MAMMA BEL DAFSH

كل عام وانتو بخير عيد سعيد 🧡

العنف ما بينزرع فجأة الطفل بيتعلّمه من اللي حواليه
كل صرخة، كل ضربة، وكل رد فعل عنيف ممكن يتحول لسلوك يكرره طفلنا لاحقًا

ابدأ التغيير من أسلوبك ❤️

اكتب كلمة "عنف" بالتعليقات 👇

فكرة “النبوءة الذاتية” او Self-fulfilling prophecy
يعني لما الواحد يقتنع بإشي بشكل عميق، بصير بدون ما يحس يتصرف بطريقة تخلي هالإشي يصير حقيقة فعلًا

القناعة مو بس فكرة براسنا، أحيانًا بتتحول لطريقة تعامل يومية، وهالطريقة هي نفسها اللي بتصنع الواقع اللي كنا متوقعينه من البداية

بالتربية مثلًا، لما الأم تضلها تقول:
“ولادي ما بيسمعوا الكلام إلا بالصراخ”

هي بتفكر إنها بس بتوصف الواقع، لكن بالحقيقة هاي الجملة بتأثر عليها وعلى الطفل بنفس الوقت، ليش؟

لأنها من جواها أصلًا متوقعة إنهم ما رح يستجيبوا، فبتحكي بطريقة فيها تردد، وبتكرر الكلام كثير، وبدون حزم أو متابعة حقيقية، فبصير الحوار شكله هيك:

“حبيبي يلا لو سمحت قوم ماما بتحكي ”

فالطفل مع الوقت بلاحظ إنو الكلام الهادي ما وراه نتيجة فعلية، وإنو ما في داعي يستجيب من أول مرة

وبما إن الطفل ذكي بقراءة الأنماط، بتعلم بسرعة إنو

1️⃣الصوت الهادي يعني ما رح يصير إشي
2️⃣التكرار والتهديد يعني لسه ما في تنفيذ
3️⃣أما الصراخ يعني هون الموضوع صار جد

فعشان هيك بصير يأجل الاستجابة لحد “الإنذار الأخير” مو دايمًا لأنه عنيد أو بتحداكي، لكن لأنه تعود على نظام البيت وطريقة التفاعل فيه

وبعدين الأم بتشوف النتيجة وبتقول “شايفة؟ فعلًا ما بيسمعوا إلا بالصراخ والعين الحمره”

فبتقوى القناعة القديمة أكثر، وبتدخل العيلة بدائرة مغلقة من توقع سلبي، يطلع منه سلوك معين، والسلوك يعطي نتيجة تؤكد نفس التوقع

والأهم هون إنو الطفل ما بتعلم بس الكلمات هو بتعلم

متى الكلام جد؟
متى لازم يتحرك؟
وهل أمه ثابتة بكلامها ولا متقلبة؟

عشان هيك التربية الحازمة هدفها مو رفع الصوت، الهدف إنو الكلمة الهادية يكون إلها وزن تقيل واحترام ويكون معها متابعة وثبات وتنفيذ

يعني بدل عشر تحذيرات وبعدين صراخ، يصير في طلب واضح مرة وحدة، ومتابعة مباشرة، وعاقبة معروفة بدون انفجار أو عصبية

وقتها الطفل بتعلم إنو “ماما بتحكي وهي فعلًا بتعني كلامها حتى وهي هادية”

وهاي من أهم التحولات بالتربية، لأنها بتبني احترام حقيقي، وأمان نفسي، واستجابة ما بتعتمد على الخوف والتوتر

#الصراخ #طفل

الغربه بتخلّيكي تعيدي التفكير بكل شي تربّيتي عليه (بالنسبة الي كانت السويد🇸🇪) وبتبدأ من هون👇🏼

1️⃣ صدمة الاختلاف
ببلادنا، أغلب الناس بتفكر بنفس الطريقة، ونفس أساليب التربية تعتبر “الطبيعي” فما حدا أصلًا بسألك: “في طريقة تانية؟”

🤔 بس بأوروبا (الغربه) يحدث اصطدام بين ما تعرفينه وبين منظومة مختلفة تماماً وهذا "الاصطدام" هو الذي يجبر عقلك على التساؤل: "هل طريقتي هي الوحيدة؟" التغيير هون ليس اختيار بل هو ضرورة للبقاء النفسي والاجتماعي

2️⃣ غياب الدعم التقليدي، ببلادنا أول ما تتعبي مع أطفالك، بتروحي لأمك، أختك، جارتك ودائمًا في “حل جاهز” متاح

🥲 بالغربة؟ غالبًا إنتِ لحالك بالموقف وهاد الفراغ بخليكِ تدوري، تقرئي، تستشيري مختص، وتخترعي طريقة جديدة تناسبك إنتِ وطفلك لأنه ما في حدا موجود يحلها عنك بنفس اللحظة

3️⃣ قوة القانون والنظام
ما بحكيلك ان اوروبا مثل يحتذى به في التربية خاصه السويد بس في اوروبا في قوانين واضحة وصارمة بمواضيع التربية وحقوق الطفل، يعني بعض الأساليب اللي تربّينا عليها ما عادت تنفع ولا حتى مسموحة وهاد الي بخلق مشاكل كتير مع الدولة من ناحية سحب الاطفال 😒

فبتضطري تلاقي بديل بدل الصراخ بدك حوار، بدل الضرب بدك حزم وحدود، بدل التخويف بدك فهم وتنظيم وهاد هو الصح الي ما قدرتي تعملي ببلدك الام للاسف، وهون بتكتشفي إنه البديل مش ضعف أحيانًا بكون أنجح وأهدى بكتير.

4️⃣ واخيرا التعددية الثقافية، بالغربة إنتِ مش بس مع أوروبيين ❌ إنتِ عايشة وسط ناس من كل الدنيا، بتشوفي كيف كل ثقافة بتربي بشكل مختلف الصيني والاسباني والصومالي، وهاد الاشي بيفتح عقلك على فكرة مهمة جدًا:

إنه الأسلوب اللي تربّينا عليه مش الحقيقة الوحيدة، هو مجرد خيار من بين مئات الخيارات.

السويد 🇸🇪 ما أعطتني الحلول هي بس حطّتني بمكان اضطرّني أكتشف إنه جواي قدرة أخلق حلول وبدائل جديدة تناسبني وتناسب أطفالي الحمدالله على كل شي ربنا وجهني اله حتى لو كان بعدم رغبي مني ، ربنا كان شايف الخير فيه الي 🧡

#السويد

تقنية الفراشة (The Butterfly Hug) في علم النفس لتهدئة جهازك العصبي من أقوى التقنيات تأثيراً الي بنصح الامهات يستخدموها لما يكونو مضغوطين تعبانين

بتستخدميها لتقليل القلق والتوتر في اللحظات الصعبة خاصه مع أطفالك

كيف تطبقها؟
1️⃣ ضمي يديك على صدرك بشكل متقاطع (كأنك بتحضني حالك)، بحيث تلمسي أطراف أصابعك المنطقة تحت عظمة الترقوة عند الرقبه أو أعلى الاكتاف

2️⃣ اشبكي إبهاميك مع بعض ليشكلوا جسم الفراشة، وبقية أصابعك بشكل الأجنحة

3️⃣ ابدأي بالطبطبة او التربيت (النقر الخفيف) بيدك اليمنى ثم اليسرى بالتبادل، بإيقاع هادئ ومنتظم (مثل رفرفة أجنحة الفراشة)

4️⃣ تنفسي بعمق وركزي على مشاعرك الجسدية لمدة ٥ دقائق لغاية لما تشعري بالهدوء وحاولي ركزي على تنفسك وتجنبي التركيز على افكارك السلبيه

اذا عملتيها اقل شي ٣ مرات في اليوم رح تلاقي فرق كبير بعصبيتك وقلقك وتوترك على أطفالك

خبريني جربتيها قبل بمره ؟