The Library Project - Kosova

03/09/2026

Një takim, dy vepra arti dhe një dëshirë e përbashkët për të krijuar më shumë mundësi për fëmijët. 💛📚

Sot patëm kënaqësinë të mirëpresim në Bibliotekën e Fëmijëve znj. Liridona Zogaj, Drejtore Ekzekutive, dhe znj. Shukrije Bytyqi, Menaxhere e Programit në Qendrën e Kujdesit Ditor PEMA, si dhe znj. Albana Kusari, Menaxhere e Projekteve në Trust Circle Foundation.

Ne besojmë se një bibliotekë nuk është vetëm një hapësirë për libra. Është një hapësirë ku secili fëmijë duhet të ndihet i mirëpritur, i përfshirë dhe i lirë të ëndërrojë. Takimi ynë ishte më shumë se një vizitë. Ishte një mundësi për të biseduar gjatë dhe hapur për rëndësinë e krijimit të mundësive të barabarta për fëmijët, për mbështetjen e fëmijëve me aftësi të kufizuara dhe për mënyrat se si mund të bashkojmë përvojën, idetë dhe energjinë tonë për të ndërtuar iniciativa me ndikim dhe të qëndrueshme.

Gjatë këtij takimi, patëm nderin të pranojmë në Bibliotekën e Fëmijëve dy piktura të realizuara nga Shpejtim Syla, një i ri me aftësi të kufizuar, i cili tashmë nuk është më mes nesh. Shpejtimi ishte pjesë e familjes PEMA dhe tani veprat e tij do të jenë pjesë e Bibliotekës së Fëmijëve duke qëndruar aty si një simbol i talentit, dinjitetit, përfshirjes dhe fuqisë së çdo individi për të lënë gjurmë përmes asaj që krijon. 🎨💛

Prandaj, biseda jonë sot u përqendrua edhe te ajo që mund të ndërtojmë së bashku në të ardhmen: projekte të përbashkëta, të qëndrueshme dhe gjithëpërfshirëse, që u japin fëmijëve më shumë mundësi për të mësuar, krijuar, shprehur veten dhe për të qenë pjesë aktive e komunitetit.
Le të jetë ky vetëm fillimi i një rruge të përbashkët, ku përmes bashkëpunimit, kreativitetit dhe përkushtimit, të krijojmë mundësi të reja dhe hapësira ku çdo fëmijë mund të ndihet i parë, i dëgjuar dhe i përfshirë. 💛

19/08/2026

📚❤️ Biblioteka na bashkon, librat na afrojnë me njëri-tjetrin.

Kishim kënaqësinë të mirëpresim në Bibliotekën e Fëmijëve përfaqësuesit e OFAP - Organizata për Fëmijët pa Kujdes Prindëror, një organizatë që prej vitesh punon me përkushtim për mirëqenien, mbështetjen dhe fuqizimin e fëmijëve pa kujdes prindëror.

Në kuadër të fushatës sonë “Biblioteka na Bashkon-Bëhu Pjesë e Krijimit”, patëm kënaqësinë ta pasurojmë bibliotekën me 10 ekzemplarë të librit “Përrallat e heronjve të padukshëm”, ku përmes librit dhe leximit po mbështesim fëmijët që OFAP i shoqëron dhe përkujdeset për ta.

“Përrallat e heronjve të padukshëm”, shkruar nga vet Albana, është një libër i lindur nga përvoja e saj shumëvjeçare në punën me fëmijët. Përmes tregimeve, libri sjell në vëmendje botën e brendshme të fëmijëve dhe përcjell mesazhe për forcën, guximin, empatinë dhe shpresën.

Ne besojmë se librat mund të jenë shumë më tepër se histori të bukura. Ata mund t’i ndihmojnë fëmijët të kuptojnë më mirë veten, të tjerët dhe botën përreth tyre. 📖

Prandaj, fëmijët që vizitojnë Bibliotekën e Fëmijëve do të kenë mundësinë të njihen me këtë libër dhe, përmes tij, të zhvillojnë empatinë dhe ndjeshmërinë ndaj përvojave dhe ndjenjave të fëmijëve të tjerë.

Faleminderit OFAP për punën e jashtëzakonshme që bëni për fëmijët dhe për mundësinë që na dhatë të jemi pjesë e kësaj nisme. 🌱📚

04/08/2026

31/07/2026

15/07/2026

Jemi shumë të lumtur që dje zhvilluam takimin përfundimtar mes ekipit të The Library Project Kosova - si implementues i projektit, LuxDev, Agjencia e Luksemburgut për Bashkëpunim Zhvillimor dhe Galanteria Sh.p.k - si prodhues të mobiljeve, duke shënuar një moment të rëndësishëm në përmbylljen e realizimit të mobiljeve për Bibliotekën e Fëmijëve.

Ky projekt është rezultat i një bashkëpunimi të ngushtë, përkushtimit dhe punës së palodhur të të gjitha palëve, të cilat ndanë të njëjtin vizion për krijimin e një hapësire moderne, funksionale dhe frymëzuese për fëmijët.

Një falënderim i veçantë për mbështetjen e dhënë në sigurimin e mobiljeve, të financuara nga Dukati i Madh i Luksemburgut përmes LuxDev, Agjencisë së Luksemburgut për Bashkëpunim Zhvillimor, mbështetja bujare e së cilës bëri të mundur realizimin e mobiljeve dhe shndërrimin e këtij vizioni në realitet. Kontributi i tyre ka qenë vendimtar në krijimin e kësaj biblioteke që do t’u shërbejë brezave të fëmijëve në Prishtinë.

Falënderojmë gjithashtu ekipin e kompanisë Galanteria për angazhimin e jashtëzakonshëm gjatë realizimit të mobiljeve dhe punën e shkëlqyer.

Së bashku kemi dëshmuar se, kur bashkohen vizioni, partneriteti dhe përkushtimi, mund të krijohen hapësira që do të kenë ndikim të qëndrueshëm në jetën e fëmijëve dhe të gjithë komunitetit.

13/07/2026

KOMUNIKATË PËR MEDIA

E drejta e fëmijës për kujdes shëndetësor është e garantuar me Konventën për të Drejtat e Fëmijës, Ligjin për Shëndetësi dhe Ligjin për Mbrojtjen e Fëmijës. Neni 42 i Ligjit për Mbrojtjen e Fëmijës garanton kujdes shëndetësor falas për fëmijët, duke u mundësuar atyre qasje në shërbime të trajtimit dhe rehabilitimit sipas standardeve më të larta. Për garantimin e kësaj të drejte është përgjegjëse Ministria e Shëndetësisë.

Megjithatë, fëmijët vazhdojnë të përballen me sfida në qasjen dhe cilësinë e shërbimeve shëndetësore. Sipas hulumtimit të realizuar nga Shoqata për të Drejtat e Pacientëve, organizatë anëtare e KOMF, në Spitalin e Përgjithshëm të Prizrenit dhe Spitalin e Përgjithshëm të Gjilanit për matjen e kënaqshmërisë dhe përvojave të pacientëve, janë evidentuar mangësi të shumta, veçanërisht në shërbimet shëndetësore për fëmijët.

Pacientët e Repartit të Pediatrisë u renditen ndër repartet me nivelin më të ulët të kënaqshmërisë krahasuar me pacientët e reparteve të tjera. Në këtë kanë ndikuar faktorë të ndryshëm, si qasja ndaj pacientëve, cilësia e shërbimeve mjekësore, infermierore dhe diagnostike, kushtet infrastrukturore dhe higjiena, furnizimi me barna, cilësia e ushqimit, etj. Të dhënat po ashtu tregojnë se niveli i higjienës në repartet e pediatrisë është më i ulët krahasuar me repartet e tjera, duke ngritur shqetësime serioze për cilësinë dhe sigurinë e kujdesit që u ofrohet fëmijëve.

Sipas Kartës së Vlerësimit të publikuar nga KOMF, një nga sfidat kryesore në kujdesin sekondar dhe terciar mbetet mungesa e personelit shëndetësorë dhe mbingarkesa e klinikave të pediatrisë. Klinika e Pediatrisë në Qendrën Klinike Universitare të Kosovës vazhdon të punojë me kapacitete të kufizuara dhe me mbingarkesë të vazhdueshme. Numri i personelit shëndetësor mbetet i pamjaftueshëm në raport me numrin e pacientëve fëmijë, duke ndikuar drejtpërdrejt në cilësinë e ofrimit të shërbimeve.

Funksionalizimi i Spitalit të ri Kirurgjik Pediatrik ka përmirësuar përkujdesjen shëndetësore për fëmijët në nivel terciar, duke integruar shërbimet e emergjencës pediatrike, traumës, rikuperimit, si dhe ambulancat specialistike pediatrike dhe kirurgjike. Megjithatë, një pjesë e madhe e shërbimeve pediatrike vazhdon të operojë në “objektin e vjetër të Klinikës së Pediatrisë", në kushte infrastrukturore absolutisht të pa pranueshme që nuk përmbushin standardet për ofrimin e shërbimeve cilësore dhe dinjitoze për fëmijët.

Edhe pse Ligji për Mbrojtjen e Fëmijës garanton kujdes shëndetësor falas, në vazhdimësi raportohet nga prindërit dhe mediat për mungesë të barnave dhe materialeve shpenzuese në kujdesin parësor shëndetësor, spitalet rajonale dhe Qendrën Klinike Universitare të Kosovës. Mungesa e barnave dhe terapisë së nevojshme mund të ketë pasoja serioze për shëndetin e fëmijëve, ndërsa në mungesë të tyre, prindërit detyrohen t'i sigurojnë ato me shpenzimet e tyre, edhe kur bëhet fjalë për barna nga Lista Esenciale. Kjo cenon parimin e qasjes së barabartë në kujdesin shëndetësor dhe krijon barrë financiare për familjet.

Vlen të përmendet, aktualisht institucionet publike nuk disponojnë të dhëna për nivelin e kënaqshmërisë së pacientëve me shërbimet shëndetësore për fëmijët, pasi nuk ekziston një sistem monitorimi për matjen e përvojës dhe kënaqshmërisë së pacientëve. Përvojat e pacientëve duhet të shërbejne si një burim i rëndësishëm për identifikimin e mangësive dhe përmirësimin e cilësisë së shërbimeve, ndërsa përjashtimi i tyre nga procesi i vlerësimit është i pa paranueshëm dhe rrezikon që problemet reale të mbeten të padukshme dhe të paadresuara.

Është e domosdoshme që institucionet shëndetësore të ndërmarrin masa urgjente për përmirësimin e kushteve, rritjen e kapaciteteve njerëzore dhe garantimin e shërbimeve cilësore me në qendër fëmijën. Zëri i prindërve duhet të jetë pjesë e pandashme e çdo vendimmarrjeje për shëndetësinë.

17/06/2026