Masaf Institute for Strategic Studies

21/10/2025

TACSI

إِنَّا لِلّهِ وَإِنَّـا إِلَيْهِ رَاجِعونَ

​Dhammaan hoggaanka iyo xubnaha Machadka Daraasaadka Istiraatiijiga ah ee MASAF waxay ka tacsiyaynayaan geerida ku timid AHUN Agaasimahii Xarunta PDRC, Marxuum Cali Faarax Cali, oo maanta ku geeriyooday magaalada Garoowe.

Waxaan Alle uga baryeynaa in uu hoygiisa ka yeelo jannatul Firdowsa. Samir iyo iimaan dhammaan ehelkiisa & saaxiibadiisba.

Aamiin.

30/05/2025

Tababar: Hoggaaminta iyo Wada-shaqayn Kooxeedka

Boosaaso, May 30, 2025: Machadka Masaf ayaa maanta si guul ah usoo gabagabeeyey tababar socday hal maalin oo lagu baranayey hoggaaminta iyo wada-shaqeyn kooxeedka. Tababarkan oo ay ka qeyb galeen Guddoomiyayaasha Ururrada Dhallinyarada, iyo Ardayda Jaamacadaha Bosaso iyo waliba qayb ka mid ah dhallinyarada haldoorka ah ee magaalada Bosaso, ayaa Machadku ku qabtay magaalada Boosaaso. Ujeeddada tababarkan ayaa ahayd in la xoojiyo xirfadaha hoggaaminta iyo maamulka, si dhallinyaradu ay ugu diyaar garoobaan hoggaaminta mustaqbalka iyo dhismaha bulsho isku duuban.

Tababarka ayaa waxaa goobjoogayaal ka ahaa Wasiir Ku xigeenka Maaliyadda Abdullahi Ismail Mohamed, iyo Guddoomiye ku Xigeenka Gobolka Bari Mohamed Ahmed Dalmar, wasiirka iyo guddoomiyaha ayaa dhallinyarada ku boorriyay in ay ka faa’iideystaan tababarka. Sidoo kale, waxaa kulanka kasoo qayb galay Guddoomiye Kuxigeenka Dalladda Dhallinyarada Gobolka Bari Abdifatah Faahiye Isse.

Machadka Masaf, wuxuu sii wadi doonaa dedaallada lagu horumarinayo xirfadaha dhallinyarada, iyadoo la sii xoojinayo barnaamijyada tababarka iyo fursadaha horumarineed ee ay ka faa’iideysan karaan dhallintu.

07/05/2025

Machadka Masaf oo ka Qaybgalay Kulanka u Diyaargarowga Shirweynaha UNFSS+4

Nairobi, 07, May 2025: Machadka Masaf ee Daraasaadka Istiraatiijiga ah waxa uu ka qaybgalay kulan-goboleed muhiim ah oo lagu qabtay xarunta Qaramada Midoobay ee magaalada Nairobi, Kenya. Kulankan ayaa ahaa gogol-xaar loogusii diyaar garoobayo shirweynaha UNFSS+4 oo ay si wadajir ah ay u martigelin doonaan waddamada Ethiopia iyo Italy 27–29-ka bisha July ee sanadkan 2025.

Mudane Maxamuud Yuusuf Axmed oo ka tirsan Xafiiska Xiriirka Dibadda, ayaa kulanka ku metelayay Machadka Masaf. Kulanka oo soconayay intii u dhaxaysay 5–7-da May 2025, ayaa diiradda lagu saaray dib u eegista nidaamyada cuntada ee qaaradda Afrika, caqabadaha hortaagan, iyo fursadaha ay leedahay Afrika si ay u gaarto isku filnaansho dhanka cunnada ah.

Kulankan ayaa waxaa kasoo qaybgalay wufuud kala duwan oo ka kala socday dalalka Afrika iyo Hay’adaha Caalamiga ah, kuwaas oo isdhaafsaday aragtiyo, waayo-aragnimo, iyo talooyin wax-ku-ool ah oo lagu horumarinayo nidaamka cuntada ee Afrika.

Machadka Masaf wuxuu sii wadi doonaa ka qaybqaadashada arrimaha istiraatiijiga ah ee heer gobol iyo kuwa heer caalami, isaga oo u heellan mar walba arrimaha kaga aaddan sida cilmi-baarista, falanqaynta, iyo samaynta siyaasadaha horumarineed.

=Dhammaad=

13/04/2025

11/04/2025

Tababar: Ka-hortagga iyo La-dagaallanka Xagjirnimada Rabshadaha Wadata (PCVE)

Nairobi, April, 11 2025: Magaalada Nairobi waxaa maanta kusoo idlaaday tababar ay iska kaashanayeen Xarunta Mashariki iyo Machadka Geeska Afrika.

Maxamuud Yuusuf Axmed, oo ka mid ah xubnaha Fulinta ee Machadka Masaf ayaa ka qayb galay tababarkaan oo toddobaad socday, isaga oo diiradda lagu saarayay ka hortagga iyo la dagaallanka fikirka xagjirka ah ee rabshadaha wata.

Sidoo kale, Maxamuud oo metelayay Machadka Masaf ayaa kulan gaar ah la yeeshay Madaxa Xarunta Mashariki Mudane Dr. Robert Kabage, iyaga oo labada dhinac ka wada hadlay xoojinta wadashaqaynta iyo iskaashiga xarumaha ee ku aaddan dhanka tababarrada.

Ugu dambayn, waxaa shahaadooyin la guddoonsiiyay ka-qaybgalayaashii dhammaystay tababarka. Mahad gaar ah ayaan u diraynaa dhammaan macallimiintii bixinayay tababarka.

10/04/2025

Tababar: Hoggaaminta iyo Wada-shaqayn Kooxeedka

Garoowe, Abriil 10, 2025: Machadka Masaf ayaa maanta si guul ah usoo gabagabeeyey tababar socday hal maalin oo lagu baranayey hoggaaminta iyo wada-shaqeyn kooxeedka. Tababarkan oo ay ka qeyb galeen Guddoomiyayaasha Ardayda Jaamacadaha Garowe iyo qayb ka mid ah dhallinyarada haldoorka ah ee magaalada Garowe, ayaa lagu qabtay Xarunta Machadka. Ujeeddada tababarkan ayaa ahayd in la xoojiyo xirfadaha hoggaaminta iyo maamulka kooxaha, si dhallinyaradu ay ugu diyaar garoobaan hoggaaminta mustaqbalka iyo dhismaha bulsho isku duuban.

Machadka Masaf wuxuu sii wadi doonaa dedaallada lagu horumarinayo xirfadaha dhallinyarada, iyadoo la sii xoojinayo barnaamijyada tababarka iyo fursadaha horumarineed ee ay ka faa’iideysan karaan dhallintu.

15/02/2025

Boosaaso, 15 Febraayo 2025: Warbaahinta Daljir ayaa magaalada Boosaaso ku qabatay madasha Daljir oo ah fagaare lagu gorgeeyo Arimaha masiiriga ah ee dalka, waxaana xalay diirada lagu saaray Hawlgalka Ciribtirka Argagixisada Calmiskaad ee Hilaac, Fursadaha kujira iyo caqabadaha ku xeeran ayay si qoto dheer u falanqeeyeen masuuliyiinta Dawlada iyo xeeldheerayaal Amaan oo madasha yimi.

Agaasimaha Machadka Masaf Mudane Said Bashir Muse oo ka mid ahaa martida madasha ayaa ka warbixiyay cilmibaaris uu Machadku horey uga sameeyay khatarta sii kordheysa ee Daacish ee Geeska Afrika. Sidoo kale, machadka ayaa soo saaray warbixin ku aaddan xaaladda bini'dantinnimo ee dadkii kasoo barakacay buuraleyda Calmiskaad iyo deegannada hoos taga.

Ugu dambayn, Agaasimaha ayaa ku nuuxnuux saday sida ay lagama maarmaan u tahay in si dhamaystiran loo tirtiro raad kasta oo Argagixisadu ku leedahay Puntland sida kan fikirka iyo midka hubka wata.

10/02/2025

Boosaaso, Febraayo 10, 2025: Agaasimaha Machadka Masaf Mudane Said Bashir Muse iyo xubno ka mid ah Machadka ayaa maanta magaalada Boosaaso kaga qayb-galay shir looga hadlayay sidii gargaar deg-deg ah loo gaarsiin lahaa dadkii kasoo barakacay hawlgallada ka socda Gobolka Bari, kaas oo ka qabsoomay Xafiiska iskudubbaridka iyo Xiriirka Arrimaha Gargaarka ee Gobolka Bari.

Masuuliyiinta Dowladda Puntland iyo Hay'adaha ayaa isla qaatay in si degdeg ah loo gaarsiiyo gurmad dadka kasoo barakacay hawgallada ka socda Gobolka Bari.

Hay'adda Adeegga Bulshada ee Masaf (MSI) oo raacsan Machadka Masaf ayaa horey qayb uga ahayd xog uruurin iyo u kuurgalid loogu tagay dadka soo barakacay ee ku sugan qaybo ka mid ah degmooyinka Gobolka Bari.

07/02/2025

𝗠𝗔𝗚𝗔𝗖𝗔𝗔𝗕𝗜𝗦𝗧𝗔 𝗔𝗚𝗔𝗔𝗦𝗜𝗠𝗔𝗛𝗔 𝗙𝗨𝗟𝗜𝗡𝗧𝗔 𝗘𝗘 𝗠𝗔𝗖𝗛𝗔𝗗𝗞𝗔 𝗠𝗔𝗦𝗔𝗙

Garoowe, 07 Feb. 2025: Shir ay isugu yimaadeen Golaha Sare ee Machadka Masaf 5tii Febraayo 2025, ayaa Agaasimaha Fulinta ee Machadka loogu magacaabay Mudane Siciid Bashiir Muuse.

Agaasime Siciid, ayaa beddeli doona Mudane Aadan Salaad Maxamuud (Badiic) oo 5-tii sano ee lasoo dhaafay hoggaaminayey Machadka. Guddiga ayaa Mudane Siciid u rajeeyay guul iyo inuu xaqiijiyo ujeeddooyinka Machadka ee dhow iyo kuwa fog.

=Dhammaad=