط والحركة، لأنّه بساعدهم يكتشفوا ويجربوا أشياء جديدة.
لما يكبروا شوي، بصيروا يميلوا لأنشطة فيها تفكير وتركيب وإبداع أكتر.
الأنشطة المناسبة بتساعد الطفل يطور مهاراته الاجتماعية ويتعلم كيف يتعامل مع غيره.
خلّوني خبركم اليوم شو هيّ الأنشطة المناسبة لأطفالكم من عمر ال 2 ⬅️ 3 سنوات :
📌 " مرحلة الاكتشاف " 📌
1️⃣ اللعب بالطين أو الصلصال أو المعجون :
هاد النشاط بخلّي الطفل يلمس و يشكّل الصلصال بأشكال مختلفة، و بنمّي المهارات الحركية الدقيقة و بيسمح للطفل يأبدع أكتر.
• شو الأدوات المطلوبة ؟
صلصال أو معجون آمن للأطفال ، أدوات بسيطة متل قطاعات بلاستيك.
2️⃣ الرسم العشوائي بالأصابع :
هاد النشاط بخلّي الطفل يرسم بالألوان على ورقة كبيرة بدون قيود ، باستخدام أصابعه ، و بيسمحله يعبّر عن نفسه بالطريقة يلّي بتناسبه
• شو الأدوات المطلوبة ؟
ألوان غير سامة ، ورق كبير
3️⃣ لعب البازل البسيط :
نجيب بازل كبير وألوانه واضحة ، و نطلب من الطفل يحاول يركب القطع.
هاد النشاط بنمّي التركيز و المهارات الحركية الدقيقة
و الأفضل أنّه بهاد النشاط نختار رسومات سهلة و مألوفة للأطفال ، متل صور للحيوانات أو للطبيعة أو أرقام بسيطة
4️⃣ اللعب بالماء :
هاد النشاط ممتع كتير و مهمّ جداً ، بطوّر حاسة اللمس ، يعني الطفل بحسّ بالمي و بدرجة الحرارة و بخفّة الأكواب أو ثقلها.
كمان بطوّر المهارات الحركية الدقيقة ، يعني لمّا الطفل بينقل المي من كوب لكوب ، يشتغلوا أصابعه و إيديه بطريقة دقيقة ، هي الخطوة مهمّة كتير للرسم و التلوين بعدين
طبعاً لازم هاد النشاط يكون تحت مراقبة الكبار دائماً
ولازم نستخدم وعاء آمن و نكون بأماكن سهلة التنظيف.
• شو الأدوات المطلوبة ؟
وعاء آمن ، أكواب بلاستيك ، إسفنجة

5️⃣ الغناء والحركة :
هاد النشاط بحبّوه و بيطلبوه غالبية الأطفال ، ليش ؟
_ بنمّي المهارات الحركية الكبيرة و التواصل الاجتماعي :
يعني لمّا الطفل يرقص ، يقفز ، يلوّح بإيديه ، يتحرك يمين و يسار ، هاد النشاط بقوّي رجليه و إيديه و عضلات جسمه و بساعده على التوازن والسيطرة على جسمه.
_ بنمّي اللغة والتواصل للطفل ، ليش ؟
لأن الغناء بعلّمه كلمات جديدة و بقوّي النطق و القدرة على التعبير.
كمان بخلّيه يحفظ ألحان بسيطة ويكررها.
_ بنمّي الإبداع والخيال ، كيف ؟
لمّا الطفل يغني و يعمل الحركات المطلوبة بصير يتخيّل الحركات و الأدوار يلّي بيسمعها بالأغنية ، مثلاً : " نمشي متل القطة ، نقفز متل الأرنب .. "
بالإضافة لأّنّه اللعب أو الغناء الجماعي بخلّي الطفل يتعلّم المشاركة ، و الانتباه للي حواليه ، و بعلّمه التنظيم و انتظار دوره
و كمان الطفل بعبّر عن مشاعره بالرقص أو الغناء و بقلل من التوتر .

✨ نصيحة للأهل : ما بتهمّ النتيجة ، الأهمّ هو التجربة . ✨

أهلاً وسهلاً فيكم بصفحتنا ❤️هي الصفحة مخصصة لكلّ أم وأب حابّين يطوّروا مهارات أطفالهم بطريقة بسيطة و ممتعةأنا " رولا رام...
04/04/2026

أهلاً وسهلاً فيكم بصفحتنا ❤️
هي الصفحة مخصصة لكلّ أم وأب حابّين يطوّروا مهارات أطفالهم بطريقة بسيطة و ممتعة
أنا " رولا رامي أبو عبد الله " طالبة رياض أطفال 📚
هون رح نكون مع أطفالكم خطوة بخطوة، لنساعدهم يكبروا و يتعلّموا بطريقة حلوة و مسليّة
نحنا منآمن أنّه كلّ طفل مميز، و هدفنا نخلق بيئة آمنة و مليانة حُب و اهتمام.
رح تلاقوا معنا :
1.نصائح تربوية للأهل بكلّ حُبّ.
2.أفكار تعليمية سهلة التطبيق.
3.أنشطة مُسليّة و أفكار حلوة لتنمية مهارات الأطفال بكلّ مرحلة عمريّة.

تابعونا وكونوا جزء من رحلتنا، لحتّى نكون جزء من ذكريات كلّ طفل ❤️

Address

Masyaf

Website

Alerts

Be the first to know and let us send you an email when Little Steps posts news and promotions. Your email address will not be used for any other purpose, and you can unsubscribe at any time.

Shortcuts

Share

Category