Xarunta Waxbarashada iyo Daryeelka Gabdhaha soomaaliyeed Ee Cem Özkök

🌹 MAHADNAQ IYO QADARIN 🌹

Bismillaahir Rahmaanir Raxiim

Anigoo ku hadlaya magaca CEM ÖZKÖK – Xarunta Waxbarashada iyo Daryeelka Gabdhaha Soomaaliyeed, waxaan si kal iyo laab ah ugu mahadcelinayaa dhammaan masuuliyiintii, marti sharaftii, waalidiintii, culimada, bahda waxbarashada iyo bulshada nagu maamuustay ka soo qaybgalka munaasabaddii daahfurka xarunta.

Joogitaankiinna, dhiirrigelintiinna iyo taageeradiinnu waxay muujiyeen sida ay bulshada uga go’an tahay horumarinta waxbarashada iyo daryeelka carruurta Soomaaliyeed, gaar ahaan gabdhaha agoonta ah.

Mahad gaar ah waxaan u jeedinaynaa Habitat Foundation iyo Bir Avuç İnsani Yardım Derneği, kuwaas oo si hagar la’aan ah u garab istaagay hirgelinta xaruntan iyo taageerada waxbarashada carruurta Soomaaliyeed.

Sidoo kale, waxaan uga mahadcelinaynaa dhammaan waalidiinta nagu aamintay waxbarashada iyo tarbiyadda gabdhahooda. Kalsoonidiinna waa dhiirrigelin weyn oo nagu sii xoojinaysa inaan bixino waxbarasho tayo leh, tarbiyo suuban iyo daryeel hufan.

Waxaan Alle SWT ka baryeynaa inuu abaalgud khayr leh siiyo qof kasta oo ka qayb qaatay guusha maanta, kana dhigo xaruntan mid soo saarta jiil aqoon leh, akhlaaq leh, kana faa’iideeya diintooda, dalkooda iyo bulshadooda.

Mahadsanidiin dhammaantiin.

Cabdiraxmaan Xaaji Maxamuud Raage
Maamulaha Guud
CEM ÖZKÖK – Xarunta Waxbarashada iyo Daryeelka Gabdhaha Soomaaliyeed

🎉 DAAHFURKA XARUNTA WAXBARASHADA IYO DARYEELKA GABDHAHA SOOMAALIYEED EE CEM ÖZKÖK

Waxaa si rasmi ah loo daahfuray Xarunta Waxbarashada iyo Daryeelka Gabdhaha Soomaaliyeed ee CEM ÖZKÖK, munaasabad ay ka soo qayb galeen masuuliyiin ka socday hay’adaha samafalka, ururrada caalamiga ah, maamulka waxbarashada, bahda waxbarashada, hoggaamiyeyaal bulsho iyo marti sharaf kale.

Munaasabadda ayaa lagu muujiyey muhiimadda ay xaruntani u leedahay horumarinta waxbarashada iyo daryeelka gabdhaha Soomaaliyeed, iyadoo la xusay in maalgashiga waxbarashadu uu yahay maalgashiga ugu wanaagsan ee lagu dhisayo jiil aqoon leh iyo mustaqbal ifaya.

Waxaan uga mahadcelineynaa dhammaan hay’adihii, masuuliyiintii iyo marti sharaftii ka soo qayb gashay munaasabaddan, isla markaana garab istaagtay himilada horumarinta waxbarashada iyo daryeelka gabdhaha Soomaaliyeed.

“Gabadha maanta la baro, waa hoggaamiyaha berri.” 💙📚

🎉 Shaacinta Natiijada Imtixaanka Macallimiinta – CEM ÖZKÖK

Alxamdulillaah, waxaa si rasmi ah loo shaaciyey natiijada imtixaankii lagu xulayay macallimiinta iyo murabiyiinta ee CEM ÖZKÖK – Xarunta Waxbarashada iyo Daryeelka Gabdhaha Soomaaliyeed.

Waxaan hambalyo iyo bogaadin u diraynaa dhammaan musharraxiintii ka soo qayb-gashay tartanka, gaar ahaan kuwii ku guuleystay. Guushiinnu waa mid ka tarjumaysa dadaal, aqoon iyo karti.

Waxaan sidoo kale uga mahadcelinaynaa Habitat Foundation Somalia taageerada joogtada ah ee ay la garab taagan yihiin horumarinta waxbarashada iyo daryeelka gabdhaha Soomaaliyeed.

Waxaan u rajaynaynaa macallimiinta la soo xulay guul, daacadnimo iyo in ay noqdaan iftiinka jiilka berri.

Hambalyo dhammaantiin! 🌿📚✨

📢 Ogeysiis Muhiim Ah
Waxaa si sharaf leh loogu wargelinayaa dhammaan musharrixiintii ka qayb gashay imtixaanka shaqaaleysiinta macallimiinta in natiijada rasmiga ah lagu dhawaaqi doono Sabtida, 27 June 2026, saacadda 9:00 subaxnimo xarunta CEM ÖZKÖK ee degmada Hodan, Muqdisho.

Waxaan u rajaynaynaa dhammaan macalliinta guul iyo nasiib wacan. 🤲📚✨